NGKANA e mate ae ko tangiria, a na bae naba n roko aeka n namakin aika kakaokoro iroum n aron, te nanokawaki ma namakinan te maroaa ao iangoan ae akea uaam. Tao e maraki naba nanom, ko uringaaba, ao ko maaku. Ko bae naba n iaiangoia bwa e manena maiura aei ke e aki.

Karaua nanom bwa te nanokawaki bon tiaki kanikinaean ae ko mamaara. E oti iai kakawakin te aomata ae ko tangiria. Ma e kona n reke kabebeteam man te nanokawaki ae korakora?

E ngae ngke e a taraa n aki kona n toki marakim, ma ko na bae ni kabebeteaki man ibuobuoki aikai:

TAI IANGOIA BWA E RIAI NI WAEKOA N TOKI NANOKAWAKIM

A kakaokoro aroia aomata ao maania n nanokawaki. Ma ngkana ko tang e kona ni bebete iai rawawatan nanom. E taku Vanessa are mwaneweaki mai eta: “I a bon tii tang naba bwa e riai n nako te maraki.” Ao e taku Sofía ae rina ni mate tarina: “E rangi ni kammaraki iaiangoan te baere e riki, kaanga ai aron te maneka ae kaukaki ao ni kaitiakaki. I boni kuri n aki konaa moan te maraki, ma ngkana I tang ao e buokai ni kabebeteai.”

MAROROAKINI AM IANGO AO AM NAMAKIN

E riiriki ae n tabetai ko bae ni kan tiku n tii ngkoe. Ma te nanokawaki bon te uota ae tinebu ngkana ko  uotia n tii ngkoe. E ururing ni kangai Jared ae tebwi ma itiua ana ririki, are e a tia ni mate tamana: “I maroroakini baika I namakini ma aomata. Tao a boo ma ongina au karaki ke a aki, ma e raoiroi ngkana I konaa ni kaotii au namakin.” E taekina naba raoiroini karaoan anne Janice are mwaneweaki n te moani kaongora ni kangai: “I rangi ni bebete n te maroro ma tabemwaang. I namakinna ae a ota aomata n au namakin, ao I ataia ae tiaki tii ngai ni kekeiaki iai.”

BUTIMWAEA TE IBUOBUOKI

E taku temanna te taokita: “Te aomata ae rawawata ae kariaia raoraona ao ana utu bwa a na buokia n te moantai are e [rawawata iai], e taraa ni bebete riki irouna te tokanikai i aon aron nako rawawatana.” Tuangia raoraom te bae a na karaoia ibukini buokam, bwa a bae ni kani karaoia ma tao a aki ataa aroia ni karaoia.​—Taeka N Rabakau 17:17.

KAANIKO RIKI MA TE ATUA

E taku Tina: “Ngke e rina ni mate buu n te kaentia, I aikoa konaa ni kaotii au namakin nakoina aika raba, ngaia are I a taekini nakon te Atua! I moana au bong ni butiia bwa e na buokai rinanon te bong anne. E buokai te Atua n aanga aika bati, aika I a aki konaa n uringi.” E taku Tarsha, ae 22 ana ririki ngke e mate tinana: “Te wareware n te Baibara bon nibwani kabebeteau ni katoabong. E anganganai te bae kaungaunga bwa N na iaiangoia.”

KATAAMNEIA TE MANGAUTI

E reitia ni kangai Tina: “N te moantai I bon aki kabebeteaki n te kantaninga ae te mangauti, ibukina bwa I kainnanoa buu, ao natiu a kainnanoa tamaia n te tai anne. Ma ai aua ngkai te ririki imwina, ao I a nimta te kantaninga anne, bwa kaanga te roobu ni kakamaiu. I iaiangoa te tai are N na manga noria iai, ao karaoan anne e anganai te rau ma te kimwareirei!”

Ko bae n aki waekoa n namakina te kabebeteaki man nanokawakim. Ma te baere e riki nakon Vanessa e kona n rangi ni kabebeteko. E taku neiei: “Iroum e na aki kona n toki nanokawakim, ma ane e na boni kekerikaaki.”

Uringnga are e ngae ngkana ko teimatoa n ururinga te aomata are e a tia ni mate, ma e boni manena maiura aei. Man ana ibuobuoki te Atua, ko kona ni karekea am iraorao ae kakukurei ao te maiu ae manena. Ao n te tai ae e a kaan roko, e na boni kautiia maate te Atua. E tangiria bwa ko na manga kona n irabwati ma te aomata ae ko tangiria. Ao n te tai anne, e nang mauna n aki toki te maraki are titiku iroum!