È sixu kan nǔ e wu è ɖò gbɛ̀ ɔ mɛ é byɔ ɖò alɔkpa gegě jí, ɖi Etɛwu mǐ ka ɖò fí? alǒ, Gbɛ̀ ce ka ɖó nu ɖé à? Biblu xlɛ́ ɖɔ linlin e wu mǐ ɖò gbɛ̀ ɔ mɛ é wɛ nyí ɖɔ mǐ na zun xɔ́ntɔn xá Mawu. Mǐ ni kpɔ́n nǔgbo taji elɔ lɛ e Biblu ɖexlɛ́ é ɖé lɛ.

•   Mawu wɛ nyí Gbɛɖotɔ́ mǐtɔn. Biblu ɖɔ: “Mawu . . . wɛ bló mǐ.”—Ðɛhan 100:3; Nǔɖexlɛ́mɛ 4:11.

•   Linlin ɖé wu wɛ Mawu dá nǔ lɛ bǐ, kaka jɛ mǐɖesunɔ jí.—Ezayíi 45:18.

•   Mawu dá mǐ, bɔ mǐ nɔ “ɖó hudo nǔ gbigbɔ tɔn lɛ tɔn.” Jlǒ e mǐ nɔ ɖó bo na tuùn nǔ e wu mǐ ɖó gbɛ̀ ɔ mɛ é lɔ ɖ’emɛ. (Matie 5:3, nwt) É ba ɖɔ mǐ ni sú hudo enɛ sín dò.—Ðɛhan 145:16.

•   Mǐ nɔ sú hudo gbigbɔ tɔn mǐtɔn lɛ sín dò, gbɔn xɔ́ntɔn zunzun xá Mawu gblamɛ. Mɛɖé lɛ sixu mɔ ɖɔ é na vɛwǔ bɔ è na zun xɔ́ntɔn xá Mawu có, Biblu dó wusyɛn lanmɛ nú mǐ ɖɔ: “Mi sɛkpɔ́ Mawu; enɛ ɔ é na sɛkpɔ́ mi.”—Jaki 4:8; 2:23.

•   Bo na dó zun xɔ́ntɔn xá Mawu ɔ, mǐ ɖó na zán gbɛ̀ sɔgbe xá linlin e wu é dá mǐ é. Biblu ɖɔ xó dó linlin enɛ wu ɖò Nǔnywɛtɔ́xó 12:13 mɛ, bo ɖɔ: “Ðǒ sísí nú Mawu bo bló nǔ e é zɔ́n lɛ; nǔ e ɖò taji bɔ gbɛtɔ́ bǐ ɖó na wà é nɛ.”—Mawuxówema.

•   Ðò sɔgudo ɔ, mǐ sixu ɖu linlin bǐbɛ̌mɛ tɔn e Mawu ɖó nú mǐ é sín lè bǐ mlɛ́mlɛ́, hwenu e é na ɖè wuvɛ̌ mimɔ síìn bo na na gbɛ̀ mavɔmavɔ xɔ́ntɔn tɔn ɖěɖee sɛn ɛ lɛ é é.—Ðɛhan 37:10, 11.