ATUN TE MAEKATIN | MIITARA AIKA KAMIMI IBUKINI KARAWA
Titiraki Ibukia Naake A Mena i Karawa
Ko a tia n iaiangoa taekani karawa ao naake a mena iai? Ngkana ko a tia ao bon tiaki tii ngkoe. A a tia aomata n iaiangoa taekan anne i nanoni nga ma nga te ririki. A kakoauaa tabeman bwa e maekanaki karawa irouia ara bakatibu aika riai ni karineaki. Tabeman a kataamneia te tabo ae kakukurei ao e bati iai te rau ae e aranaki bwa karawa, ao e onrake irouia anera ao aomata aika raoiroi ake a a tia ni mate. Ma iai naba tabemwaang ake a iangoa karawa bwa mwengaia atua aika bubua ma bubua te mirion mwaitiia.
A bati aomata aika kauntaekaia bwa ti bon aki kona n ataa te bwai teuana ibukini karawa, ibukina bwa akea ae e a tia n ruo mai iai bwa e na karakina taekana nakoira. Ma e boni kairua te aeka n iango anne. E maeka ngkoa i karawa Iesu Kristo imwain rokona n te aonnaba. E taetae ma te aki wimakiki nakoia mataniwi n Aaro n te moan tienture ni kangai: “I ruo mai karawa tiaki ibukini karaoan oin nanou, ma ibukini karaoan nanon teuare kanakomaiai.” Ngaia are e bon taekini baike e nori ni matana Iesu, ngke e kangai nakoia ana abotoro: “A mwaiti taabo ni maeka n ana auti Tamau.”—Ioane 6:38; 14:2.
Taman Iesu bon te Atua ae arana Iehova, ao e mena i karawa ana “auti” Iehova. (Taian Areru 83:18) Ngaia are bon akea ae e kona ni kabwarabwaraa n te aro ae mataata riki taekani karawa, irarikin Iehova ae te Atua ao Iesu Kristo. A a tia ni kaotii taekani karawa rinanoni miitara aika kamimi ake a kaotii nakoia mwaane aika kakaonimaki.
N te kaongora ae imwina ao e na maroroakinaki iai mwakoron te Baibara ake a kabwarabwarai baike a nori mwaane aikai n taiani miitara tabeua. Ngkana ko rinanoi miitara aikai, ao uringnga are karawa bon te tabo ae e aki kona n noraki ni maata, ao ti aki kona n ringi ke n nori baike a mena iai. Ngaia are n oneani mwin are e na baireia te Atua bwa e na kabwarabwaraa nakoira taekani karawa n aroni kabwarabwaraana ae a tii ota iai kaaini karawa, ae te aro ae ti aki kona n ota iai, e a karaoi miitara ake a na katea taamneini karawa nakoira n te aro ae ti kona n ota iai. A na buokiko miitara aikai n ota irouia naake a mena i karawa ‘n taabo ni maeka aika mwaiti.’
