Ni bwakantaain te Taabati teuana ao a a nako Kenneth ao Filomena, ae a maeka i Curaçao, ni kawara te taanga teuana are a reirei n te Baibara ma ngaiia.

E karaki ni kangai Kenneth: “Ngke ti a roko ao e in te auti ao akea te kaa. Ma iai te bwai ae kairai bwa N na tareboonia neiere te aine.”

E kaekaa ana tareboon neiei ao e kabwarabwaraa are e nako ni mwakuri buuna. Ma ngke e a ataia raoi bwa a a boni mena ikekei naakai, ao e a nako naba n te mataroa ni karinia.

A kona n noria bwa e a tibwa tia n tang. Ngke e nang moana te reirei Kenneth ao ni kaukia n te tataro, ao e a manga tang naba neiei. Ngaia are a a titirakinna bwa tera ae riki.

E kabwarabwaraa neiei bwa n te bwakantaai raoi anne ao e motikia bwa e na bakabureia, e bon tabe ni korea ana reta nakoni buuna ni kaotia ae e na bakabureia ngke e a tii toki naba n tangin ana tareboon Kenneth. E tuangia bwa e a rangi n taonakinako n te rawawata, ngaia are a a tibwai nakoina rongorongo aika karaunano man te Baibara. E oti raoi bwa te kaungaunga anne bon te bwai ni kamaiu.

E taku Kenneth: “Ti karabwaa Iehova ngkai e kariaia bwa ti na buoka te aine ae rangi n rawawata aei, ao riki ngkai e kairira rinanon tao te anera ke Taamneina ae raoiroi, bwa ti na tareboonia!” *

A kakoauaa Kenneth ao Filomena bwa e ibuobuoki Iehova rinanon ana anera ke Taamneina ae raoiroi ke mwaakana ae mwamwakuri? Ke e bon tii manennanti ana tareboon Kenneth?

Ti aki koaua raoi iai. Ma ti ataia bwa e kakabonganaia ana anera te Atua ni buokiia aomata ni kaineti ma te onimaki. N te katoto, e taku te Baibara bwa e kabongana te anera te Atua ni kaira te tia tataekina te rongorongo ae raoiroi ae Biribo, ni buoka te I-Tiobia ae kaain te tautaeka are e kani kaotaaki ni kaineti ma ana onimaki.​—Mwakuri 8:26-31.

Iai Aaro tabeua ake a kaungaa kakoauaan ae iai aeka n anera aika mwaaka. A taku bwa aongkoa iai aika a raoiroi ao a kakaraoa nanon te Atua, ao a riki naba bwa taan tararuaa temanna ma temanna. A bati aomata aika aki tii kakoauaa ae iai anera, ma a kona naba ni buokaki irouia n itera tabeua. Ma a bati naba aika karako aia atatai i aoia anera.

A kangaa ni moan riki? Tera ana reirei te Baibara ibukia anera? A kona ni buokiko? Ti na nenera kakoauaan anne.