Ðò gbɛtɔ́ livi kanweko mɔ̌kpan e nɔ nɔ Amérique Latine lɛ é mɛ ɔ, ye mɛ livi mɔ̌kpan wɛ ɖó akɔgbe yeɖesunɔ tɔn lɛ kpo aca yeɖesunɔ tɔn lɛ kpo. Mɛ enɛ lɛ gegě wɛ nyí nɔví gbigbɔ tɔn mǐtɔn lɛ, bɔ aca e mɛ yetɔn lɛ jó dó nú ye lɛ é nɔ xɔ akwɛ ɖò nukún yetɔn mɛ. Bo na dó d’alɔ mɛ lɛ ɖò gbigbɔ lixo ɔ, ye nɔ lilɛ wema Kúnnuɖetɔ́ Jehovah tɔn lɛ tɔn dó akɔgbe 130 jɛji mɛ ɖò Amérique Latine, bo nɔ lɛ́ má wema enɛ lɛ. * É ɖò mɔ̌ có, è klán gbe xá ye mɛ ɖé lɛ, ɖó ye wá gbeta ɔ kɔn bo na sɛn Jehovah, bo lɛ́ gbɛ́ ɖɔ emi kún na ɖ’alɔ ɖò aca e gbakpé, bo ma ka jinjɔn Biblu jí ǎ lɛ é mɛ ó wutu. Nɛ̌ è ka ko zán nǔnina towe lɛ dó d’alɔ ye gbɔn?

 Ðò Mexique ɔ, nɔví sunnu kpo nɔví nyɔnu kpo mǐtɔn e wá sín akɔ Huichol tɔn mɛ, ɖo sókan Jalisco tɔn mɛ lɛ é gbɛ́ kpo sísí kpo ɖɔ emi kún na ɖ’alɔ ɖò aca sinsɛn tɔn e ayixa emitɔn ma yí gbe na ǎ lɛ é mɛ ó. * Amɔ̌, enɛ sin xomɛ nú akɔ enɛ sín mɛɖé lɛ. Ðò 4 décembre 2017 ɔ, ahwan e ɖò adǎn jí é ɖé tɔ́n ahwan gbɛ̌ta Kúnnuɖetɔ́ lɛ tɔn ɖé kpo mɛ e ɖò kpɔ́ xá ye lɛ é gegě ɖevo lɛ kpo. Ahwan ɔ nya ye tɔ́n, gba xwé yetɔn lɛ, bo gblɔ́n adǎn nú ye ɖɔ emi na hu mɛ ɖebǔ e na tɛ́n kpɔ́n bo na lɛkɔ é.

 Kúnnuɖetɔ́ e ɖo toxo e sɛkpɔ́ finɛ lɛ é mɛ lɛ kpé nukún dó nǔ nukɔntɔn e hudo nɔví sunnu kpo nɔví nyɔnu kpo mǐtɔn lɛ é wu. Amɔ̌, etɛ è ka sixu wà bonu ye na lɛkɔ yì xwé? Nɔví sunnu e nɔ nyí Agustín é ɖɔ: “Mǐ ɖó akwɛ gegě, bo na yí hwɛmɛɖemɛsíntɔ́ ǎ, mǐ ka lɛ́ tuun fí e mǐ na yì bɔ è na ɖè wě xá mǐ ɖò sɛ́n linu é ǎ.”

 Ðó e tɔ́n ahwan vivo e nɔví mǐtɔn lɛ ɖó bo na ɖɔ sinsɛn e mɛ ye na nɔ é wutu ɔ, alaxɔ Amérique Centrale tɔn yawǔ wa nǔɖe. Nukɔntɔn ɔ, ye byɔ gǎn ayǐ ɔ jí tɔn lɛ ɖɔ ye ni ba dò nú nǔ dó adǎnúwiwa enɛ lɛ wu. Bɔ d’ewu ɔ, Wěɖegbɛ́ Titoblonunutɔ́ lɛ tɔn Hagbɛ̌ Alixlɛ́mɛtɔ́ ɔ tɔn yí gbe ɖɔ alaxɔ Amérique Centrale tɔn ni w’azɔ̌ ɖó kpɔ́ xá Azɔ̌xɔsa E Nɔ Ðɔ Nǔ Dó Sɛ́n Linu bo ɖo hɔ̌nkan gbɛ̀ ɔ tɔn mǐtɔn é, lobo ylɔ́ hwɛ dó nɔví sunnu kpo nɔví nyɔnu kpo mǐtɔn Huichol tɔn lɛ tamɛ. Wǎgbɔ tɔn ɔ, xó ɔ wá yì Hwɛɖɔxɔsá Ðaxó Hugǎn Mexique tɔn.

 Hwɛmɛɖemɛsíntɔ́ e gosin tò vovo mɛ lɛ é sín gbɛ̌ta ɖé sɔnǔ nú hunjijɛ dó mɛɖée jí sín xó e zawě é ɖé, bo tinmɛ ɖɔ lee mɛ ɖevo lɛ ɖó na ɖó sísí nú acɛ ayǐnɔ lɛ tɔn gbɔn é ɔ, mɔ̌ wɛ ayǐnɔ lɛ ɖesu ɖó na ɖó sísí nú vivo e ayǐnɔ gbɛ̌ yetɔn lɛ ɖó é, lobo nya xɛ ɖ’eji gbɔn é nɛ. Gbɛtɔ́ lɛ bǐ wɛ ɖó acɛ ɖé lɛ, nú ye na bo tlɛ nɔ nɔ fí ɖebǔ ɔ nɛ.

 Ðò 8 juillet 2020 ɔ, Hwɛɖɔxɔsá Ðaxó ɔ blebu yí gbè ɖɔ hwɛ kpa Kúnnuɖetɔ́ Jehovah tɔn lɛ. Ye ɖegbe ɖɔ mɛ e è ko nya lɛ é bǐ ɖó na lɛkɔ wá xwé. Agustín e xó mǐ ɖɔ wá yì é ɖɔ lee é sù é kpo mɛ ɖě lɛ kpo sín nukúnmɛ gbɔn é gbɔn lě: “Nǔ e nɔví lɛ bló nú mǐ é sù nukún mǐtɔn mɛ tawun, bo lɛ́ dó awǎjijɛ nú mǐ. Enyi ye ma ko d’alɔ mǐ wɛ ǎ ɔ, mǐ sixu kpé nǔ ɖebǔ wu bo wà ǎ.”

 Ðò hwe ɔ nu ɔ, nɔví mǐtɔn ɖé lɛ ɖo San Juan de ilumán, gletoxo ɖé wɛ bo ɖo Équateur, fí e ayǐnɔ Otavalo-nu gegě nɔ nɔ é; ɖò finɛ ɔ, è klán gbè xá nɔví mǐtɔn lɛ ɖò ali e ɖibla nyí ɖokpo ɔ é nu. Ðò 2014 ɔ, ee è yí gbè nú ye gudo é ɔ, ye jɛ Kpléxɔ Axɔ́suɖuto ɔ tɔn ɖé gbá jí. Amɔ̌, sinsɛngán ɖé fɔ́n ahwan e mɛ gbɛtɔ́ 100 jɛji ɖè é ɖé dó ye jí, bo ɖó xɔgbigbázɔ́ ɔ te gannugánnú. Enɛ gudo ɔ, mɛ lɛ ɖegbe ɖɔ Kúnnuɖetɔ́ Jehovah tɔn lɛ ni ma sɔ́ kplé ɖó kpɔ́ bo sɛn Mawu ɖě ó.

 Azɔ̌xɔsa e nɔ kpé nukún dó hwɛɖiɖɔxó lɛ wu ɖo alaxɔ Équateur tɔn mɛ é kpo hɔ̌nkan gbɛ̀ ɔ tɔn mǐtɔn kpo w’azɔ̌ ɖó kpɔ́ bo na dó jɛhun dó vivo e agun ɔ ɖó bo na sɛn Mawu, bɔ è ma ɖò sísí ɖó na wɛ ǎ é jí. Nɔví mǐtɔn lɛ dɔn xó ɔ yì hwɛ nukɔn. Enɛ zɔ́n bɔ mɛ lɛ sɔ́ nɔ klán gbè xá ye ɖě ǎ, bo na gbè ye bɔ ye lɛ́ jɛ kplé yetɔn lɛ bló jí, bo fó Kpléxɔ Axɔ́suɖuto ɔ tɔn gbigbá. Amɔ̌, bo na dó cyɔn alɔ acɛ e nɔví lɛ ɖó é jí ɖò sɔgudo ɔ, afɔsɔ́ɖótetɔ́ mǐtɔn lɛ byɔ hwɛɖɔxɔsá ɖaxó hugǎn lɛ ɖɔ ye ni wá gbeta ɖé kɔn dó xó taji elɔ jí: Ayǐnɔ lɛ ka ɖó na ɖó sísí nú acɛ gbɛtɔ́ lɛ tɔn e è yí gbè na gbɔn gbɛ̀ ɔ bǐ mɛ é à?

 Ðò 16 juillet 2020 ɔ, Sɛ́ndodó-Gbasá Équateur tɔn ɖótó hwɛyiylɔ́ ɔ. Nɔví ɖěɖee nyí mɛɖesínhwɛmɛtɔ́ ɖò Équateur lɛ é sɔ́ agun ɔ sín afɔ ɖó te. Gɔ́ na ɔ, nɔví mǐtɔn e gosin tò ɖevo mɛ, bo nyí mɛɖesínhwɛmɛtɔ́ e ko mɔ nǔ kpɔ́n lɛ é ɛnɛ wɛ ɖɔ xó ɖò hwɛɖɔxɔsa ɔ. Sɛ́n e e dó ɖó Covid-19 wutu lɛ é zɔ́n bɔ ye nɔ tò yetɔn lɛ mɛ, bo ɖɔ xó sɛ́dó gbɔn Ɛntɛnɛti jí. Azɔn nukɔntɔn ɔ nɛ bɔ hwɛɖɔxɔsa ɖé yí gbè bɔ gbɛ̌ta mɛɖesínhwɛmɛtɔ́ tɔn e sɔ́ Kúnnuɖetɔ́ Jehovah tɔn lɛ sín afɔ ɖó te é ɖé jɛhun dó yeɖée jí ɖò hwɛ nukɔn gbɔn Ɛntɛnɛti jí. * Gbɛ̌ta ɔ ɖè xó sín nǔ e hwɛɖɔxɔsa vovo lɛ ko ɖɔ gbɔn gbɛ̀ ɔ bǐ mɛ é mɛ, bo xlɛ́ ɖɔ ayǐnɔ lɛ kún ɖó na jó acɛ e ye ɖó lɛ é dó, ɖó ye nyí akɔ ɖé kpowun wutu ó.

 Nɔví mǐtɔn e ɖò Otavalo lɛ é ɖò te kpɔ́n gbeta e kɔn Hwɛɖɔxɔsá Ðaxó ɔ na wá é kpo akpakpa sɔ́ mɛ kpo. Amɔ̌ dìn hwɛ̌ ɔ, alɔ e è dó ye é sù nukún yetɔn mɛ tawun. César e nyí mɛxo agun tɔn ɖò agun Ilumán Quichua tɔn mɛ é ɖɔ: “Jehovah kɛɖɛ jɛn sixu gbɔn tutoblonunu tɔn jí bo na jɛ tagba gegě dó mɛ kpɛɖé tamɛ.”

 Mɛɖesínhwɛmɛtɔ́ ɖěɖee ɖ’alɔ ɖo xó enɛ mɛ lɛ é bǐ wɛ nyí Kúnnuɖetɔ́ Jehovah tɔn, bɔ é víví nú ye ɖɔ ye má nǔ e ye tuùn ɖò sɛ́n linu lɛ é vɔ̌nu. É ɖò mɔ̌ có, hwɛyiylɔ́ lɛ, nǔsisɔ́ nú ye kpo hunjijɛ dó mɛɖée jí ɖò hwɛɖɔxɔsa ɔ kpo ɖu hwenu kpo akwɛ kpo. Mɛɖesínhwɛmɛtɔ́ mǐtɔn lɛ kpo nɔví ɖevo lɛ kpo zán ganxixo 380 jɛji dó sɔnǔ nú xó e ye na ɖɔ dó jɛhun dó mɛɖée jí lɛ é, bo lɛ́ zán ganxixo 240 dó lilɛ wema e sín hudo ye ɖó ɖò hwɛɖiɖɔ Mɛxique tɔn hwenu lɛ é dó gbè ɖevo mɛ. Mɛɖesínhwɛmɛtɔ́ e gbɔn gbɛ̀ ɔ bǐ mɛ lɛ é ɖibla yì 40 wɛ zán ganxixo kanweko mɔ̌kpan dó hwɛ Équateur tɔn ɔ mɛ. Nɛ̌ mǐ ka kpéwú bo kpé nukún dó akwɛzinzan e é byɔ bɔ è jɛhun dó nɔví mǐtɔn lɛ jí é wu gbɔn? Nǔ e a nɔ na gbɔn wlɛnwín vovo e è tinmɛ ɖò donate.dan124.com jí lɛ é gblamɛ lɛ é wɛ nyí tɔn. É na cɛ́ nú we nú alɔhundónanǔmɛ towe.