Disan-an vréman enpòrtan. Si nou pa té gen disan, pyès moun pa té ké pouvé viv. Kou a li ki Kréyatèr-a, Bondjé gen drwa di kouman nou pouvé itilizé disan-an. Kisa i ka di asou disan-an ? Ès nou pouvé manjé disan ouben asèpté yé bay nou disan pou swanyé nou kò ? Kouman ou pouvé pran bon désizyon asou zafè disan ?

1. Kisa Bondjé ka pansé asou disan-an ?

Jéova di so sèrvitèr-ya tan-lontan : « Lavi tout kalité lachè, a so disan » (Lévitique 17:14). Pou Jéova, disan-an ka réprézanté lavi-a. Si lavi-a sakré, atò, disan-an sakré osi.

2. Ki fason Bondjé pa lé nou itilizé disan-an ?

Anvan asanblé krétyen-an fèt, Bondjé té di so sèrvitèr-ya pa manjé disan (li Genèse 9:4 ké Lévitique 17:10). É apré asanblé krétyen-an fèt, Jéova roubay sa menm koumannman-an pou krétyen-yan. Kolèj santral-a di yé : ‘réfizé pran disan’ (li Actes 15:28, 29).

Kisa sa lé di réfizé pran disan ? Si roun dòktèr té ka di ou pa pran alkòl menm, ou pa té ké alé bwè, a pa vré ? Mé ès ou té ké alé manjé roun bagaj ki gen alkòl annan ouben mété alkòl annan ou venn ? Awa. A té ké menm bagaj-a ki bwè. Menm fason-an, lò Bondjé ka di nou réfizé pran disan-an, sa lé di ki nou pa divèt bwè disan ouben manjé vyann ki pa senyen. Sa lé di osi ki nou pa ké manjé roun bagaj yé mété disan annan l’.

É kisa nou pouvé di asou zafè disan lò a pou swanyé nou kò ? Pou sèrten trètman, nou ka wè lanmenm ki yé pa ka alé ké lalwa Bondjé. Parèkzanp, lò yé lé bay nou disan ouben roun annan so konpozan prensipal-ya : globules rouj-ya, globules blan-yan, plaquettes-ya ké plasma-a. Mé pou ròt trètman sa pi difisil pou wè si yé ka alé ouben si yé pa ka alé ké lalwa Bondjé-a. Parèkzanp, i gen trètman ki ka itilizé sa yé ka aplé fraksyon di roun konpozan prensipal disan-an. I gen tèknik ka itilizé disan moun-an li menm. Annan sa sitiasyon-yan, a chak moun pou désidé sa i ké fè ouben sa i pa ké fè a (gadé nòt-a) (Galates 6:5).

 ANNOU FOUYÉ ANNAN LABIB-A

3. Pran désizyon pou ou lasanté ki ka fè Jéova plézi

Kouman ou pouvé pran désizyon ki ka alé ké fason Bondjé ka wè disan-an ? Gadé VIDÉYO-a, épi kozé asou poukisa sa enpòrtan kouté sa konsèy-ya :

• Priyè pou rousouvwè sajès-a (Jacques 1:5).

• Chaché prensip annan Labib-a ki ka alé ké ou sitiasyon (Proverbes 13:16).

• Chaché savé ki trètman ou pouvé gen koté ou ka rété-a.

• Désidé ki trètman ou pa ké pran menm.

• A pou ou sir ki désizyon ou ka pran-an ka tonbé dakò ké ou konsyans b (gadé nòt-a) (Actes 24:16).

• Byen sonjé ki pyès moun, pa menm ou mari ouben ou madanm, ni roun ansyen ouben moun-an ki ka étidyé Labib-a ké ou, pa divèt di ou ki désizyon pou ou pran lò a roun bagaj ou divèt désidé dapré sa ou konsyans ka di ou fè (Romains 14:12).

• Marké asou roun papyé sa ou désidé fè.

4. Témwen Jéova-ya ka chaché pi bon kalité trètman i pouvé gen

Nou pouvé obéyi lalwa Bondjé asou disan-an é an menm tan rousouvwè bon kalité trètman. Gadé VIDÉYO-a.

Li Tite 3:2, épi kozé asou sa késyon-an :

• Poukisa nou divèt rété kalm épi rèspèkté dòktèr-ya lò nou ka palé ké yé ?

 5. Fraksyon disan-an : Pran ou pròp désizyon

Disan-an fèt ké kat bagaj prensipal : globules rouj-ya, globules blan-yan, plaquettes-ya ké plasma-a. Annan sa kat bagaj-ya, i gen pi piti konpozan yé ka aplé « fraksyon disan c » (gadé nòt-a). Yé ka itilizé roun ran fraksyon pou swanyé maladi ouben pou anpéché roun moun senyen.

Pou zafè fraksyon disan-an, chak krétyen gen pou pran sopa désizyon dapré sa so konsyans i formé gras a Labib-a ka di li fè. Roun ran krétyen ké pitèt réfizé roun trètman ouben roun tèknik koté yé ka itilizé roun ouben plizyèr fraksyon disan-an, mé rounòt ran krétyen ké pitèt asèpté pran sa fraksyon disan-yan.

Anvan ou pran roun désizyon asou zafè fraksyon-yan, doumandé ou kò :

• Kouman mo ké èspliké pou roun dòktèr poukisa mo ka réfizé ouben poukisa mo ka asèpté pran roun ouben plizyèr fraksyon disan-an ?

 SA NOU WÈ

Jéova pa lé nou itilizé disan-an nenpòrt kouman.

Kisa ou anprann

• Poukisa disan-an sakré pou Jéova ?

• Kouman nou savé ki lò Bondjé défann moun pran disan i té ka palé osi di mété disan annan nou venn ?

• Kisa ki ké idé ou pran bon désizyon annan zafè itilizé disan-an pou swanyé ou kò ?