E koaua bwa bon te nanobaba iangoan te aomata ae mate bwa e na manga maiu? E aki kakoauaa anne te abotoro Bauro. E korea ae kangai ngke e kairaki rinanon te taamnei ae raoiroi: “Ngkana arona bwa ti tii kantaningaa Kristo n te maiu aei, ao moan te kananoanga ngaira i buakoia aomata nako. Ma e a bon tia ngkai ni kautaki Kristo mai buakoia maate, ae te moan uaa i buakoia te koraki ake a mate.” (1 I-Korinto 15:19, 20) E kakoauaa raoi te mangauti Bauro. N te aro aei, e a kaotaki kakoauaana rinanoni mangautin Iesu. * (Mwakuri 17:31) Anne bukina ae atongaki Iesu irouni Bauro bwa “te moan uaa” ke te moan aomata ae kautaki nakon te maiu are aki toki. Ngkai e moani kautaki Iesu, e na bae n iai ngkanne imwina.

Ibukini kakoauaani mangautin Iesu, nora te boki ae The Bible—God’s Word or Man’s? iteraniba 78-86, ae boreetiaki irouia Ana Tia Kakoaua Iehova.

Aio bukina riki teuana ae ko kona ni kakoauaa te kantaninga ibukin te mangauti. Iehova bon te Atua ae koaua. ‘E aki kona ni kewe te Atua.’ (Tito 1:2) E aki kona ni kewe Iehova ao e aki kona ni karaoa anne. E kona ni beritana te mangauti ma ni kaotia bwa e kona ni kautiia aomata ao imwina, e aki kakoroa nanon are e beritanna? E aki kona ni karaoa anne!

Bukin tera ngke e baireia Iehova bwa iai te mangauti n te tai ae e na roko? Ibukin ana tangira. E titiraki ni kangai Iobi: “Ngkana tao e mate te aomata, ao e na manga maiu ke e aki? Ko na weteai iai, ao I a kaekako: Ane Ko na tangira ana makuri baim iai.” (Iobi 14:14, 15, BG) E kakoauaa raoi Iobi bwa e ingainga ni kautia Tamana ae tatangira are i karawa. E bibitaki te Atua? “I aki bibitaki Ngai ae Iehova.” (Maraki 3:6, BG) E teimatoa te Atua ni kan noriia aomata ake a a tia ni mate bwa a na kautaki ma te marurung ao te kukurei. Bon aei te tai ae a kantaningaia kaaro ibukin natiia are e bua maiuna n te mate. Ni koauana, te kaokoro bwa iai mwaakan te Atua ni karaoa ae e tangiria.—Taian Areru 135:6.

E na angan Natina Iehova te mwaaka ni kaoka te kukurei ae akea tiana nakoia te koraki ake a rawawata ibukini buaia aia koraki ake a tangiriia. Ao tera ana namakin Iesu ibukin te mangauti? Imwaini kautan Rataro iroun Iesu, e bon nora rawawataia mwanen ma raoraon Rataro ao ‘a tiinako rannimatana.’ (Ioane 11:35) N te tai teuana riki, e kaitiboo Iesu ma te aine ae e a tia ni mate buuna ae kaain Nain are e mate natina te mwaane ae tii ngaia. “E korakora nanoangaana [iroun Iesu] ao e taku nakoina: ‘Tai tang.’” N te tai ae waekoa, e a kauta natin neienne. (Ruka 7:13) Ngaia are e korakora rotakin nanon Iesu n te rawawata ao te mate. Ai kukureira nanona ngkana e bita te nanokawaki nakon te kimwareirei ni kabutaa te aonnaba!

Ko a tia n rinanon te rawawata? Ko kona n iangoa te mate bwa te kangaanga ae akea katokana. Ma e boni kona ni katokaki n te mangauti are E na karaoia te Atua rinanon Natina. Uringnga are e tangiriko te Atua bwa ko na nora aroni katokan te mate. E tangiriko bwa ko na mena n te tai anne n rabwatiia am koraki aika tangiraki iroum. Iangoa aron te ikoikotaki ae akea tokina n te tai ae na roko ao n aki manga taekinaki iai te kaboo!

E iango ni kangai Lionel are e taekinaki mai mwaina: “N tokina, I a ataa taekan te mangauti. N te moantai, e kangaanga irou kakoauaana ao I aki naba onimakina te aomata are e kaongoraeai taekana. Ma I noria n te Baibara ao I kunea bwa bon te koaua! E a ingainga nanou ni manga nora tibuu te unimwaane.”

Ko kan ataa ae bati riki? A kukurei Ana Tia Kakoaua Iehova ni kaota nakoim bukina ngkai a kakoauaa raoi te mangauti n te tai ae e na roko.