Mɛ gègě nɔ dɔn nǔ ɖɔ mǐ kún sixu tuùn nǔ ɖě dó jixwé wu ó, ɖó mɛɖé kún gosin dɔ̌n kpɔ́n bo na ɖekúnnu na ó. Loɔ, linlin enɛ ɔ sɔgbe ǎ. Jezu Klisu ko nɔ gbɛ̀ ɖò jixwé bo nyí nùɖíɖó gbigbɔ tɔn ɖé cobo wá ayikúngban jí. É ɖɔ nú sinsɛngán lɛ céɖécéɖé ɖò agbawungba ɖò xwè kanweko nukɔntɔn ɔ mɛ ɖɔ: “Un jɛte sín jixwé, bo na bló jlǒ ce ǎ; loɔ, nǔ e jló mɛ e sɛ́ mì dó ɔ bló gbé un ja bo wá.” Enɛ wu ɔ, nùjɔnǔ ɖɔ nú mɛsɛ́dó tɔn lɛ wɛ Jezu ɖè hwenu e é ɖɔ xó elɔ é: “Nɔtɛn gègě wɛ ɖò Tɔ́ ce xwé.”​—Jaan 6:38; 14:2.

Jezu sín Tɔ́ ɔ wɛ nyí Mawu, bɔ nyikɔ tɔn nɔ nyí Jehovah, bɔ Jehovah sín “xwé” ɔ, jixwé wɛ é ɖè. (Ðɛhan 83:18, nwt) Enɛ wu ɔ, mɛɖebǔ sixu jlɛ́ lee jixwé cí é sɔ Jehovah Mawu kpo Jezu Klisu kpo ǎ. Ye ɖè nǔ gègě xlɛ́ dó jixwé wu gbɔn nǔmimɔ jiwǔ e ye bló bɔ gbejinɔtɔ́ ɖé lɛ mɔ é gblamɛ.

Xota e bɔ d’ewu é ɖɔ xó dó akpáxwé Biblu tɔn e tinmɛ nǔ e gbɛtɔ́ lɛ mɔ ɖò nǔmimɔ ɖé lɛ mɛ é jí. Hwenu e a na ɖò nǔmimɔ enɛ lɛ gbéjé kpɔ́n wɛ é ɔ, flín ɖɔ fí e nùɖíɖó gbigbɔ tɔn lɛ nɔ nɔ é kún nyí nǔ hɛn kpo alɔ kpo ɖé alǒ nùɖé bɔ è sixu mɔ ɖó nukún wu ó. Mɔ̌ mɛ ɔ, Mawu zán xógbe e nǔɖiɖó gbigbɔ tɔn lɛ kɛɖɛ na mɔ nukúnnú jɛ wu é dó tinmɛ nǔ lɛ nú mǐ ǎ, é nyɔ́ wà ɔ, é zán xógbe e mɛ mǐ sixu mɔ nukúnnú jɛ lɛ é dó tinmɛ lee jixwé cí é ɖò nǔmimɔ lɛ mɛ. Nǔmimɔ enɛ lɛ na d’alɔ we bɔ a na mɔ nukúnnú jɛ ye mɛ e nɔ nɔ “nɔtɛn gègě” e ɖò jixwé lɛ é wu.