1. Kouman Labib-a ka palé di vré lanmou-a ?

 « FLANM lanmou, a difé, a flanm Ja-a b. Pyès gro dlo pa pouvé étenn lanmou-a é pyès larivyè pa pouvé charyé l’ » (Chant de S. 8:6, 7). Men bèl kozé asou vré lanmou-a ! Sa paròl-ya ka rasiré mouché ké madanm : yé lanmou pouvé fò.

2. Kisa mouché ké madanm divèt fè pou yé lanmou pa fébli ?

² Si mouché ké madanm lé yé lanmou rété fò jiktan yé mouri, yé divèt fè éfòr. Annou pran èkzanp roun difé. I pouvé kontinyé boulé pou tout-tan, mé a pou mété bwa pou i pa mouri. Si to pa ka fè sa, i ké mouri. Menm fason-an, lanmou i gen ant roun mouché ké so madanm pouvé rété fò pou tout-tan. Mé yé gen bagaj pou yé fè. Détan, mouché ké madanm pouvé trouvé ki yé lanmou pa fò kou anvan. A sa ki ka rivé parèkzanp lò yé ka jwenn problèm soumaké, problèm lasanté ouben lò yé gen timoun pou lévé. Si to maryé, kouman to pouvé anpéché « flanm Ja-a » mouri ? Annan sa artik-a, nou ké wè trwa bagaj to pouvé fè pou to kontinyé gen roun lanmityé ki fò ké to mouché ouben to madanm, é pou to viv ké li ké tchò kontan c.

3. Poukisa nou ka di ki si mouché ké madanm gen roun lanmityé ki fò ké Jéova, sa ké idé yé kontinyé kontan yé konpanyen ? (Ecclésiaste 4:12 ; gadé zimaj-a osi).

³ Pou yé pa lésé « flanm Ja-a » mouri, mouché kou madanm divèt fè tousa yé pouvé, pou rété pròch ké Jéova. Kouman sa lanmityé-a pouvé idé yé annan yé maryaj ? Lò  mouché ké madanm ka bay yé lanmityé ké yé Papa ki annan syèl-a bokou valò, yé ka pran plézi swiv so konsèy. Konsa, yé ka véyé pou yé pa trapé problèm ki pouvé fè yé lanmou fébli, ouben si yé ka jwenn sa problèm-yan, yé ka réglé yé (li Ecclésiaste 4:12). Anplis di sa, sa-ya ki gen roun lanmityé ké Jéova ki fò, ka fè tousa yé pouvé osi pou imité li. Yé ka chaché gen bèl kalité kou bonté, pasyans ké mizérikòrd (Éph. 4:32 – 5:1). Lò mouché ké madanm gen sa bèl kalité-ya, yé lanmou ka grandi fasilman. Lena, roun sò ki maryé dipi pasé 25 lannen, ka di : « Sa fasil pou kontan épi rèspèkté roun moun so lanmityé ké Jéova fò. »

4. Poukisa Jéova chwazi Jozèf ké Mari pou yé sa papa ké manman sa-la ki té ké divini Mési-a ?

⁴ Annou pran roun èkzanp annan Labib-a. Roun jou, Jéova té gen pou chwazi roun mouché ké so madanm pou yé divini papa ké manman sa-la ki té ké divini Mési-a. Annan tout pitit di pitit David, i chwazi Jozèf ké Mari. Poukisa ? Paské yé toulédé té gen roun lanmityé ki té fò ké li. É Jéova té savé ki yé té ké mété li an prémyé annan yé maryaj. Si to maryé, kisa èkzanp Jozèf ké Mari pouvé anprann to ?

5. Kisa èkzanp Jozèf pouvé anprann mouché-ya ki maryé ?

⁵ Jozèf té ka fè sa Jéova té ka di li fè ké plézi, é a pou sa a té roun bon mari. O mwen trwa fwa, Jéova di li fè bagaj pou so fanmi. Chak fwa, i obéyi lanmenm, menm si sa té lé di ki i té divèt fè gro chanjman (Mat. 1:20, 24 ; 2:13-15, 19-21). Kou i fè sa Jéova té ka doumandé li, Jozèf protéjé Mari é i pran swen di li. Jozèf té ka obéyi Jéova, é sa dèt fè Mari gen plis lanmou ké rèspè pou li. Zòt ki mari, zòt pouvé imité Jozèf, épi chaché konsèy annan Labib-a asou fason pou zòt pran swen di zòt fanmi d. Si zòt ka swiv sa konsèy-ya, menm si sa lé di fè gro chanjman, zòt ké montré zòt lanmou pou zòt madanm, é lanmou zòt gen roun pou ròt ké vin pi fò. Roun sò ki ka rété Vanwatou, é ki maryé dipi pasé 20 lannen, ka di : « Lò mo mari ka chaché konsèy Jéova é ka swiv yé, mo gen plis rèspè pou li. Mo ka santi mo an sékirité, é lò i ka pran roun désizyon, mo ka fè li konfyans. »

6. Kisa èkzanp Mari pouvé anprann madanm-yan ?

⁶ Mari té gen so pròp rélasyon ké Jéova ; so lafwa pa té ka dépann di lafwa Jozèf. I té byen konnèt Ékritir-ya (gadé nòt pou Luc 1:46). É i té ka pran tan réfléchi asou Paròl Bondjé-a (Luc 2:19, 51). Kou  i té zanmi Jéova, i té sa roun bon madanm, asiré pa pitèt. Jòdla, roun patché madanm ka éséyé fè kou li. A sa Emiko ka fè. I ka di : « Lò mo pa té maryé, mo té gen mo program èspirityèl. Mé lò nou maryé, mo randé mo kò kont ki mo lafwa té ka koumansé dépann di lafwa mo mari : a li ki té ka priyè pou nou é a li ki té ka dirijé tout ròt bagaj èspirityèl-ya. Alòr mo konprann ki mo té divèt poté mopa charj, sa lé di pran swen di mo lanmityé ké Jéova. Donk, aprézan, mo ka chwazi roun moman pou mo rété mo rounso ké mo Bondjé — pou mo priyè l’, pou mo li so Paròl, épi pou mo réfléchi asou sa i ka di » (Gal. 6:5). Madanm, sonjé ki si zòt ka kontinyé fè zòt lanmityé ké Jéova vin pi fò, zòt mari ké kontan zòt ankò plis, é yé ké félisité zòt ankò plis (Prov. 31:30).

7. Kouman èkzanp Jozèf ké Mari ka idé mouché ké madanm konprann ki sa enpòrtan pou yé adoré Jéova ansanm ?

⁷ Jozèf ké Mari té ka travay ansanm pou yé fè yé lanmityé ké Jéova rété fò. Yé té ka konprann ki sa té enpòrtan pou tout fanmi-a adoré Jéova ansanm (Luc 2:22-24, 41 ; 4:16). Sa pa té divèt fasil, èspésyalman lò yé koumansé gen plis timoun, mé yé rivé fè l’. Men roun bèl èkzanp pou mouché ké madanm-yan jòdla ! Si zòt gen timoun, kou Jozèf ké Mari, pitèt zòt ka trouvé sa rèd di alé annan réinyon-yan épi étidyé Labib-a ké zòt fanmi. É pitèt sa ankò pi rèd pou zòt trapé tan pou étidyé ké priyè zòt toulédé. Mé, pa bliyé ki lò zòt ka adoré Jéova ansanm, zòt ka vin pi pròch di li é pi pròch di zòt konpanyen. Alòr mété zòt ladorasyon pou Jéova an prémyé annan zòt lavi.

8. Si yé maryaj ka pran dlo, kisa mouché ké madanm pouvé fè pou yé pran plis plézi étidyé Labib-a ansanm ?

⁸ Kisa zòt pouvé fè atò si zòt gen problèm annan zòt maryaj ? Pitèt zòt pa anvi pasé tan ansanm ka étidyé Labib-a. Si a sa, pou koumansé, zòt pouvé étidyé roun ti moso tan sèlman, épi chwazi roun sijè zòt toulédé kontan é zòt toulédé lé étidyé. Sa ké pouvé fè zòt lanmou vin pi fò épi zòt ké plis anvi adoré Jéova ansanm.

9. Poukisa roun mouché ké so madanm divèt pasé tan ansanm ?

⁹ Zòt pouvé osi fè zòt lanmou rété fò lò zòt ka pasé tan ansanm. Si zòt ka fè sa, sa ké idé zòt rété pròch épi kontinyé savé sa zòt mouché ouben zòt madanm ka pansé é sa i ka rousanti (Gen. 2:24). Gadé sa Lilia ké Rouslan konprann vitman apré yé maryaj, i gen pasé 15 lannen. Lilia ka di : « Nou randé nou kò kont ki nou té krè ki nou té ka pasé bokou tan ansanm, mé a pa té sa. Ké travay-a, ké tout travay i gen pou fè annan kaz-a, épi pita ké timoun-yan, lajournen-an té ka pasé vit. Nou konprann ki si nou pa té ka pasé tan ansanm, nou pa té ké rété pròch. »

10. Kouman mouché ké madanm pouvé swiv prensip ki annan Éphésiens 5:15, 16 ?

¹⁰ Kisa mouché ké madanm pouvé fè pou yé sir yé ké pasé tan ansanm ? Yé ké divèt prévwè pasé tan ansanm, yé toulédé (li Éphésiens 5:15, 16). Uzondu, roun frè ki ka rété Nijérya ka bay nou so sigré : « Lò mo ka fè mo program, mo ka mété kitan nou ké pasé tan ansanm nou rounso, mo ké mo madanm, é pou  mo, sa moman-yan ka pasé an prémyé » (Phil. 1:10). Gadé osi kouman Anastasia, madanm roun rèsponsab sirkonskripsyon an Mòldavi, ka byen itilizé so tan. I ka di : « Mo ka éséyé fè sa mo gen pou fè lò mo mari ka okipé di bagaj pou asanblé-ya. Konsa, pita, nou pouvé pasé tan ansanm. » Mé kisa zòt pouvé fè si zòt program tèlman plen ki sa rèd pou zòt trapé tan pou pasé ké zòt mouché ouben zòt madanm ?

11. Ki bagaj Akilas ké Prisil té ka fè ansanm ?

¹¹ Mouché ké madanm maryé pouvé anprann bokou gras a Akilas ké Prisil, roun mouché ké so madanm bokou krétyen annan 1^é syèk-a té byen kontan (Rom. 16:3, 4). Labib-a pa ka di bokou bagaj asou yé, mé i ka di ki yé té ka travay, yé té ka préché é yé té ka idé ròt-ya, ansanm (Actes 18:2, 3, 24-26). Anfèt, chak fwa i ka palé di Akilas ké Prisil, yé toujou ansanm.

12. Kisa roun mari ké so madanm pouvé fè pou yé pasé plis tan ansanm ? (gadé zimaj-a osi).

¹² Kouman mouché ké madanm pouvé imité Akilas ké Prisil ? Sonjé tout bagaj zòt gen pou fè. Ès i gen bagaj zòt pouvé fè ansanm olyé zòt fè yé chak moun yé bò ? Akilas ké Prisil té ka préché ansanm. Ès zòt menm osi zòt ka òrganizé zòt kò pou zòt fè l’ souvan ? Anplis di sa, Akilas ké Prisil té ka travay ansanm. Pitèt zòt pa ka travay menm koté-a, mé, ès zòt pouvé fè travay zòt gen pou fè annan kaz-a ansanm ? (Eccl. 4:9). Pi zòt ké idé zòt konpanyen, pi zòt ké santi ki zòt sa roun ékip, é zòt ké gen lokazyon palé ansanm. Men sa Robert, ki maryé ké Linda dipi pasé 50 lannen, ka di : « Franchman, nou pa gen lokazyon anmizé ansanm souvan, mé lò mo ka fè lavésèl épi mo madanm ka swiyé lavésèl-a, ouben lò mo ka raché mové zèrb épi i ka vin travay ké mo, mo tchò kontan. Lò nou ka fè bagaj ansanm, nou ka vin pi pròch. É nou lanmou ka vin pi fò. »

13. Kisa mouché ké madanm divèt fè pou yé vréman pròch ?

¹³ Mé, menm si mouché ké madanm ansanm annan menm koté-a, sa pa lé di ki yé ké vin pi pròch. Roun sò ki maryé é ki ka rété Brézil ka di : « Jòdla, nou gen tèlman bagaj pou fè ki sa fasil di krè ki, kou nou ka rété annan menm kaz-a, nou ka pasé tan ansanm. Mé mo randé mo kò kont ki menm si nou ansanm, sa pa asé. Mo divèt pran tan osi pou mo mari. » Bruno ké so madanm Tays, ka pran tan osi pou yé konpanyen. Bruno ka di : « Lò nou ka pasé tan ansanm, nou ka mété nou téléfonn asou koté, épi nou ka profité di moman-an nou ka pasé ansanm. »

14. Si roun mouché ké so madanm pa kontan pasé tan ansanm, kisa yé pouvé fè ?

 ¹⁴ Mé, kisa pou zòt fè si zòt pa kontan pasé tan ansanm ? Pitèt zòt pa kontan menm bagaj-ya, ouben zòt ka faché fasilman lò zòt ansanm. Kisa pou zòt fè atò ? Annou roupran èkzanp difé-a. Lò to ka limen l’, a pòkò roun gran difé. Piti piti, to divèt mété plis bwa annan l’. Menm fason-an, to pouvé pasé déztrwa ti moman ké to mouché ouben to madanm chak jou. Chwazi fè roun bagaj zòt toulédé kontan ; pa fè anyen ki pouvé lévé blo (Jacq. 3:18). Konsa, piti piti, zòt ké rivé viré limen difé lanmou-a.

15. Poukisa mouché ké madanm divèt montré ki yé ka rèspèkté yé konpanyen si yé lé yé lanmou rété fò ?

¹⁵ Rèspè-a enpòrtan annan roun maryaj. A kou lò to ka vanté roun difé charbon pou i boulé pi fò. Si to pa ka vanté l’, difé-a pouvé mouri vit. Menm fason-an, si mouché ké madanm pa gen rèspè roun pou ròt, yé lanmou ké fébli vit. Parkont, si yé ka fè éfòr pou montré ki yé ka rèspèkté yé konpanyen, yé lanmou ké rété fò. Mé pa bliyé ki sa ki pi enpòrtan, a pa lò to krè ki to ka rèspèkté to mouché ouben to madanm, mé, a savé si to mouché ouben to madanm ka santi to ka rèspèkté l’. Men sa Penny, ki maryé ké Aret dipi pasé 25 lannen, ka di : « Kou nou ka montré ki nou ka rèspèkté nou konpanyen, i gen roun bon anbyans lakaz. Nou pouvé palé kou nou lé, paské nou savé ki sa nou ka di gen valò pou ròt-a. » Alòr, kisa to pouvé fè pou to mouché ouben to madanm santi ki to ka rèspèkté l’ vréman ? Annou pran èkzanp Abraam ké Sara.

16. Kisa mari-ya pouvé anprann gras a Abraam ? (1 Pierre 3:7 ; gadé zimaj-a osi).

¹⁶ Abraam té ka montré Sara ki i té ka rèspèkté l’. I té ka tchenbé kont di sa i té ka pansé, é i té ka rèspèkté sa i té ka rousanti. Roun jou, Sara té enkyèt bokou, i di Abraam tousa i té gen asou so tchò, é i jis akizé l’. Ès Abraam faché kont li ? Non. I té savé ki Sara té sa roun madanm ki té ka soumèt so kò, é ki i toujou té ka idé l’. I kouté l’, épi i éséyé réglé problèm-an (Gen. 16:5, 6). Kisa sa ka anprann nou ? Mari, zòt gen otorité pou pran désizyon pou zòt fanmi (1 Cor. 11:3). Mé zòt ké montré zòt kontan zòt madanm si zòt ka byen kouté sa i gen pou di anvan zòt pran roun désizyon, èspésyalman si sa ké mennen chanjman pou li (1 Cor. 13:4, 5). É lò zòt madanm èstrésé, ouben i bézwen di sa i ka rousanti, kouman zòt ka réyaji ? Ès  zòt ka rèspèkté sa i ka rousanti, é ès zòt ka pran tan byen kouté l’ ? (li 1 Pierre 3:7). Angela, ki maryé ké Dmitry dipi près 30 lannen, ka di sa so mari ka fè pou i santi i ka rèspèkté l’ : « Lò mo nèrvé, mo dékourajé, ouben mo jis bézwen palé, Dmitry toujou paré pou kouté mo. I ka pran pasyans ké mo, menm lò mo pa ka palé jantiman. »

17. Kisa madanm-yan pouvé anprann gras a Sara ? (1 Pierre 3:5, 6).

¹⁷ Sara té ka rèspèkté Abraam ; a pou sa i té ka soutni l’ lò i té ka pran désizyon (Gen. 12:5). Roun jou, plizyèr moun rivé koté Abraam. I désidé bay yé manjé. I doumandé Sara arété sa i té ka fè épi préparé roun patché dipen (Gen. 18:6). Sara soutni désizyon Abraam é i koumansé travay lanmenm. Madanm, zòt pouvé imité Sara lò zòt ka soutni désizyon zòt mari ka pran. Si zòt ka fè sa, zòt maryaj ké vin pi fò (li 1 Pierre 3:5, 6). Dmitry nou palé annan ròt paragraf-a, ka di sa so madanm ka fè pou i santi ki i ka rèspèkté l’ : « Mo kontan wè kouman Angela ka fè éfòr pou soutni mo désizyon menm si i pa dakò ké mo. É si finalman mo pa pran miyò désizyon-an, i pa ka kritiké mo. » Sa tèlman pi fasil di kontan roun moun ki ka rèspèkté nou !

18. Si roun mouché ké so madanm ka fè tousa yé pouvé pou yé lanmou rété fò, ki bénédiksyon yé ké trapé ?

¹⁸ Satan ka éséyé fè mouché ké madanm krétyen arété kontan yé konpanyen. I savé ki, si mouché ké madanm pa kontan yé konpanyen ankò, yé ka riské lésé Jéova. Mé anyen pa pouvé toufé vré lanmou-a ! Donk, a pou lanmou zòt gen pou zòt mari ouben zòt madanm fò kou lanmou yé ka palé annan liv Chant de Salomon-an ! A pou zòt toulédé byen désidé mété Jéova an prémyé annan zòt maryaj, a pou zòt trapé tan pou pasé ké zòt mouché ouben zòt madanm, épi rèspèkté sa i ka rousanti é sa i bézwen. Si a sa zòt ka fè, zòt maryaj ké bay Jéova, Sa-la koté vré lanmou-a ka soti, lònò. É kou roun difé ki gen asé bwa, zòt lanmou ké rété fò pou tout-tan.