Iraman Ana Tia Kakoaua Iehova aika ko kinaia? Tao tabeman mai buakora boni kaain rarikim, raom ni mwakuri, ke raom n reirei. Ke ti bae n tia ni maroro ma ngkoe n te Baibara. Antai raoi ngaira ao e aera ngkai ti tibwaa ara koaua nakoia aomata nako?

Bon aomata ngaira n ai aromi. Ti roko man aaba ao katei aika kakaokoro. Tabeman mai buakora ngkoa boni kaain Aaro tabeua ao tabeman riki a aki kakoauaa te Atua. Ma imwain rikira bwa taani Kakoaua, ti bane ni karekei ara tai n ukeri raoi reirei man te Baibara. (Mwakuri 17:11) Ti kakoauai baike ti reiakini ao imwina ti a karaoi ara motinnano i bon iroura bwa ti na taromauria Iehova ae te Atua.

Ti kakabwaiaaki man reiakinan te Baibara. Ti kekeiaki ribuakoni kangaanga ao ai mamaarara n aroia aomata nako. Ma imwin ara kekeiaki ni maiuakini booto n reirei n te Baibara ni katoabong, ti a noria bwa a a uaana riki ao n raraoi aroaroni maiura. (Taian Areru 128:1, 2) Anne bukina teuana ngkai ti tibwai baika raraoi ake ti a tia n reiakini man te Baibara.

Ti maiuakini booto n reirei man te Baibara. A karikirakea marurungira ao karineaia aomata booto n reirei aika ti reiakin n te Baibara, n ikotaki naba ma bwainakin te kakaonimaki ao te akoi. A boutokaa naba rikirakeni marurungia botannaomata bwa e na uaana aia mwakuri ao ni karikirakea te katiteuanaaki n te utu ao te aroaro ni maiu ae riai. Ngkai ti kakoauaa ae “e aki inanonano te Atua,” ti a kaaina iai te botaki n itaritari n te onimaki ae katobibia te aonnaba ae akea iai te kakaokoroaki n te reeti ao bwaai n tutuki man te tautaeka. E ngae ngke aomata ngaira n aromi, ma ti a riki bwa aomata aika okoro.—Mwakuri 4:13; 10:34, 35.

• Tera ae a titeboo iai Ana Tia Kakoaua Iehova ma aomata nako?

• Baikara booto n reirei ake a a tia n atai taani Kakoaua man reiakinan te Baibara?