Yesu miitsɔɔ nii yɛ Yudea lolo. Agbɛnɛ lɛ, ewie nɔ ko ni ewaaa akɛ mɛi ni boɔ lɛ toi lɛ baana nɔ ni etsɔɔ lɛ​—ewie gwantɛŋi kɛ gwantɛŋi atsũi ahe. Shi ekɛ nɔkwɛmɔnɔ tsu nii kɛwie etsɔɔ amɛ. Ekolɛ Yudafoi lɛ baakai David wiemɔi nɛɛ: “Yehowa ji mikwɛlɔ, nɔ ko nɔ ko ehiaŋ mi. Ehãa mibuɔ shi yɛ lɛɛhei ni yɔɔ frɔ̃frɔ̃.” (Lala 23:1, 2) Yɛ Lala kroko mli lɛ, David fɔ̃ nine etsɛ Israel maŋ lɛ akɛ: “Nyɛhãa wɔkulaa shi yɛ Yehowa, wɔ-Bɔlɔ lɛ hiɛ. Ejaakɛ lɛ ji wɔ-Nyɔŋmɔ, ni wɔji elɛɛhe lɛŋ mɛi kɛ edɛŋ toi.” (Lala 95:6, 7, Ga Biblia hee) Hɛɛ, kɛjɛ jeeŋmɔ lɛ, akɛ Israelbii ni yɔɔ Mla lɛ shishi lɛ toɔ gwantɛŋi akuu he.

“Gwantɛŋi” nɛɛ yɛ “gwantɛŋi atsũ” mli, kɛ́ shishinumɔ lɛ akɛ afɔ amɛ awo Mose Mla kpaŋmɔ lɛ shishi. Mla lɛ fee tamɔ afabaŋ ko ni afo awo amɛhe, ni no hã amɛtse amɛhe kɛje mɛi ni bɛ Mla gbɛjianɔtoo nɛɛ shishi, ní feɔ nibii gbohii lɛ ahe. Shi Israelbii lɛ ekomɛi fee Nyɔŋmɔ tooku lɛ niseniianii. Yesu wie akɛ: “Lɛɛlɛŋ, lɛɛlɛŋ, miikɛɛ nyɛ akɛ, mɔ ni tsɔɔɔ shinaa lɛ mli kɛboteee gwantɛŋi atsũ lɛ mli, shi moŋ etsɔɔ he kroko ekwɔɔ kɛboteɔ mli lɛ, nakai mɔ lɛ, julɔ kɛ ofɔ̃yelɔ ji lɛ. Shi mɔ ni tsɔɔ shinaa lɛ mli kɛboteɔ mli lɛ, lɛ ji gwantɛŋi lɛ akwɛlɔ.”​—Yohane 10:1, 2.

Ekolɛ mɛi lɛ baasusu akɛ sane nɛɛ kɔɔ mɛi ni kɛɔ akɛ Mesia, loo Kristo lɛ ji amɛ lɛ ahe. Mɛi nɛɛ tamɔ julɔi kɛ ofɔ̃yelɔi loo mɛi ni haa mɛi anii. Esaaa akɛ mɛi lɛ nyiɛɔ shishiulɔi nɛɛ asɛɛ. Moŋ lɛ, esa akɛ amɛnyiɛ “gwantɛŋi lɛ akwɛlɔ” lɛ sɛɛ. Yesu wie mɔ nɛɛ he akɛ:

“Shinaanaakwɛlɔ lɛ gbeleɔ ehãa mɔ nɛ, ni gwantɛŋi lɛ boɔ egbee toi. Ekɛ lɛ diɛŋtsɛ egwantɛŋi lɛ agbɛ́ii tsɛɔ amɛ, ni enyiɛɔ amɛhiɛ kɛjeɔ kpo. Kɛ́ ejie lɛ diɛŋtsɛ egwantɛŋi lɛ fɛɛ kɛje kpo lɛ, enyiɛɔ amɛhiɛ, ni gwantɛŋi lɛ nyiɛɔ esɛɛ, ejaakɛ amɛle egbee. Amɛnyiɛŋ mɔkpɔŋ ko sɛɛ kɔkɔɔkɔ, shi amɛbaajo foi kɛje ehe, ejaakɛ amɛleee mɛikpɔji agbee.”​—Yohane 10:3-5.

Mra mli lɛ, Yohane Baptisilɔ lɛ, ni akɛ lɛ toɔ shinaanaakwɛlɔ he lɛ tsɔɔ akɛ, Yesu ji mɔ ni esa akɛ mfonirifeemɔŋ gwantɛŋi ni yɔɔ Mla lɛ shishi lɛ anyiɛ esɛɛ. Ni gwantɛŋi komɛi ni yɔɔ Galilea kɛ biɛ hu, ni ji Yudea lɛ, ele Yesu gbee. Nɛgbɛ ‘ebaanyiɛ amɛhiɛ kɛya’? Ni mɛni baajɛ esɛɛ ni amɛnyiɛɔ lɛ mli kɛba? Mɛi ni boɔ nɔkwɛmɔnɔ nɛɛ toi lɛ ateŋ mɛi komɛi ahiɛ baafee amɛ yaa, ejaakɛ “amɛnuuu nɔ ni ekɛɔ amɛ lɛ shishi.”​—Yohane 10:6.

Yesu wie akɛ: “Lɛɛlɛŋ, lɛɛlɛŋ, miikɛɛ nyɛ akɛ, miji shinaa kɛhã gwantɛŋi lɛ. Mɛi fɛɛ ni baa ni amɛbakɛɔ akɛ amɛji mi lɛ, julɔi kɛ ofɔ̃yelɔi ji amɛ; shi gwantɛŋi lɛ booo amɛ toi. Miji shinaa lɛ; mɔ fɛɛ mɔ ni tsɔɔ minɔ kɛboteɔ mli lɛ, abaahere eyiwala, ni nakai mɔ lɛ baabote mli, ni ebaaje kpo, ni ebaaná lɛɛnii.”​—Yohane 10:7-9.

Ekã shi faŋŋ akɛ, Yesu miiwie nɔ ko hee he. Mɛi ni boɔ lɛ toi lɛ le akɛ, jeee lɛ ji Mla kpaŋmɔ ni akɛhã afii ohai abɔ ni eho nɛ lɛ naa shinaa. No hewɔ lɛ, ekolɛ eetsɔɔ akɛ, gwantɛŋi ni “enyiɛɔ amɛhiɛ kɛjeɔ kpo” lɛ baayabote gwantɛŋi atsũ kroko mli. Ni mɛni baajɛ mli kɛba?

Yesu tee nɔ etsɔɔ nɔ ni etsuɔ lɛ mli akɛ: “Miba koni amɛná wala ni amɛná ni eteke nɔ. Miji tookwɛlɔ kpakpa lɛ; tookwɛlɔ kpakpa lɛ ŋɔɔ ewala eŋmɛɔ shi ehãa gwantɛŋi lɛ.” (Yohane 10:10, 11) Yesu etsɔ hiɛ eshɛje ekaselɔi lɛ amii akɛ: “Nyɛkashea gbeyei, tooku bibioo, ejaakɛ nyɛ-Tsɛ lɛ ekpɛ mli akɛ ebaaŋɔ Maŋtsɛyeli lɛ ehã nyɛ.” (Luka 12:32) Anɔkwa, “tooku bibioo” lɛ mli bii lɛ ji mɛi ni Yesu nyiɛɔ amɛhiɛ kɛyaa gwantɛŋi atsũ hee ko mli koni “amɛná wala ni amɛná ni eteke nɔ” lɛ. Eji jɔɔmɔ kpele akɛ mɔ ko aaafata tooku nɛɛ he!

Shi Yesu kɛ sane lɛ waaa jɛmɛ. Ewie akɛ: “Miyɛ gwantɛŋi krokomɛi ni jɛɛɛ tsũ nɛɛ mli; esa akɛ mikɛ nomɛi hu aba mli, ni amɛbaabo migbee toi,  ni amɛbaatsɔ tooku kome yɛ tookwɛlɔ kome shishi.” (Yohane 10:16) “Gwantɛŋi krokomɛi” nɛɛ “jɛɛɛ tsũ nɛɛ mli.” Belɛ, amɛjɛ tsũ kroko mli, ni esoro tsũ nɛɛ yɛ “tooku bibioo” lɛ ni baaná Maŋtsɛyeli lɛ nɔ lɛ he. Esoro hiɛnɔkamɔ ni gwantɛŋi akui enyɔ ni yɔɔ tsũi srɔtoi enyɔ nɛɛ amli lɛ ateŋ eko fɛɛ eko yɔɔ. Kɛ̃lɛ, gwantɛŋi ni yɔɔ tsũi enyɔ lɛ fɛɛ mli lɛ baaná nɔ ni Yesu tsuɔ lɛ he sɛɛ. Ekɛɛ akɛ: “Enɛ hewɔ ni Tsɛ lɛ sumɔɔ mi lɛ, ejaakɛ miŋɔ miwala miŋmɛ shi.”​—Yohane 10:17.

Asafoku lɛ ateŋ mɛi babaoo wie akɛ: “Eyɛ daimonio, ni eye sɛkɛ.” Kɛ̃lɛ, amɛteŋ mɛi krokomɛi hu hã ana akɛ amɛmiibo nɔ ni ewieɔ lɛ toi jogbaŋŋ, ni amɛmiisumɔ ni amɛnyiɛ Tookwɛlɔ Kpakpa lɛ sɛɛ. Amɛwie akɛ: “Jeee mɔ ni yɔɔ daimonio wiemɔi nɛ. Ani daimonio ko baanyɛ agbele shwilafoi ahiŋmɛii?” (Yohane 10:20, 21) Ekã shi faŋŋ akɛ, amɛmiitsɔɔ nuu ni afɔ lɛ shwilafo ní Yesu tsa lɛ mra mli lɛ.