Talie ko lotātou Tupu’aga e poto ake ia tātou. Ko le Tamana e ’alofa mo tokaga kia tātou. Na le’ese fakatupu tātou ke tou ma’uli lau’ātea meiate ia. (Selemia 10:23) E aoga ke tou takitaki e ia ofaipe se toe e taki e ona mātu’a. (Isaia 48:17, 18) Ko pelesepeto i le Tosi-Tapu ko le ne’a ’alofa na soli mai e le ’Atua. Lau ia 2 Timoteo 3:16.

Ko lao mo pelesepeto a Seova ke ako’i ai le ma’uli e mālie i aso anei, mo fakasā mai pe fefe’aki le ma’ua o tapuakina le’egato i le ka ’au. Talie na fakatupu tātou e le ’Atua tie tonu ke tou muli’i lana takitaki. Lau ia Pesalemo 19:7, 11; Apokalipisi 4:11.

E kese a ia mo le lao. Ko le pelesepeto ke tou iloa ai le ne’a e loto ki ai le ’Atua i ni ne’a e kesekese lona fai. Ko le lao e fakatotonu mai le ne’a e tonu ke fai. (Teutelonome 22:8) Fakakaukau’i le pelesepeto Fakatosi-tapu ke ke matala ki le tonu ka ke aga o fai. (Māsau Fakatā 2:10-12) Ofaipe lona tosi i le Tosi-Tapu ko le ma’uli ko le ne’a ’alofa o le ’Atua. E tokoi mai le pelesepeto ki lau ga’oi, mo lou loto fale mo lau fe’ano’aki i le motoka ki ni pule’aki mo ou puipui mei tu’utamaki. Lau ia Ga’oi 17:28.

Na māsau a Sesu ki pelesepeto mā’uiga tafito e lua. Le uiga mā’oki o le ma’uli o le tagata ko le iloa o le ’Atua, le ’alofa, le tausi agatonu kiate ia. Ti ke takitaki tātou e le ’uluaki pelesepeto aia mokā tou fai ’ia  se tonu. (Māsau Fakatā 3:6) Ko lātou alā e ma’uli’i ’ia anā pelesepeto e lotou ma’ua ’ia a felogoi mālie mo le ’Atua, mo le fiafia mā’oki ti mo le ma’uli le’egato. Lau ia Mateo 22:36-38.

Ko le lua pelesepeto e taki ’ia tātou ke tou felogoi mālie mo le kakai. (1 Kolinito 13:4-7) E tonu ke tou faifaitaki ki le ’Atua fela’aki mo le kakai o ma’uli’i anā pelesepeto. Lau ia Mateo 7:12; 22:39, 40.

Ko pelesepeto a Seova mo ako’i o famili ke fakatasi mo fe’alofani. (Kolose 3:12, 14) E puipui a famili i le ako’i o pelesepeto ke tologa le nofo āvaga. Lau ia Senesi 2:24.

Ko pelesepeto Fakatosi-tapu e puipui ai lotātou ma’uli fakakoloa ke mālie. O sakinake ko se patolo e mālie kiate ia se tasi e ga’oi fakaagatonu i lana fakalogo ki le Folafola a le ’Atua. (Māsau Fakatā 10:4, 26; Epeleo 13:18) E ako’i tātou e le Tosi-Tapu ki le ma’uli fakafe’auga, ti mo fakamu’amu’a a tātou felogoi mo le ’Atua i koloa fakamālama. Lau ia Mateo 6:24, 25, 33; 1 Timoteo 6:8-10.

Ko le ma’uli’i o pelesepeto Fakatosi-tapu e puipui ai lotātou malolo fakatino. (Māsau Fakatā 14:30; 22:24, 25) Ko lao a le ’Atua e fesagai ki le inu kava fakavale e puipui ai tātou mei masaki veveli mo tu’utamaki. (Māsau Fakatā 23:20) E fakataga e Seova le inu o se gā kava kae fakapotopoto. (Pesalemo 104:15; 1 Kolinito 6:10) Ko pelesepeto Faka’atua e fua mālie lana ako’i tātou ke tou tokaga ki ātou aga mo ātou manatu. (Pesalemo 119:97-100) Ko le kau Kilisiteano mā’oki e lotou faka’apa’apa ki lao Faka’atua o le’ese tupu ke ma’ua ai ni mālie kae lotou fakamā’uiga’i a Seova. Lau ia Mateo 5:14-16.