NA RAI NI IVOLATABU
Agilosi
Era dau vakaraitaki na agilosi ena ivola, droini, kei na iyaloyalo. Ia na cava sara mada e kilai me baleti ira na agilosi? Na cava nodra itavi?
O cei o ira na agilosi?
KA E KAYA NA IVOLATABU
Ni bera ni bulia na vuravura kei na tamata na Kalou, a buli ira e dua na ilawalawa era duidui sara vei keda na tamata. Era kaukaua cake vei keda, e nodra itikotiko tale ga na nona itikotiko na Kalou da qai sega ni raica rawa na tamata na vanua qori se meda lako kina. (Jope 38:4, 7) E vakatokai ira na ilawalawa qori na iVolatabu me “kabula kaukaua” kei na “agilosi.”
Era le levu na agilosi, na iwiliwili ni agilosi era wavokita tu na idabedabe vakaturaga ni Kalou e “oba vakaoba.” (Vakatakila 5:11) Ke cakacakataki na levu dina ni agilosi e kovuta na matavosa qori, ena yacova sara toka na vica vata na drau na milioni!
“Au raica . . . e levu na agilosi era wavokita na idabedabe vakaturaga . . . , na kedra iwiliwili e oba vakaoba, e udolu vakaudolu.”
—Vakatakila 5:11.
Na cava nodra itavi na agilosi ena gauna makawa?
KA E KAYA NA IVOLATABU
Levu na gauna era dau gusunivosa ni Kalou na agilosi se nona italai. * E tukuna na iVolatabu nira dau vakayagataki tale ga na agilosi ena nona cakacaka veivakurabuitaki na Kalou. Kena ivakaraitaki, a tala na Kalou e dua na agilosi me vakalougatataki Eparama, me tarovi koya tale ga mai na nona cabori Aisake me isoro. (Vakatekivu 22:11-18) Dua tale na agilosi a rairai vei Mosese ena yameyame ni buka e loma ni dua na kau, qai vakasavuya vua na itukutuku ena veisautaka vakadua nona bula. (Lako Yani 3:1, 2) Gauna e kolotaki kina na parofita o Taniela ena nodra qara na laione, a “tala mai na . . . Kalou na nona agilosi me sogota na gusudra na laione.”
“E qai rairai [vei Mosese] na agilosi i Jiova ena yameyame ni buka e loma ni dua na kau vakavotona.”
—Lako Yani 3:2.
Na cava na nodra itavi na agilosi ena gauna qo?
KA E KAYA NA IVOLATABU
Eda sega ni kila na ka kece era cakava tiko ena gauna qo na agilosi. Ia e kaya na iVolatabu nira vakaitavi tiko ena nodra vukei na yalomalumalumu mera kila vinaka na Kalou.
A vakaraitaka ena tadra vei Jekope o Jiova e dua na “ikabakaba” e tiko ena kedrau tadrua o lomalagi kei vuravura, era sirova qai cabeta tiko na agilosi. (Vakatekivu 28:10-12) De dua eda na duavata kei Jekope ni tadra ya e dusia na nona dau talai ira mai na agilosi i vuravura na Kalou o Jiova ena so na ilesilesi, mera vukei ira na nona tamata yalodina.
“E tu e dua na ikabakaba e vuravura, na muanaicake e yaco sara i lomalagi, era sirova qai cabeta tiko na ikabakaba oya na agilosi ni Kalou.”
—Vakatekivu 28:12.
^ para. 6 E kaya na iVolatabu nira talaidredre vua na Kalou eso na kabula kaukaua, qai vakatokai ira na agilosi ca qori mera “timoni.”
^ para. 11 Na vosa taumada vakaIperiu kei na vosa vaKirisi ni “agilosi” e vakayagataki ena iVolatabu e kena ibalebale ruarua na “italai.”