BIBLIA MLI ŊMALƐI NI AGBALA MLI
Mose Klɛŋklɛŋ Wolo 1:1—“Shishijee Lɛ, Nyɔŋmɔ Bɔ Ŋwɛi Kɛ Shikpɔŋ Lɛ”
“Shishijee lɛ, Nyɔŋmɔ bɔ ŋwɛi kɛ shikpɔŋ lɛ.”—1 Mose 1:1, Jeŋ Hee Shishitsɔɔmɔ.
“Shishijee mli lɛ Nyɔŋmɔ bɔ ŋwɛi kɛ shikpɔŋ.”—1 Mose 1:1, Ga Biblia Momo.
Nɔ Ni 1 Mose 1:1 Lɛ Tsɔɔ
Sane ni jeɔ Biblia lɛ shishi nɛɛ tsĩɔ anɔkwalei enyɔ komɛi ni he hiaa lɛ atã. Klɛŋklɛŋ lɛ, etsɔɔ akɛ “ŋwɛi kɛ shikpɔŋ lɛ,” loo je lɛ ni wɔnaa lɛ yɛ shishijee. Nɔ ni ji enyɔ lɛ, Nyɔŋmɔ ni bɔ.—Kpojiemɔ 4:11.
Biblia lɛ etsɔɔɔ afii abɔ ni eho nɛ kɛjɛ be ni Nyɔŋmɔ kɛbɔ je lɛ, ni etsɔɔɔ bɔ ni abɔ lɛ ahã lɛ hu mli fitsofitso. Shi etsɔɔ mli akɛ, Nyɔŋmɔ tsɔ ‘ehewalɛ ni etãaa, kɛ ehe ni wa waa lɛ’ nɔ ebɔ je lɛ—Yesaia 40:26.
Atsɔɔ wiemɔ ni ji “bɔ” lɛ shishi kɛjɛ Hebri feemɔ wiemɔ ni akɛtsuɔ nii ahãa nɔ ko ni Nyɔŋmɔ bɔ lɛ mli. a Yɛ Biblia lɛ mli lɛ, Yehowa b Nyɔŋmɔ pɛ atsɛ lɛ akɛ Bɔlɔ.—Yesaia 42:5; 45:18.
Saji Ni Kɔɔ 1 Mose 1:1 Lɛ He
Mose klɛŋklɛŋ wolo lɛ klɛŋklɛŋ kuku lɛ kpa sane ni wieɔ adebɔɔ he lɛ hiɛ yɛ yitso kome kɛ enyɔ lɛ mli. Kɛjɛ 1 Mose 1:1 lɛ kɛyashi 2:4 lɛ, Biblia lɛ wie bɔ ni Nyɔŋmɔ bɔ je lɛ kɛ nibii fɛɛ ni yɔɔ wala mli, ni klɛŋklɛŋ nuu kɛ yoo lɛ fata he lɛ he kuku. No sɛɛ lɛ, Biblia lɛ tsɔɔ bɔ ni Nyɔŋmɔ bɔ klɛŋklɛŋ nuu kɛ yoo lɛ ehã lɛ mli jogbaŋŋ.—1 Mose 2:7-25.
Mose klɛŋklɛŋ wolo lɛ tsɔɔ akɛ ehé Nyɔŋmɔ “gbii” ekpaa kɛbɔ je lɛ kɛ nibii fɛɛ ni yɔɔ mli. Gbii ekpaa nɛɛ jeee gbii ni eko fɛɛ eko hiɛ ŋmɛlɛtswaa 24, shi moŋ eji be kpalaŋŋ ni aleee. Anɔkwa, wiemɔ ni ji “gbi” lɛ baanyɛ akɔ gbii krokomɛi ahe, jeee ŋmɛlɛtswaa 24 pɛ he. Wɔnaa enɛ he nɔkwɛmɔnɔ yɛ 1 Mose 2:4 lɛ, jɛmɛ lɛ akɛ “gbi” kɛ “be” fɛɛ tsu nii kɛdamɔ shi kɛhã gbii ekpaa ni Nyɔŋmɔ kɛbɔ ade lɛ fɛɛ akɛ eba yɛ “gbi” kome nɔ.
Susumɔ Ni Ejaaa Ni Ahiɛ Yɛ 1 Mose 1:1 Lɛ He
Susumɔ ni ejaaa: Nyɔŋmɔ bɔ je lɛ afii akpei fioo komɛi ni eho nɛ.
Anɔkwa sane: Biblia lɛ etsɔɔɔ be ni abɔ je lɛ. Sane ni yɔɔ 1 Mose 1:1 lɛ eteee shi ewooo sane ni jeŋ shikpalɔi ni yɔɔ ŋmɛnɛ lɛ wieɔ akɛ je lɛ eye aaafee afii akpekpe toi akpei abɔ lɛ. c
Susumɔ ni ejaaa: 1 Mose 1:1 lɛ tsɔɔ akɛ Nyɔŋmɔ lɛ, Nyɔŋmɔi etɛ ni efee ekome loo Trinity ni, ejaakɛ Hebri wiemɔ ni akɛdamɔɔ shi kɛhãa “Nyɔŋmɔ” lɛ pii feemɔ ji nɔ ni akɛtsu nii yɛ biɛ lɛ.
Anɔkwa sane: Hebri wiemɔ ni atsɔɔ shishi akɛ “Nyɔŋmɔ” lɛ ji ’Elo·himʹ. ’Elo·himʹ, nɛɛ ji nakai wiemɔ lɛ pii feemɔ shi edamɔɔɔ shi kɛhãaa mɛi abɔ, moŋ lɛ edamɔ shi kɛhã agbojee loo anunyam. The New Catholic Encyclopedia lɛ kpɛlɛɔ nɔ akɛ ’Elo·himʹ ni akɛtsu nii yɛ 1 Mose 1:1 lɛ ji “wiemɔ lɛ pii feemɔ, ni be fɛɛ be lɛ akɛtsuɔ nii ahãa mɔ kome, ni tsɔɔ akɛ aawie anunyam pii feemɔ he shi jeee yibɔ, taakɛ yɛ blema lɛ kɛ́ maŋtsɛmɛi miiwie lɛ, amɛkɛ wiemɔ wɔ tsuɔ nii kɛkɔɔ amɛhe fe nɔ najiaŋ ni amɛkɛ mi baatsu nii lɛ.”—Second Edition, Kpo 6, baafa 272.
Kanemɔ 1 Mose yitso 1 lɛ, eshishigbɛ niŋmai ni akɛgbala mli lɛ kɛ ŋmalɛi ni atsɛ yisɛɛ ni kɔɔ he lɛ.
a HCSB Study Bible lɛ kɛɛ yɛ wiemɔ nɛɛ he akɛ: “Hebri feemɔ wiemɔ bara’, ni shishi ji ‘abɔ lɛ,’ etsɔɔɔ nɔ ko ni gbɔmɔ fee. No hewɔ lɛ, akɛ bara’ tsɔɔ nɔ ko ni Nyɔŋmɔ fee lɛ pɛ.”— Baafa 7.
b Yehowa ji Nyɔŋmɔ gbɛ́i diɛŋtsɛ.—Lala 83:18.
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Ani Nyɔŋmɔ Tsɔ Sutsakemɔ Nɔ Ebɔ Nibii Srɔtoi Ni Wala Yɔɔ Amɛmli Lɛ?
Nɔ ko kwraa bɛ Biblia lɛ mli ni teɔ shi ewoɔ jeŋ shikpalɔi ni kɛɔ akɛ adebɔɔ nibii lɛ eko fɛɛ eko yɛ henɔi lɛ.
BIBLIA TSƆƆMƆI NI HE HIAA WAA
Ani Abɔ Je Lɛ?
Mɛi pii nuuu nɔ ni Biblia lɛ kɛɔ yɛ bɔ ni fee ni je lɛ ba shihilɛ mli lɛ shishi jogbaŋŋ, loo amɛsusuɔ akɛ eji sane ko ni afo atã. Ani wɔbaanyɛ wɔhe nɔ ni Biblia lɛ kɛɔ lɛ wɔye?
BIBLIA TSƆƆMƆI
Nibii Kɛhã Biblia Kasemɔ
Okɛ nibii ni afee kɛhã Biblia kasemɔ ni baahã otsui anyɔ omli beni okaseɔ nii, ni baawo bo hewalɛ hu lɛ atsu nii kɛkase Biblia lɛ.
BIBLIA TSƆƆMƆI
Kaa Wɔ-Biblia Kasemɔ Lɛ Okwɛ
Biblia kasemɔ ni baafee sanegbaa ni mɔ ko baawa bo; aheee shika.
