Jéova ka doumandé nou kontan roun kalité : « lanmou fidèl-a » (Mika 6:8, nòt). A roun bagaj ki enpòrtan toubonnman annan maryaj-a, paské si i pa gen fidélité i pa gen konfyans. É a pou i gen konfyans pou lanmou-a louvri kou roun flèr.

Jòdla, sa rèd pou bokou moun rété fidèl annan maryaj-a. Pou protéjé ou maryaj, a pou ou byen désidé swiv sa dé konsèy-ya nou ké wè aprézan.

SA LABIB-A KA DI : « Konprann ki bagaj ki pi enpòrtan » (Philippiens 1:10). Ou maryaj annan sa ki pi enpòrtan annan ou lavi. I divèt annan sa ki ka vini an prémyé pou ou.

Jéova lé ou montré ou mari ouben ou madanm ki i gen valò pou ou é i lé ki ou profité di lavi-a ké li (Ecclésiaste 9:9). I ka byen èspliké ou ki ou pa janmen divèt néglijé ou mari ouben ou madanm. Ou divèt fè tousa ki fo pou fè li gen tchò kontan (1 Corinthiens 10:24). A pou ou fè ou mari ouben ou madanm santi ki ou bézwen li é ki ou kontan l’.

SA OU POUVÉ FÈ :

• A pou ou pran tan fè dé bagaj ké ou mari ouben ou madanm é bay li tout latansyon i bézwen.

• Lò ou ka réfléchi, sonjé ou pa tousèl ankò, aprézan zòt a dé.

SA LABIB-A KA DI : « Sa-la ki a fòrs kontinyé gadé roun fanm ka koumansé anvi fanm-an ja fè roun adiltèr ké li annan so tchò » (Matthieu 5:28). Si ou ka kontinyé gen mové lidé sèksyèl, a kousidiré ou té ka tronpé ou mari ouben ou madanm.

Jéova ka di ou « protéjé [ou] tchò » (Proverbes 4:23 ; Jérémie 17:9). Pou ou rivé fè sa, a pou ou véyé sa ou ka gadé (Matthieu 5:29, 30). Fè kou Jòb ki té fè roun « alyans » ké so wéy pou i pa té janmen koumansé gadé rounòt fanm ké anvi (Job 31:1). A pou ou byen désidé pa janmen gadé fim ké zimaj malpròp. A pou ou osi byen désidé pa janmen koumansé kontan rounòt moun ki pa sa ou mari ouben ou madanm.

SA OU POUVÉ FÈ :

• Fè ròt-ya byen wè ki a pa ti kontan ou kontan ou mari ouben ou madanm.

• Tchenbé kont di so santiman : arété lanmenm tout frékantasyon ki té ké jennen l’.