Wǔ e un gblé hagbɛ̌ ce e kpo nyi kpo nɔ kplɔ́n hunxixo é syɛn tawun hú lee un lin gbɔn é. Un tuùn ǎ, bo s’afɔ ɛ dó awɔntín jí kpo hlɔnhlɔn kpo. É vɛ́ nú mì, bɔ un jɛ kinkanbyɔ nyɛɖée jí ɖɔ un ka ɖó na lɛ́ kpò ɖò hun xò wɛ wɛ à jí. Etɛwu nǔ enɛ e jɛ é ka zɔ́n bɔ un kan nǔ mɔ̌hun byɔ nyɛɖée dó lɔnyiji-fɔnkan núwiwa enɛ e un yí wǎn na sɔmɔ̌, bo ko zán xwè mɔ̌kpan ɖ’emɛ é wu? Jɛ nukɔn hwɛ̌ ɔ, mi nú ma kpi lee un jɛ hun xò jí gbɔn é sín tan nú mi.

 È jì mì ɖò Buffalo, New York, États-Unis sín akpá, ɖò xwédo e mɛ fífá ɖè é ɖé mɛ. Katolika akowunká wɛ mǐ nyí. Un yì wemaxɔmɛ Katolika tɔn lɛ bo lɛ́ d’alɔ yɛhwenɔ lɛ ɖò nǔwiwa sinsɛn tɔn lɛ hwenu. Mɛjitɔ́ ce lɛ ba nɔ nyi kpo dada ce kpo ni ɖó gbɛ̀ e ɖó nu é ɖé. Enɛ wu ɔ, enyi un vɛ́ ko w’azɔ̌ ganji ɖò wemaxɔmɛ ɔ, ye nɔ jó mì dó bɔ un nɔ ɖ’alɔ ɖò lɔnyiji-fɔnkan núwiwa wemaxɔmɛ gudo tɔn lɛ mɛ, bo nɔ lɛ́ w’azɔ̌ hwenu klewun tɔn lɛ. Enɛ zɔ́n bɔ un kplɔ́n bo nɔ gbɛ́ nǔ nú nyiɖée sín vǔ.

 Ee un ɖó xwè 17 é ɔ, un jɛ hunxixo kplɔ́n jí. Un nɔ kplɔ́n hunxixo nú ganxixo atɔn gbè ɖokpo nú ayizɛ́n ɖò aklunɔzán gbla ɖokpo mɛ, lobo wà mɔ̌ nú xwè gegě. Un nɔ zán ganxixo gegě dó lin tamɛ dó wlɛnwín hunxixo tɔn lɛ kpo alogwe lilɛlilɛ tɔn lɛ kpo jí, bo nɔ lɛ́ kpɔ́n video e na d’alɔ mì bɔ na vɔ́ nyiɖée jlaɖó ɖò ali enɛ lɛ nu lɛ é gegě. Un yí wǎn nú nukúnmɛ blablá hwenu e un ɖò hunxixo kplɔ́n wɛ é, é na bo tlɛ nyí kpo alyannú kpo kplɔ́n wɛ un ɖè ɔ nɛ. Un hɛn ɔ un nɔ gbà nǔ lɛ alǒ blǐki lɛ kpo alɔ yayǎ kpo. Alɔ wá sè kpɛ́n nú mì bǐ ɖò lɔnyiji-fɔnkan núwiwa enɛ mɛ, un ɖ’alɔ ɖò agbahwlɛnhwlɛn lɛ mɛ, bo ɖu ajɔ gegě. Hunxixo wá huzu nǔ e ɖò taji hugǎn ɖò gbɛ̀ ce mɛ é.

 Un kpéwú bo ɖó ɖuɖeji enyíì ɖò gbɛ̀ ce mɛ. Un yí kúnnuɖewema kplɔnyiji alavɔ tɔn ce kpo ajɔ ɖaxó ɖaxó lɛ kpo. Un w’azɔ̌ ɖò azɔ̌xwé ɖé bo nyí ingénieur en informatique. Gbɔn vo nú azɔ̌kwɛ́ ce ɔ, è nɔ lɛ́ dó ajɔ ɖevo lɛ mì ɖò azɔ̌xwé e un nɔ w’azɔ̌ ɖè é, un ɖó xwé nyɛɖesunɔ tɔn kpo nyɔnu xɔ́ntɔn ɖé kpo. Un cí mɛ e ɖó awǎjijɛ tawun é ɖé ɖɔhun ɖò nukúnta, amɔ̌, un vo ǎ, ɖó un nɔ kan nǔ taji taji ɖé lɛ byɔ nyɛɖée, bo ka nɔ mɔ xósin nú ye ǎ.

 Bo na dó mɔ xósin nú nǔkanbyɔ ce lɛ ɔ, un jɛ amǐsa yì jí azɔn we ɖò aklunɔzán gbla ɖokpo ɖokpo mɛ, bo nɔ xoɖɛ dó byɔ alɔdó Mawu tɔn. É wá sù gbè ɖokpo bɔ un ɖɔ xó xá xɔ́ntɔn ɖé; xóɖɔɖókpɔ́ enɛ huzu gbɛzán ce. Un kanbyɔ ɛ ɖɔ: “A ka ko kan nǔ e wu mǐ ɖò gbɛ̀ ɔ mɛ é byɔ hwiɖée kpɔ́n à?” Bo ɖɔ gɔ́ na ɖɔ: “Wuvɛ̌ kpo hwɛagɔɖiɖɔ kpo sukpɔ́ tawun ɖò gbɛ̀ ɔ mɛ!” É ɖɔ nú mi ɖɔ emi lɔ nɔ kan nǔ enɛ lɛ byɔ emiɖée ɖ’ayǐ, bo ka wá mɔ xósin jɔ xósin lɛ nú ye ɖò Biblu mɛ. É na mì wema e xóta tɔn nyí Hiẹ Sọgan Nọgbẹ̀ Kakadoi to Paladisi mẹ to Aigba Ji é. a É tinmɛ nú mì ɖɔ emi ɖò Biblu kplɔ́n xá Kúnnuɖetɔ́ Jehovah tɔn lɛ wɛ. Tlolo hwɛ̌ ɔ, un xò nǔ kpɔ́n d’ewu, ɖó un nɔ lin ɖɔ un kún ɖó na xà wema amǐsa e un ma nɔ yì ǎ é tɔn ó. É ɖò mɔ̌ có, jlǒ e un ɖó bá mɔ xósin nú nǔkanbyɔ ce lɛ é zɔ́n bɔ un ba na kpɔ́n ɖɔ nǔ e Kúnnuɖetɔ́ Jehovah tɔn lɛ nɔ kplɔ́n mɛ lɛ é ka sɔgbe à jí.

 Nǔ e Biblu kplɔ́n mɛ nǔgbo nǔgbo é mimɔ jiwǔ nú mì tawun. Un kplɔ́n ɖɔ linlin e Mawu ɖó nú gbɛtɔ́ lɛ ɖò bǐbɛ̌mɛ é wɛ nyí ɖɔ ye ni nɔ gbɛ̀ kaka sɔyi ɖò palaɖisi mɛ ɖò ayikúngban jí, bɔ linlin tɔn enɛ kún ka’o huzu ó. (Bǐbɛ̌mɛ 1:28) Hwenu e un mɔ nyikɔ Mawu tɔn Jehovah ɔ ɖò Biblu ce (Bible du roi Jacques) mɛ, bɔ è ɖɔ nú mì ɖɔ nyikɔ enɛ sín xó ɖɔ wɛ nyi nɔ ɖè, hwenu e un nɔ ɖò “Tɔ́ mǐtɔn e ɖò jixwé é” sín ɖɛ ɔ vɔ́ ɖɔ wɛ é ɔ, é jiwǔ nú mì tawun. (Ðɛhan 83:18, nwt; Matie 6:9) Gɔ́ na ɔ, un lɛ́ mɔ nǔ jɛ nǔ e wu Mawu tin dó wuvɛ̌ mimɔ gbɛtɔ́ tɔn nú táan ɖé é mɛ. Nǔ e kplɔ́n wɛ un ɖè lɛ é bǐ sɔgbe tawun ɖò nukún ce mɛ! É hun xomɛ nú mì tawun.

 Un na wɔn lee nǔ cí nú mì azɔn nukɔntɔn e un yì kplé Kúnnuɖetɔ́ Jehovah tɔn lɛ tɔn é ǎ. Ye mɛ bǐ wɛ dó xɔ́ntɔn mì bo ba na tuùn nyikɔ ce. Azɔn nukɔntɔn e un yì kplé é ɔ, è xwlé xóɖiɖɔ ɖé mɛ bɔ é ɖɔ xó dó ɖɛ alɔkpa e Mawu nɔ sè lɛ é wu. Xóta enɛ sɔ́ akpakpa mì tawun ɖó un ko ɖò ɖɛ xò dó byɔ alɔdó Mawu tɔn wɛ ɖ’ayǐ. Kplé ɖevo e un yì é jɛ dó Flǐn kú Jezu tɔn tɔn mɛ. Ðò kplé enɛ jí ɔ, lee mɛ bǐ, kaka jɛ yɔkpɔvu lɛ jí nɔ xwedó xóɖɔtɔ́ ɔ ɖò Biblu yeɖesunɔ tɔn lɛ mɛ, hwenu e é nɔ ɖò wemafɔ lɛ xà wɛ é gbɔn é jiwǔ nú mì tawun. Un tuùn lee na nɔ mɔ wemafɔ lɛ gbɔn é ɖ’ayǐ ǎ, amɔ̌, Kúnnuɖetɔ́ lɛ d’alɔ mì tawun bo kplɔ́n mì lee na nɔ zán Biblu gbɔn é.

 Ee un ɖò kplé lɛ yì wɛ é ɔ, lee nǔ e Kúnnuɖetɔ́ lɛ nɔ kplɔ́n mɛ lɛ é nyí nǔjɔnǔ sɔ é lɛ́ sù nukún ce mɛ d’eji. Un nɔ kplɔ́n nǔ gegě ɖò kplé lɛ bǐ jí, ye nɔ dó wusyɛn lanmɛ nú mì, bo nɔ lɛ́ fá kɔ nú mì. Wǎgbɔ tɔn ɔ, Kúnnuɖetɔ́ lɛ byɔ mì ɖɔ emi na kplɔ́n Biblu xá mì.

 Nǔ e un mɔ ɖò Kúnnuɖetɔ́ Jehovah tɔn lɛ gɔ́n é gbɔn vo tawun nú nǔ e un nɔ mɔ ɖò amǐsa ce é. Un mɔ ɖɔ Kúnnuɖetɔ́ lɛ ɖò bǔ, nɔ ɖɔ nǔgbo bo nɔ lɛ́ wà nǔ e wu ye kpé é bǐ, bá nyɔ́ Mawu nukúnmɛ. Un lɛ́ mɔ wuntun e nɔ dó gesí Klisanwun nǔgbo lɛ é ɖò ye wu, é wɛ nyí wanyiyi e ɖò tɛntin yetɔn é.—Jaan 13:35.

 Lě dò un kplɔ́n Biblu ɔ sɔ é ɔ, mɔ̌ dò wɛ huzuhuzu e bló wɛ un ɖè bá zán gbɛ̀ sɔgbe xá nǔgbododó Biblu tɔn lɛ é sukpɔ́ sɔ. É ɖò mɔ̌ có, un nɔ mɔ ɖɔ un kún sixu jó hunxixo dó gbeɖé ó. Un yí wǎn nú hunxixo kplɔnkplɔn kpo agbahwlɛnhwlɛn lɛ kpo. Hwenu e un tinmɛ enɛ nú Kúnnuɖetɔ́ e nɔ kplɔ́n Biblu xá mì é ɔ, é na mì jiɖe kpo xomɛnyínyɔ́ kpo bo ɖɔ nú mì ɖɔ: “Ðǒkan dó nǔkplɔnkplɔn ɔ wu hwɛ̌, un tuùn ɖɔ a na wá gbeta e sɔgbe é kɔn.” Nǔ e un ɖó na sè é pɛ́ɛ nɛ. Lě dò un ɖò nǔ ɔ kplɔ́n wɛ sɔ é ɔ, mɔ̌ dò wɛ un nɔ jló na nyɔ́ Jehovah Mawu nukúnmɛ sɔ.

 Nǔ e wá huzu mì é wɛ nyí awovínú e jɛ bɔ un ɖɔ ɖò aga é, un tuùn ǎ bo s’afɔ mɛ e kpo nyi kpo ɖò hunxixo kplɔ́n wɛ é dó awɔntín kpo hlɔnhlɔn kpo. Nǔ enɛ e jɛ é zɔ́n tamɛ lin mì dó nǔjɔnǔ mɛ. Un kanbyɔ nyɛɖée ɖɔ un na sixu nyí ahwanvu Klisu tɔn e fá é ɖé, cobo ka na lɛ́ ɖò hun xò wɛ hwe ɖokpo ɔ nu à jí? Un xà nǔɖɔɖ’ayǐ e ɖò Ezayíi 2:3, 4 mɛ é, é ɖɔ ɖɔ mɛ e nɔ xwedó alixlɛ́mɛ Jehovah tɔn lɛ é ɖě kún “sɔ́ na kplɔ́n lee è nɔ fun ahwan gbɔn é” ó. Jezu lɔ kplɔ́n mǐ ɖɔ enyi mɛ ɖevo lɛ na bo wà nǔ agɔ xá mǐ hǔn, mǐ ni ma xò daka ó. (Matie 26:52) Enɛ wu ɔ, un jó lɔnyiji-fɔnkan núwiwa enɛ e un yí wǎn na tawun é dó.

 Ðò nukɔnmɛ ɔ, un xwedó wěɖexámɛ Biblu tɔn e ɖɔ ɖɔ mǐ ni kplɔ́n mǐɖée “dó xɛsi ɖi nú Mawu lɔ jí” é. (1 Timɔtée 4:7) Hwenu kpo hlɔnhlɔn kpo e un nɔ zán dó xò hun ɖ’ayǐ é ɔ, nǔ gbigbɔ tɔn lɛ wɛ un nɔ zán ye na dìn. Nyɔnu xɔ́ntɔn ce yí gbè nú nǔ e kplɔ́n wɛ un ɖè ɖò Biblu mɛ lɛ é ǎ, enɛ wu ɔ, mǐ sɛ́n kan nú kancica mǐtɔn. Un bló baptɛm bo huzu Kúnnuɖetɔ́ Jehovah tɔn ɖò 24 janvier 1987. É sɔ́ lín ǎ bɔ un huzu sinsɛnzɔ́watɔ́ hwebǐnu tɔn, bo nɔ zán hwenu dó kplɔ́n Biblu mɛ ɖevo lɛ fatáa. Un kpò ɖò sinsɛnzɔ́ hwebǐnu tɔn sín azɔ̌ wà wɛ sín hwenɛnu kaka dìn, bo lɛ́ wà sinsɛnzɔ́ nú hwenu ɖé ɖò hɔ̌nkan gbɛ̀ ɔ tɔn Kúnnuɖetɔ́ Jehovah tɔn lɛ tɔn ɖò New York, États-Unis.

 Dìn e un tuùn nǔgbo ɔ dó Mawu wu é ɔ, un mɔ nǔ e hudo mì ɖò gbɛzán ce mɛ é. Un sɔ́ nɔ mɔ ɖɔ un kún hwɛ́n nǔɖe ó dìn ǎ. Loɔ, gbɛ̀ ce ɖó nu dìn, bɔ un ɖó nukúnɖiɖó nǔjɔnǔ tɔn ɖé dó sɔgudo wu, bo lɛ́ ɖó awǎjijɛ nǔgbo ɔ. Un kpò ɖò lanmɛ ba kpɔ́n wɛ, amɔ̌, é sɔ́ nyí nǔ e ɖò taji hugǎn ɖò gbɛ̀ ce mɛ é ǎ. Nǔ e ɖò taji nú mì ɖò gbɛ̀ ce mɛ dìn é wɛ nyí Jehovah Mawu sinsɛn.

 Hwenu e un kpò ɖò hun xò wɛ é ɔ, un nɔ ɖò acéjí dó mɛ e lɛlɛ̌ dó mì lɛ é wu, ɖó un nɔ ɖò lee na jɛhun dó nyiɖée jí gbɔn, hwenu e è na wá tɔ́ hun mì é lin wɛ. Dìn ɔ, ayi ce nɔ ɖò mɛ e lɛlɛ̌ dó mì lɛ é wu, amɔ̌, ɖó hwɛjijɔ ɖevo wu, é wɛ nyí ɖɔ, bo na dó d’alɔ ye. Biblu d’alɔ mì bɔ un huzu nǔnamɛtɔ́ ɖé, bo lɛ́ nyí asú ɖagbe ɖé nú asivɛ́ ce Brenda.

 Hunxixo wɛ un yí wǎn na ɖò gbɛ̀ ce mɛ ɖ’ayǐ. Amɔ̌, un sɔ́ nǔ ɖagbe ɖevo dó ɖyɔ na. Biblu ɖɔ: “Agbazamɛgandidó ɔ, nǔ ɖagbe wɛ; amɔ̌ nǔ kpɛɖé jɛn wɛ é nyɔ́ na; ayimɛgandidó ɔ ka nyɔ́ nú nǔ lɛ bǐ, ɖó é dó akpá nú mi ɖɔ mi na mɔ gbɛ̀ dìn tɔn, kpodo ee ja ɔ kpo.”—1 Timɔtée 4:8.