“E AERA ngkai e riki aei nakoiu? E aera ngkai e aki katoka rikin aei nakoiu te Atua? Aikai titiraki ake e tabeaianga iai Sidnei are 24 ana ririki ae kaain Brazil. Imwin te kabuanibwai are karina n riki nakoina, e a kakabongana ngkai te kaintekateka ae kokokaki.

A kona ni bwara nanoia aomata iroun te Atua n rawawata aika riiriki imwin te kabuanibwai ae karina, te aoraki ae wenemaan, maten ae tangiraki ke kabuanibwai aika bon ririki. E a boni ngae n riiriki aei. E taonaki Iobi n te rawawata are e riki nakoina teuana imwin teuana. E boni kairua ngke e bukina te Atua ni kangai: “I weteiko, ao Ko aki kaekaai: I tei rake, ao Ko tarataraai. Ko rairaki n tiringai: Ko bainikirinai ni korakorani baim.”—Iob 30:20, 21, BG.

E aki ataia Iobi bwa a kangaa n riki karawawata aikai ke bukin rikina nakoina. E kakukurei bwa e reke kabebeteara man te Baibara ni baika riiriki n ikotaki ma arora ni kaaitarai.

E taekinaki n te Baibara taekan te Atua ni kangai: “Moan te raoiroi ana makuri; Ba bon te kaeti-taeka ae riai ana aro ni kabane: Bon te Atua ae kakaonimaki ae akea ana buakaka, E raoiroi ao E eti ngaia.” (Te Tua-Kaua 32:4, BG) Ngkana ngaia anne, e koaua bwa e teimatoa n aki bitaki ke n tabwanin raoi bwa te Atua ae “E raoiroi ao E eti ngaia” are e iangoia bwa a na rawawata aomata ke e na kabonganai kabuanibwai ni katuuaaeia ke ni kaitiakiia iai?

Ni kaitaraan anne, e taekinaki n te Baibara ae kangai: “Ngkana iai ae rinanon te kataaki ao e na aki kangai: ‘I kataaki iroun te Atua.’ Bwa e aki kona ni kataaki te Atua.” (Iakobo 1:13) Ni koauana, ti reiakinna man te Baibara ae te Atua e angania aomata te maiu ae kororaoi n te moantai. E angania moan aomata aika Atam ma Ewa mwengaia ae tamaroa, baika a kainnanoi ni maiuia ao te mwakuri ae rangi ni kakawaki are a na karaoia. E tuangia te Atua ni kangai: “E kakabaiaia nakekei te Atua: ao E taku te Atua nako ia, Kam na bati ni kariki, ao kam na kabatiaingkami, ao kaona aonaba, ao kataea ana kai.” Bon akea riain ae na bwara nanoia Atam ao Ewa iroun te Atua.—Karikani Bwaai 1:28, BG.

E a rangi n raroa maiura ni boong aikai ma te kororaoi. Ni koauana, n rongorongon rimoa ao a bon teimatoa n rawawata aomata ni kabane. E koaua are taekinaki ni kangai: “A teimatoa ni ngirangira ao ni maraki ni karokoa ngkai, bwaai ni kabane aika karikaki.” (I Rom 8:22) Tera ae riki?

Ngkana ti kan ataa rikin te rawawata, ti riai n oki rikaaki nakon te tai are e moan riki iai. A a kairaki Atam ao Ewa iroun te anera ae karitei are e aranaki imwina bwa Tatan te Riaboro, ao a rawa nakon ana kaetieti te Atua ibukin te aroaro ae eti ao ae kairua are kaotaki n te tua ibukia bwa a na aki kana uaan “te kai n ata te raoiroi ma te buakaka.” E tuangaki Ewa iroun te Riaboro bwa a na bon aki mate, n te aro anne e a kabuakakaa iai te Atua bwa aongkoa te tia kewe. E kabuakakaaki naba iroun Tatan bwa e taua te bwai ae raoiroi mairouia ana karikibwai ae te kona ni bairea ae raoiroi ao ae buakaka ibukia. (Karikani Bwaai 2:17, BG; 3:1-6) E taekinna naba bwa e na nakoraoi riki aroia aomata ngkana a aki tautaekanaki iroun te Atua. Mani baikai, e a tabekaki iai te titiraki ae kakawaki ae kangai: E riai n tautaeka te Atua?

E a manga tabeka riki te titiraki te Riaboro. E kabuakakaia aomata bwa a toro iroun te Atua ibukini kakabwaiaaia. E taekina naba Iobi nakon te Atua ni kangai: “Tiaki ko a tia ni karaoa te o n otabaninia, ma ana auti, ma ana bwai ni kabane? . .  Ma Ko na arora baim ngkai, ao ring ana bwai ni kabane, ao e na tataebuakaiko i matam.” (Iobi 1:10, 11, BG) E ngae ngke e taekina anne ibukin Iobi, ma e nanonaki naba ibukia aomata ni kabane, bwa a bane n tangira kakabwaiaaia mairoun te Atua ngkai a toro irouna.

Tera te anga ae kakawaki ibukini kaetani kangaanga? E ataa aroni kaetani kangaanga aikai te Atua ae  wanawana ae aki kona ni kitanira bwa a na bwara nanora. (I-Rom 11:33) E kariaia bwa a na tautaekania aomata i nanon tabeua te tai, ao a na kona ni kakoauaa imwina bwa antai ae raoiroi ana tautaeka.

E kakoauaaki bwa a kabwaka aia tautaeka aomata mani karawawata aika riki n te aonnaba aei ni boong aikai. A a aki tii kabwaka aia tautaeka aomata ni karekea te rau, te mweraoi, te kukurei ma a tia naba ni karikia bwa e na uruaki te aonnaba aei. E a kamatoaaki n aei te koaua ae kakawaki ae taekinaki n te Baibara ae kangai: “Tiaki ana bwai te aomata ae nakonako te kaeti eueutakina.” (Ieremia 10:23, BG) Bon tii ana tautaeka te Atua ae kona ni karekea te rau n aki toki, te kukurei ao te kaubwai nakoia aomata ibukina bwa bon aei ana kantaninga.—Itaia 45:18.

E na kangaa te Atua ni kakororaoa ana kantaninga ibukia aomata? Uringa te tataro are e reiakinia iai taan rimwina Iesu ae kangai: “E bia roko am tautaeka n uea. E na kakororaoaki nanom i karawa ao n te aonnaba naba.” (Mataio 6:10) Eng, e na kamaunai bwaai aika karika te rawawata te Atua n te tai ae baireia. (Taniera 2:44) E nang toki te maiu ni kainnano, te aoraki ao te mate. E taekinaki naba bwa te Atua e na “kamaiuia ane kai nanona ngkana e bubuti.” (Taian Areru 72:12-14, BG) E beritanaki ae kangai n te Baibara: “Ane maeka iai e na aki kangai: ‘I aoraki.’” (Itaia 33:24, BG) Ai karaunanora berita aikai!

Tao 17 te ririki imwin te kabuanibwai are riki nakon Sidnei are e taekinaki ni moan te kaongora aei, ngke e kangai: “I bon tuai mani bukina Iehova ae te Atua n rikin te kabuanibwai, ma n te moantai e boni bwara nanou irouna. E boni bwara nanou n tabetai ao I tang n iangoan arou ngkai I a mwauku. Ma e a tia n reke otau man te Baibara bwa bon tiaki te katuuaa mairoun te Atua te kabuanibwai are riki aei. N aron ae taekinaki n te Baibara ni kangai: “Ma a ti roko naba aia bong, ma aroia aika aki ataki.” E a tia ni kakorakoraaki au onimaki ao au kantaninga.—Te Minita 9:11, BG; Taian Areru 145:18; 2 I-Korinto 4:8, 9, 16.

Ngkana a bwara nanora iroun te Atua, ti buokaki n tokanikai i aon te bwarannano anne ngkana ti iangoa bukina ngkai e aki katoka te rawawata ao baike a riki ma iai. A karauaki nanora bwa te Atua “bon te tia karekei kaniwangaia te koraki ake a kakorakoraia n ukoukoria.” Ane e onimakinna ma te Nati, e na aki bwara nanona.—Ebera 11:6; I-Rom 10:11.