E tabeakinira raoi Iehova ke e aki bwerengaki ni karawawataaia aomata n te aonnaba aei? A karauaki nanora ni kaekaan te titiraki anne man te Baibara. E bon tabeakinia botannaomata te Atua ao e tangirira bwa ti na kukurei ni maiura. E kariaia bwa a na kakabwaiaaki aomata ao naake a aki kakaitaua naba n taai nako man raoiroina ae rangi ni bati. Iangoi ana taeka te abotoro Bauro.—Wareka Mwakuri 14:16, 17.

E taku Bauro ngke e anga ana taeka n reirei nakoia kaain te kaawa ae Rutetera ake a aki taromauria te Atua: “N taai aika nako, e kariaia te Atua bwa a na karaoa ae a tangiria botannaomata nako, ma e boni kaotiota taekana ni baika raraoi ake e karaoi. E anganingkami te karau mai karawa ao boong ni mari, ao e anganingkami te amwarake ae bati ma ni kaon nanomi n te kimwareirei.” Tera nanon taeka akanne nakoia naake a ongora irouni Bauro?

A rangi ni kai ota kaain Rutetera ni koauan ana taeka Bauro. Boni kaain naba te tabo ae bwainaki iai te ununiki ao a maeka n te aono ae maiureirei tanona ao n aomwaimwai. Ma e kauringia Bauro bwa te Atua bon nibwan te karau ao boongi ni mari. Mangaia are ni katoaa aia tai n taia te uaa ae rangi ni bati ao ni kukurei ni kana te amwarake ae kangkang, a a boni kakabwaiaaki iai man raoiroin te Atua.

A bati reireiara aika kakawaki ibukin Iehova ae te Atua man ana taeka Bauro nakoia kaain Rutetera.

E anganira Iehova te inaomata n rinea ae ti na karaoia. Noria bwa e kariaia aomata man natannaomata nako Iehova bwa “a na karaoa ae a tangiria.” E kamatataaki nanon taeka akanne n te boki teuana ibukia taan rairai n te Baibara bwa “a na karaoa ae a kukurei iai” ke “a na karaoa ae a iangoia bwa te kabanea n tamaroa ibukia.” E aki kairoroia aomata Iehova bwa a na taromauria. E anganira te bwaintituaraoi ae te inaomata n rinea ae ti na karaoia, ae nanonaki iai te kona n rinea aroni maiura.—Te Tua-Kaua 30:19.

E tangirira Iehova bwa ti na kinaa. E kabwarabwaraa Bauro bwa E boni “kaotiota taekana.” E kamatataaki n te boki are mwaneweaki mai eta bwa a kona naba n rairaki taeka akanne ni kangai: “E a tia ni kaotia n te aro ae teretere raoi nakoia aomata bwa te aeka n Atua raa ngaia.” A teretere raoi “aroarona aika aki nonoraki” man ana karikibwai n ikotaki naba ma raoiroina, wanawanana, mwaakana ao ana tangira. (I-Rom 1:20) E a tia Iehova ni kaotii baika bati riki ibukina man te Baibara. (2 Timoteo 3:16, 17) E aki ngkanne mataata bwa e bon tangirira bwa ti na kinaa?

E tangirira Iehova bwa ti na kukurei. E taekinna Bauro bwa E kaon ‘nanora n te amwarake ae bati ao te kimwareirei.’ E kona naba te tia bure ae aki ataa Iehova n amwarake ni karokoa tokin nanona ao ni karekea kimwareireina ae bati ni maiuna. Ma e ngae n anne, e tangirira te Atua bwa ti na karekea te kukurei ni koaua n aki toki. Ao e kona n reke anne, tii ngkana ti reiakina te koaua ibukina ao ni maiuakinna.—Taian Areru 144:15; Mataio 5:3.

Ti bane ni kakabwaiaaki ni katoabong man raoiroin Iehova. E aera ko aki reiakina riki arom ae bati are ko na kona iai ni kaota am kakaitau nakon te Atua are e kaona nanom ‘n te amwarake ae bati ao te kimwareirei’?