E TOKI abwakiu ngke ruaiwa au ririki. E riki anne, 34 te ririki n nako i Côte d’Ivoire, ao ni karokoa ngkai, bon tii tenua te buuti abwakiu (1 mita). Ngke e a ataaki te baere riki nakoiu, a kaungaai au karo bwa N na mwakuri korakora bwa I aonga n aki iaiangoa tein rabwatau. I katea taiboran uaanikai i matan ara auti ao I teimatoa n tararua taraaraoina. Anne are a rangi n atikaki iai nanoia naake a roko ni boobwai.

Ni koauana, e aki bitii bwaai ni kabane te mwakuri korakora. I bon teimatoa naba n aki abwabwaki, ao a rangi ni bati au kangaanga e ngae naba ni bwaai aika bebete, n aron rietatan te kaaunta n te titooa. E taraa n ae a karaoaki bwaai ibukia aomata aika e kaniia uoua okiokin abwakiu irouia. I rangi n nanokawaki n te bae riki nakoiu, ma e bitaki anne ngke 14 au ririki.

N te bong teuana, a kabooi uaanikai uoman aine aika Ana Tia Kakoaua Iehova, ao ikanne are a moana naba iai te reirei n te Baibara ma ngai. N te tai ae aki rangi ni maan, I a ataia ae kakawaki riki karekean te atatai ibukin Iehova ma ana kantaninga, nakon te baere riki n rabwatau. E rangi ni karauaki nanou iai. Te kibu ae mamate nanou iai bon Taian Areru 73:28, (BG). E taekinaki ni moan taekan kibun te Baibara anne ae kangai: “E raoiroi i rou te kaania te Atua.”

A mwaing ara utu nako Burkina Faso n te tai ae aki rangi ni maan, ao e a noraki te bitaki ni maiu. I nonoraki i rarikin taiboran te uaanikai irouia kaain rarikira n ara tabo ngkoa i Côte d’Ivoire. Ma I riki bwa te iruwa n ara tabo ae boou, ao e kamimi taraakiu irouia angiina aomata. A mimiakinai aomata ao I a motikia bwa N na titiku i nanon te auti tabeua te wiki. Imwina, I a uringa aron raun nanou are reke mani kaanian Iehova. I kororeta nakon te aobiti n tararua ibukia Ana Tia kakoaua Iehova ike I a kawaraki iroun te mitinare te aine ae mwaatai ae Nani ae iai ana rebwerebwe ae uarereke.

A aki toki ni kamaranran ao ni kaabokaboka n tain te kakarau kawain ara tabo are ti maeka iai. E bati ana tai ni bwaka Nani man ana rebwerebwe ngkana e na kawarai ibukin te reirei, ma e aki bwara nanona. Imwina, e a anga nanona bwa e na anai nakoni bobotaki n taromauri. I ataia ae I riai n ninikoria n otinako man te auti ao n aki bwerengaki ni mimiakinau irouia aomata. Irarikin anne, e na kangaanga riki bweenakin te rebwerebwe ibukina bwa e a rawawata riki  ngkana I toka mai buki. Ma I kakoauaa ni kauouan taekan te kibu are mamate nanou iai ae kangai: “I rinea te Uea ae Iehova ba neu ni kamaiu.”

N taai tabetai, ti bwaka i nanon te bokaboka, ma e materaoi bwa ti bon roko ni botaki n taromauri. Ai kaokorora te mata ni kukurei are I noria n te Tabo n Taromauri ma mimiakinau irouia naake tiaki kaain te ekaretia! I boni bwabetitoaki ruaiwa te namwakaina imwina.

Katenimwakoron au kibu anne ae mamate nanou iai, e kangai: “Ba I aonga n tataekin am makuri ni kabane.” I ataia ae e na bon riki te mwakuri ni minita bwa au kangaanga ae bubura. I teimatoa n ururinga au moantai n uarongorongo man te auti teuana ma teuana. I mimiakinaki irouia ataei ao ikawai, a irirai ao a katotonga aron nakonakou. I rangi ni maraki iai ma I teimatoa ni kauringai ae a kainnanoa naba te Bwaretaiti n aron ae I rangi ni kainnanoia, ngaia are I teimatoa ni waaki.

N te aro bwa a na bebete au mwakuri, I a karekea au bwatika ae kokokaki ae tenua wirana. E kookai rake toau n uarongorongo nako aon te tabuki ao ni kiba n toka i aon te bwatika ike tia buti iai ni bwatete rikaaki. E a riki bwa nibwan te kukurei ae bati te mwakuri ni minita are e kangaanga n te moantai, ao I a anga arau bwa N na urekura bwaiania n 1998.

I kairi reirei aika bati n te Baibara, ao aman mai buakoia a bwabetitoaki. Irarikin anne, e butimwaea naba te koaua ae bon oin tariu! I aki toki ni kaungaaki man ongoraean aia kekeiaki tabemwaang, n te tai are I kainnanoia iai. I karekea te reta mai Côte d’Ivoire, n te tai teuana ngke I a rotakibuaka ni butin te maraeria. I moana te reirei man te Baibara i matan te mataroa ma temanna ataein te kuura ae rietata i Burkina Faso, ao imwina I a manga angan te tari te mwaane temanna. E a manga mwaing ataein te reirei aei nako Côte d’Ivoire. Ai kakukureira ataan ae e a riki ngkai bwa te tia uarongorongo ae tuai bwabetitoaki!

I kangaa ni boutokaai? I reiakinaki te itutu man te botaki teuana are e anga te buoka nakoia mwauku. E nora nanou ni kani mwakuri temanna te tia kairiri ao e taku: “Ti riai n reireiniko karaoan te toobu.” Ao a boni karaoa anne. I karaoi toobu ni mwengau ibukin te uaati ao ibukin te mwenga. A tatangira au toobu aomata ao a tuangia tabemwaang taekana. I kabongana au rebwerebwe ae uarereke ae tenua wirana n nikiri iai toobu.

E kananokawaki bwa n 2004, e a rikirake te maraki man aki nakoraoin riin akuu are bubura, n te aro are I taku irou bwa I a aki riai moa ni bwaiania. E ngae n anne, I teimatoa ni kakorakoraai n uataboa te mwakuri ni minita.

A taku aomata bwa I rangi ni kinaaki ni moangareu ae kakukurei. E bati bukina ngkai I riai ni kukurei, bwa kaanian te Atua bon te bwai ae raoiroi irou.—Ana rongorongo Sarah Maiga.