Biblu ɖɔ ɖ’ayǐ ɖɔ azɔn baɖabaɖa lɛ (azɔn e nɔ gbà nǔ gbɔn gbɛ̀ ɔ bǐ mɛ lɛ é, kaka jɛ jɛmɛji lɛ jí) na wá xwetɔ́n ɖò azǎn gudogudo tɔn lɛ mɛ. (Luki 21:11) Jɛmɛji mɔ̌hun lɛ nyí tódɔnnúmɛ Mawu tɔn ǎ. Nǔgbo ɔ, Mawu na gbɔn Axɔ́suɖuto tɔn gblamɛ zaanɖé dìn, bo na ɖó nǔ azɔn lɛ bǐ nu, kaka jɛ jɛmɛji lɛ jí.

•  Biblu ka ɖɔ jɛmɛji lɛ sín xó ɖ’ayǐ à?

•  Mawu ka ko sɔ́ azɔn dó dɔn tó nú mɛ kpɔ́n à?

•  Jɛmɛji égbé tɔn lɛ ɔ, tódɔnnúmɛ Mawu tɔn wɛ ye nyí à?

•  Jɛmɛji lɛ sín xó ka na wá yì xɔ gbè ɖokpo à?

•  Wemafɔ Biblu tɔn lɛ dó azɔn wu

 Biblu ɖɔ jɛmɛji lě, alǒ azɔn alɔkpa lě, ɖi Covid-19, SIDA abǐ grippe espagnole sín xó ɖ’ayǐ ǎ. Amɔ̌, é ɖɔ “jɛmɛji” kpo azɔn e nɔ gblé gbɛ̀ dó nú mɛ lɛ é kpo sín xó ɖ’ayǐ. (Luki 21:11; Nǔɖexlɛ́mɛ 6:8) Nǔ enɛ lɛ ɖò “azǎn gudogudo tɔn lɛ” e è nɔ lɛ́ ylɔ́ ɖɔ “hwenu e gbɛ̀ elɔ na vɔ dó” é é sín wuntun lɛ mɛ.—2 Timɔtée 3:1; Matie 24:3.

 Biblu ɖɔ ninɔmɛ e mɛ Mawu zán azɔn dó dɔn tó nú mɛ ɖè é klewun ɖé sín xó. Ði kpɔ́ndéwú ɔ, é bló bɔ mɛɖé lɛ bɛ́ guduzɔn. (Kɛ́nsísɔ́ 12:1-16; 2 Axɔ́su lɛ 5:20-27; 2 Tan 26:16-21) É ɖò mɔ̌ có, nǔ enɛ lɛ e jɛ azɔn we ɖé kpowun é wà nǔ dó xomɛvɔnɔ lɛ wu, lee jɛmɛji lɛ nɔ wà gbɔn é ǎ. É nyɔ́ wà ɔ, hwɛ e Mawu ɖó nú mɛ ɖěɖee fɔ́n gǔ dó jǐ tɔn tlɔlɔ lɛ é wɛ nǔ enɛ lɛ e jɛ é nyí.

 Eǒ. Mɛɖé lɛ nɔ ɖɔ ɖɔ Mawu nɔ zán jɛmɛji lɛ kpo azɔn ɖevo lɛ kpo dó dɔn tó nú mɛ ɖò égbé. Amɔ̌, Biblu nɔ gudo nú xó enɛ ǎ. Etɛwu?

 Hwɛjijɔ ɖokpo wɛ nyí ɖɔ azɔn dóya nú mɛsɛntɔ́ Mawu tɔn hwexónu tɔn kpo égbé tɔn kpo ɖé lɛ. Ði kpɔ́ndéwú ɔ, Timɔtée e nyí nya gbejinɔtɔ́ ɖé é “nɔ jɛ azɔn hwɛhwɛ.” (1 Timɔtée 5:23) Amɔ̌, Biblu ɖɔ ɖɔ enɛ xlɛ́ ɖɔ nǔ tɔn kún nyɔ́ Mawu nukúnmɛ ó ǎ. Mɔ̌ ɖokpo ɔ, ɖò égbé ɔ, mɛsɛntɔ́ Mawu tɔn gbejinɔtɔ́ ɖé lɛ nɔ jɛ azɔn, alǒ nɔ sɔ́ azɔn. Hwɛhwɛ ɔ, ninɔmɛ e mɛ ye mɛ enɛ lɛ nɔ wá tɔ́n ɖè lɛ é wu wɛ é nɔ sín kpowun.—Nǔnywɛtɔ́xó 9:11, nwt.

 Hwɛjijɔ ɖevo wɛ nyí ɖɔ Biblu kplɔ́n mɛ ɖɔ hwenu e Mawu ɖó bo na dɔn tó nú mɛ nyanya lɛ é kún ko sù ó. É nyɔ́ wà ɔ, “hwlɛngán sín azǎn” gbè wɛ mǐ ɖè, enɛ wɛ nyí táan e mɛ Mawu ɖò gbɛtɔ́ lɛ bǐ ylɔ́ wɛ kpo akpakpa sɔ́ mɛ kpo ɖɔ ye ni sɛkpɔ́ emi bá gán é. (2 Kɔlɛntinu lɛ 6:2) Ali e nu é ɖò mɔ̌ wà ɖè wɛ é ɖokpo wɛ nyí gbɔn wɛn ɖagbe e jlá wɛ è ɖè gbɔn gbɛ̀ ɔ bǐ mɛ é gblamɛ, enɛ wɛ nyí “Axɔ́suɖuɖu Mawu tɔn sín Wɛnɖagbe.”—Matie 24:14.

 Ɛɛn. Biblu ɖɔ hwenu ɖé xó ɖ’ayǐ b’ɛ ɖò kɛnnɛkɛnnɛ bɔ mɛ ɖebǔ sɔ́ na jɛ azɔn ǎ. Ðò Axɔ́suɖuto Mawu tɔn glɔ́ ɔ, é na gbɔ azɔn lɛ bǐ. (Ezayíi 33:24; 35:5, 6) É na ɖè wuvɛ̌, yajiji kpo kú kpo síìn. (Nǔɖexlɛ́mɛ 21:4) É na lɛ́ fɔ́n mɛ ɖěɖee kú lɛ é wá gbɛ̀, bonu ye na dó sixu ɖu lanmɛ syɛn hunsin ɖagbe sín vivǐ ɖò ninɔmɛ ɖagbe lɛ mɛ ɖò ayikúngban jí fí.—Ðɛhan 37:29; Mɛsɛ́dó 24:15.

 Nǔɖexlɛ́mɛ 6:8: “Un kpɔ́n bo mɔ sɔ́ amamú ɖokpo; mɛ e ɖò sɔ́ ɔ jí ɔ nɔ nyí kú, bɔ kútomɛ xwedó è. È na acɛ ye, bonu . . . ye na ɖó azɔn nú [gbɛtɔ́ lɛ], bɔ ye na kú.”

 Tinmɛ tɔn: Nǔɖɔɖ’ayǐ e kúnkplá sɔ́xátɔ́ ɛnɛ e xó wema Nǔɖexlɛ́mɛ tɔn ɖɔ é xlɛ́ ɖɔ jɛmɛji lɛ na gbà nǔ ɖò hwe mǐtɔn nu.