“A riai buumwaane n tangiriia buuia n aron tangiran oin rabwataia. Te mwaane ae tangira buuna ao e tangiria naba i bon irouna, bwa akea te mwaane ae ribaa oin rabwatana, ma e wantongaia ma n nabeia.”​—I-EBETO 5:​28, 29.

Te buu te mwaane bon atun te utu. (I-Ebeto 5:23) Ma te buu te mwaane ae raoiroi, e aki riai n iowawa ke n tuamatoa, e rangi ni kakawaki buuna irouna, e rangi n tabeakinna ni karekei bwaai ake e tangiri ao n tabeakina naba nanona. E kataia naba ni kakukureia neiei ao e aki imanonoa karaoan are e bon tangiria ngaia. (I-Biribi 2:4) E kaai ni maroro ma buuna n aki imamaakin ao e ongora raoi nakon te bae taekinna neiei. E aki naba ‘korakora unna’ nakoina ke e batiboia ke n urua nanona.​—I-Korote 3:19.

“E riai te buu te aine ni korakora karineani buuna irouna.”​—I-EBETO 5:33.

Ngkana e karinea buuna te buu te aine ao ni boutokai ana babaire, e na karekea te rau n te utu iai. Ngkana e kairua te mwaane ao e na aki kamangoria neiei ma e na teimatoa n nimamannei ao ni karinerine. (1 Betero 3:4) Ngkana e kani maroroakina te kangaanga teuana ma buuna, e riai n rinea te tai ae nakoraoi ao n taekinna ma te karinerine nakoni buuna.​—Te Minita 3:7.

“Te mwaane . . . e na nim ma buuna ao a na riki n tii te irikona naakai.”​—KARIKANI BWAAI 2:24.

Ngkana e mare te mwaane ao te aine ao a a karaoa iai te reitaki n te utu ae rangi ni kaan. Ngaia are a riai ni mwakuri korakora taanga ibukini kateimatoaani kanakoraoan aia mare, rinanon aia taetaenikawai ao karaoani mwakuri n akoi aika uarereke i marenaia. A riai naba ni kakaonimaki i marenaia n aroia n aki wene ni bure ma temanna riki. Bon akea raoiroin te aki kakaonimaki. E urua te onimakinaki i marenaia taanga ao e kona n urua te utu.​—Ebera 13:4.

“Reireina te teei ni kataneia n te kawai ae riai n nako iai, ao e na bon aki kitanna e ngae ngkana e a kara.”​—TAEKA N RABAKAU 22:6.

E a tia te Atua n angania kaaro tabeia ae reireinaia natiia. E irekereke naba n aei reireinakia aroia, ao katean te katoto ae raoiroi ibukia. (Te Tua-Kaua 6:​6, 7) Ngkana e aki ongotaeka te nati, e aki riai n urarake naba ngkekei te karo ae wanawana. E ‘waekoa n ongora, e iremwe n taetae, ao e iremwe n un’ te karo aei. (Iakobo 1:19) Ngkana e baireia te karo bwa e a riai ni katuuaaea natina, e riai ni karaoia ma te tangira ao e aki riai ni karaoia ma te un.

“Ataei, kam na ongeaba irouia ami karo . . . ‘Karinea tamam ma tinam.’”​—I-EBETO 6:​1, 2.

A riai n ongeaba ataei nakoia aia karo ao n rangi ni kabatiaa karineaia. Ngkana a kaotiota te karinerine ataei nakoia aia karo ao e rangi ni bati iai te kimwareirei ni mwengaia ao a karekea te rau n aia utu ma te kukurei. Naati ake a a ikawai riki, a riai ni karineia aia karo, n taraia raoi bwa a riai n tabeakinaki. E irekereke naba n anne taraakini mwengaia bwa e na onobwaiaki raoi, ao e na tabeakinaki naba kainnanoia ni kaineti ma te mwane.​—1 Timoteo 5:​3, 4.