Yehowa Odasefoi shiɛɔ sanekpakpa lɛ ni amɛtsuɔ nitsumɔi krokomɛi hu ni he hiaa kɛyeɔ amɛbuaa mɛi yɛ shikpɔji ni fa fe 200 anɔ. Shi shikpɔji nɛɛ ateŋ 35 pɛ nyɛɔ amɛwoɔ amɛ diɛŋtsɛ amɛnibii ahe nyɔmɔ. Hewɔ lɛ, te afeɔ tɛŋŋ anáa shika kɛwoɔ nyɔji ni shikpɔji krokomɛi ni eshwɛ lɛ bɔɔ kɛtsuɔ amɛjamɔ nifeemɔi kɛ nibii krokomɛi lɛ ahe nii lɛ?

 Yehowa Odasefoi A-Gbɛtsɔɔmɔ Kuu lɛ susuɔ nibii ni kɛ́ Yehowa Odasefoi ni yɔɔ je lɛŋ fɛɛ lɛ anine shɛ nɔ lɛ ebaaye ebua amɛ ni amɛja Yehowa Nyɔŋmɔ ni amɛshiɛ sanekpakpa lɛ hu ahe. Asusuɔ shika abɔ ni aná kɛ nibii ni esa akɛ atsu lɛ ahe jogbaŋŋ ni akɛ shika lɛ tsuɔ nii yɛ hiɛshikamɔ mli. Kɛji asafo lɛ nitsumɔhe nine ni yɔɔ maŋ ko nɔ lɛ nine shɛ oniai anɔ, ni oniai nɛɛ nyɛ etsu amɛhiamɔ nii ahe nii ni eko shwɛ yɛ sɛɛ lɛ, amɛkɛhãa ni akɛyeɔ abuaa maŋ ni shika ni amɛná lɛ faaa lɛ, ni amɛkɛtsu amɛhiamɔ nii ahe nii. Ato gbɛjianɔ nɛɛ koni akɛnyiɛ nɔkwɛmɔnɔ kpakpa ni mra beiaŋ Kristofoi lɛ fee lɛ sɛɛ, amɛfee nakai kɛye ebua amɛhe “koni nibii aŋmɛ pɛpɛɛpɛ.” (2 Korintobii 8:14) Amɛkɛ amɛnibii ni amɛná ni eshwɛ lɛ ye ebua kɛtsu Kristofoi krokomɛi ni ehia amɛ lɛ ahiamɔ nii ahe nii.

 Te wɔnyɛmimɛi ni ená yelikɛbuamɔi kɛjɛ nitsumɔhe niji krokomɛi amli lɛ nuɔ he amɛhãa tɛŋŋ? Akɛ nɔkwɛmɔnɔ lɛ, yɛ Tanzania, ni maŋ lɛ mli bii fã kpotoo náaa shika ni naa shɛɔ GHS 11 amɛye gbi kome lɛ, akɛ shikai ni nitsumɔhe niji komɛi kɛyeɔ amɛbuaa maji krokomɛi lɛ yasaa Maŋtsɛyeli Asa ni Mafinga asafo lɛ kpeɔ yɛ mli lɛ. Mafinga asafo lɛ ŋma akɛ: “Kɛjɛ be ni asaa Maŋtsɛyeli Asa nɛɛ, mɛi ni baa asafoŋ kpee lɛ ayi efa fe tsutsu lɛ! Wɔmiida Yehowa asafo lɛ kɛ wɔnyɛmimɛi ni yɔɔ je lɛŋ hei srɔtoi lɛ fɛɛ ashi jogbaŋŋ yɛ ejurɔ ni amɛfee wɔ nɛɛ hewɔ, ejaakɛ amɛhã wɔná jamɔhe fɛfɛo tamɔ nɛkɛ.”

 COVID-19 tsɛŋemɔ hela nɛɛ hewɔ lɛ, niyenii he ebahia wɔnyɛmimɛi ni yɔɔ Sri Lanka lɛ ateŋ mɛi komɛi. Nyɛmiyoo ko ni atsɛɔ lɛ Imara Fernando lɛ kɛ ebi nuu fioo ko ni atsɛɔ lɛ Enosh lɛ fata mɛi nɛɛ ahe. Shi shika kɛ nibii ni nyɛmimɛi ni jɛ maji krokomɛi anɔ kɛyeɔ amɛbuaa lɛ hewɔ lɛ, anyɛ atsu amɛhiamɔ nii lɛ ekomɛi ahe nii ahã amɛ. Naa nɔ ni amɛŋma yɛ kaadi ko nɔ kɛjie amɛhiɛsɔɔ kpo, amɛŋma akɛ: “Wɔmiida wɔnyɛmimɛi ni jie suɔmɔ ni tamɔ nɛkɛ kpo amɛtsɔɔ wɔ yɛ jaramɔ bei nɛɛ amli lɛ ashi waa diɛŋtsɛ. Anɔkwa, eŋɔɔ wɔnaa waa akɛ wɔfata weku nɛɛ he, ni wɔbaaya nɔ wɔsɔle wɔbi Yehowa koni eye ebua wɔnyɛmimɛi krokomɛi fɛɛ yɛ naagbee gbii nɛɛ amli.”

 Ekɔɔɔ he eko he ni wɔnyɛmimɛi lɛ yɔɔ yɛ je lɛ mli lɛ, amɛmiisumɔ ni amɛkɛ nibii ni amɛyɔɔ lɛ ahã koni akɛye abua mɛi krokomɛi. Akɛ nɔkwɛmɔnɔ lɛ, Enosh fee susu adeka bibioo ko koni kɛfee lɛ, ejɛ mli etsu onia ni akɛye abua wekui krokomɛi ni ehia amɛ lɛ. Nyɛmiyoo Guadalupe Álvarez hu jie su ni tamɔ nakai nɔŋŋ kpo. Eyɛ Mexico he ko ni ohiafoi titri yɔɔ jɛi. Fɛɛ sɛɛ lɛ, ejɛɔ shika fioo ni enáa lɛ mli etsuɔ onia kɛyeɔ ebuaa asafo lɛ. Eŋma akɛ: “Miida Yehowa shi yɛ ejurɔ ni efeɔ lɛ kɛ esuɔmɔ ni tsakee lɛ hewɔ lɛ. Mile akɛ, akɛ oniai ni mitsuɔ lɛ baafata mɛi krokomɛi anɔ he koni akɛye abua wɔnyɛmimɛi ni amɛyaje fimɔ shihilɛi amli lɛ.”

 Nitsumɔhe niji ni kɛ shikai yayeɔ amɛbuaa nitsumɔhe niji krokomɛi lɛ yɛ he miishɛɛ akɛ amɛbaafee nakai. Anthony Carvalho ni sɔmɔɔ akɛ nitsumɔhe nine ajinafoi akuu mli nyo yɛ Brazil lɛ wie akɛ: “Wɔnitsumɔhe nine lɛ hi shi afii saŋŋ ni oniai ni wɔtsuɔ lɛ shɛɛɛ wɔnibii ahe nitsumɔ, hewɔ lɛ ajɛɔ oniai ni maji krokomɛi tsuɔ amli ayeɔ abuaa wɔ. Yelikɛbuamɔ nɛɛ hewɔ lɛ, wɔsɔɔmɔ nitsumɔ lɛ shwere waa. Amrɔ nɛɛ wɔshika gbɛfaŋ shihilɛ etsake, ehi agbɛnɛ, hewɔ lɛ wɔnyɛɔ wɔyeɔ wɔbuaa maji komɛi. Wɔnyɛmimɛi lɛ kɛ amɛjwɛŋmɔ yaa bɔ ni atsuɔ shiɛmɔ nitsumɔ lɛ ahãa yɛ jeŋ fɛɛ lɛ nɔ ni amɛkwɛɔ nɔ ni amɛbaanyɛ amɛfee kɛye amɛbua akɛ Kristo kaselɔi ni kɛ amɛhe miishã afɔle.”

 Mɛni ji gbɛ ni hi fe fɛɛ ni Yehowa Odasefoi baanyɛ atsɔ nɔ amɛye amɛbua amɛnyɛmimɛi Odasefoi krokomɛi ni eyaje fimɔ shihilɛ mli lɛ? Jeee ni amɛkɛ shika amaje nitsumɔhe niji ni yɔɔ maŋsɛɛ lɛ tɛ̃ɛ, moŋ lɛ amɛbaanyɛ amɛtsu onia kɛfĩ jeŋ muu fɛɛ nitsumɔ lɛ sɛɛ. Obaanyɛ okɛ shika ayawo adeka ni akadi he akɛ onia kɛhã “Jeŋ Muu Fɛɛ Nitsumɔ” lɛ mli. Akɛ adekai nɛɛ mamɔɔ Maŋtsɛyeli Asai lɛ anɔ, loo obaanyɛ okɛmaje kɛtsɔ donate.dan124.com lɛ nɔ. Wɔhiɛ sɔɔ oniai srɔtoi fɛɛ ni otsuɔ lɛ waa diɛŋtsɛ.