TOƁƁERE 40
Ko honno wonirten laaɓuɓe yeeso Alla ?
Si neene no ɓornude paykun mun gorun conci fii yahugol ka lekkol o wattanay yila si paykun kun lootike e si conci makko ɗin no laaɓi e no moƴƴi. Ɗun no moƴƴani cellal makko ngal e no holla kadi mawɓe makko ɓen no kippude moƴƴa fii makko. Ko wano non kadi, Yahuwah Alla, Ben men yiɗuɗo en on, no faalaa yo en wonu laaɓuɓe : ka ɓanndu, ka ɓernde e ka kuuɗe. Si en woni laaɓuɓe, ɗun nafay en e ɗun teddinay Yahuwah Alla.
1. Ko honno wonirten laaɓuɓe ?
Yahuwah Alla yamiri en : « Wonee laaɓuɓe » (1 Petruusu 1:16). Laaɓal no firi wonugol laaɓuɓe ka ɓanndu, ka ɓernde e ka kuuɗe. En wonay laaɓuɓe ka ɓanndu si en lootike soono woo e si conci men ɗin no laaɓi e no moƴƴi. Suudu men ndun e otowal men ngal kadi no haani laaɓude nder e ɓaawo e piiji ɗin fow no haani mooɓindireede. Mo kala e men no waawi taweede fii lootugol Fottirde men nden. Si en wonii laaɓuɓe, ɗun teddinay Yahuwah Alla (2 Korenti 6:3, 4).
2. Fii wonugol laaɓuɓe, ko jikkuuji honɗi haanuɗen wikkaade ?
Deftere Alla nden no wi’i ko laaɓi pos : « laɓɓinoɗen e kala ko tuuninta ɓanndu ndun e [miijo ngon, NWT] » (2 Korenti 7:1). Ko ɗun waɗi, hiɗen haani wikkaade kala huunde ko tuuninta ɓanndu men ndun, ɓernde men nden maa miijo men ngon. Miijooji men ɗin no haani welude Yahuwah Alla e hiɗen haani waɗude kala ko waawuɗen fii wikkagol miijooji ɗi haanaa (Zabuura 104:34). Hiɗen haani wattande yila kadi no haalirten non (janngee Koloosi 3:8).
Ko honɗun kadi tuuninta ɓanndu men ndun e miijo men ngon ? Piiji wano fiimugol sigareeti, wuufugol tankoro, ƴettugol doroogu maa lekkeele ko bonnata hakkile men. Ko ɗun waɗi en haanaa waɗude ɗun. Si en wikkike ɗii piiji, en heɓay cellal moƴƴal e en hollay hiɗen teddini ngurndan. En wakkiloto moƴƴa wonugol laaɓuɓe ka miijo e ka ɓernde e hoore selugol jikkuuji bonɗi ɗi laaɓaa wano jiiɓugol awra mun e ndaarugol pornografi (Zabuura 119:37 [VPFJ] ; Efeesi 5:5). Welaa fii selugol ɗii jikkuuji bonɗi, kono Yahuwah Alla no waawi en wallude (janngee Isaaya 41:13).
LUGGINEE
Ndaaree fii honɗun wonugol laaɓuɓe ka ɓanndu no teddina Yahuwah Alla e anndee kadi honno selirten kuuɗe bonɗe.
3. Wonugol laaɓuɓe ka ɓanndu no teddina Yahuwah Alla
Si en janngii sariyaaji ɗi Yahuwah Alla jonnunoo jamaa Isra’iila on, en annday no laaɓal jamaa makko on hittirani mo. Janngee Eggudu ndun 19:10 e 30:17-19 (VPFJ) e yewton fii ɗee lanndaale :
-
Ko honɗun ɗee ayeeje janni en no Yahuwah Alla miijori fii laaɓal ?
-
Ko honɗun haanuɗen waɗude soono woo fii wonugol laaɓuɓe ka ɓanndu ?
Wonugol laaɓuɓe ka ɓanndu e laɓɓingol piiji men ɗin welaa fii. Kono hiɗen haani waɗude ɗun ka wonuɗen woo hay si hiɗen mari jawdi maa en alaa. Fijinee VIDIO on e yewton fii lanndal jokkitungal ngal.
-
Ko honno laaɓal e mooɓindirgol piiji ɗi maruɗen teddinirta golle men ɗen fii waajagol ?
4. Ko honno waawirten selude jikku bonngu ?
Yahuwah Alla no waawi en wallude fii selugol kala jikku bonngu.
Si hiɗon fiimude maa hiɗon ƴettude doroogu, hiɗon anndi no satti accitugol ɗun. Ko honɗun wallata on ? Ndaaree no nguu jikku battinirta on. Janngee Matta 22:37-39 e yewton fii no fiimugol sigareeti, wuufugol tankoro maa ƴettugol doroogu battinirta...
-
weldigal goɗɗo ngal e Yahuwah Alla.
-
ɓeynguure makko nden e kawtal makko ngal.
Eɓɓindanee accitugol jikku bonngu a. Fijinee VIDIO on.
Janngee Filipii 4:13 e yewton fii ngal lanndal :
-
Ko honno toragol Alla, janngugol Deftere Alla nden e tawegol ka pottite soono woo wallirta goɗɗo fii selugol jikku bonngu ?
5. No wikkorten miijooji bonɗi e kuuɗe bonɗe
Janngee Koloosi 3:5 e yewton fii ɗee lanndaale :
-
Ko honno anndirɗen pornografi, sexting b e jiiɓugol awra mun laaɓaa yeeso Yahuwah Alla ?
-
E miijo mon, no haani ka Yahuwah Alla yamira en wonugol laaɓuɓe ka miijo, ka ɓernde e ka kuuɗe ? Fii honɗun ?
Anndee no wikkorton miijooji bonɗi. Fijinee VIDIO on.
Annabi Iisaa huutorno misal hollungal en hiɗen haani fewjude fii no woniren laaɓuɓe ka ɓernde e ka kuuɗe. Janngee Matta 5:29, 30 e yewton fii ngal lanndal :
-
Fii kala Annabi Iisaa wi’aali yo en waɗu hoore men ko boni, kono o wi’uno yo en waɗu fii no woniren laaɓuɓe. Ko fewjoore tiiɗunde honnde waaweten ƴettude fii wikkagol miijooji ɗi laaɓaa c ?
Si hiɗon hittini tertagol miijooji bonɗi, hiɗon waawi fellitude Yahuwah Alla yi’ay wakkilaare mon nden. Janngee Zabuura 103:13, 14 (VPFJ) e yewton fii ngal lanndal :
-
Si hiɗon gerdude e jikku bonngu, ko honno ɗee aayeeje wallirta on ?
E si on yiltike e jikku bonngu ? Wota on terto, wakkilee !
« Ɓay mi waawataa, mi selay ! » Ko non woɓɓe miijortoo si ɓe yiltike e jikku bonngu. E piide misal, wonaa fii dogoowo no feggii yani waɗata o ronka foolugol maa o fuɗɗitoo. Ko wano non kadi, si on yiltike e jikku bonngu wonaa wa si on ronkay selugol ɗun. E ɗun ittataa wakkilaare mon nden fii foolugol ngun jikku bonngu. Fow no yana. Ɗun no tawaa e heɓugol ɓantal. Wota on selu ! Yahuwah Alla wallay on wikkagol ngun jikku bonngu.
WOƁƁE GOO NO WI’A : « Mi woowi, mi waawataa selude ! »
-
Ko aaya hommbo huutorton fii hollugol e hoore ballal Yahuwah Alla ngal goɗɗo no waawi selude jikku bonngu ?
RAWNOODE
En weltinay Yahuwah Alla si en wonii laaɓuɓe ka ɓanndu, ka miijo, ka ɓernde e ka kuuɗe.
Ndartannde
-
Fii honɗun hino hitti wonugol laaɓuɓe ?
-
Ko honno wonirten laaɓuɓe ka ɓanndu ?
-
Ko honno wonirten laaɓuɓe ka miijo e ka kuuɗe ?
TASKEE
Ko piiji honɗi waawoton waɗude fii wonugol laaɓuɓe hay si tawii ko on baaso ?
Waajuuji moƴƴi fii selugol sigareeti.
Anndee bone pornografi.
« Pornografi : no wondi e bone kaa aldaa e bone ? » (Suudu Aynirdu ndun, 1 ut 2013)
Anndee honno gorko goo selirnoo pornografi.
« Mi fogino nde laaɓi buy ado mi foolude » (Suudu Aynirdu ndun n° 4 2016)
a Ka senngo « Taskee », winndannde nden « Ko honno selirton fiimugol ? » okkay on waajuuji kelɗuɗi fii selugol ɗun.
b Sexting no firi naɓugol piiji ɗii laaɓaa (winndannde, fotoo maa vidio) rewrude telefon, smatfon, tablet maa ordinateer.
c Fii no goɗɗo selirta jiiɓugol awra mun, ndaaree « Ko honno goɗɗo accirta jiiɓugol awra mun ? » ka simoore 25 deftere inneteende « Lanndaale sukaaɓe e jiwɓe : jaabaaji nafayɗi » [Senngo 1].
