E aki katereaki raoi n te Baibara taekani katokani maiun te aomata ae e a rangi n aoraki. a Ma te bae taekinna ibukin te maiu ao te mate e karekea te kantaninga ae aki tabeitera. E aki kariaiakaki karaoan te bwai teuana ae e na mate iai temanna, ma akea naba te kaetieti ae e riai kananauani maiun te aomata ae e a boni kaani mate.

 E taekinaki te Atua n te Baibara bwa ara tia Karikiriki ae “nibwan te maiu.” (Taian Areru 36:9; Mwakuri 17:28) Moan te kakawaki te maiu i matan te Atua. Ibukin aei ao e kabuakakaaki iroun te Atua katokani maiun temanna ke katokan oini maium. (Te Otinako 20:13; 1 Ioane 3:​15) Irarikina, e kaotaki n te Baibara bwa ti riai n tatauraoi ni kamanoa raoi maiura ao maiuia tabemwaang. (Te Tua-Kaua 22:8) E teretere bwa e tangiria te Atua bwa ti na kawakina raoi te bwaintangira ae te maiu.

Ma tera arona ngkana e a rangi ni mamaara te aomata?

 E aki kariaiakaki n te Baibara katokani maiun temanna e ngae ngke e a bon rangi ni kaani mate. E oti aei n ana katoto Uean Iteraera ae Tauro. Ngke e a rangi n ikoaki kakaiaki n te buaka, ao e a tuanga ana tia ibuobuoki bwa e na tiringnga. (1 Tamuera 31:​3, 4) Ma e rawa ni karaoa anne ana tia ibuobuoki. Ma iai temanna te mwaane are kewe n taekinna bwa e boni karaoa nanon Tauro. E kabuakakaaki te mwaane aei bwa e katuturaraa, iroun Tawita are teuare kaotiota ana iango te Atua i aon te baei.​—2 Tamuera 1:​6-​16.

A riai ni kataaki aanga nako ibukini kaananauan te maiu?

 Ngkana e a kaani mate temanna, e aki tua te Baibara bwa e na kamaanaki ana tai ni mamaara imwaini matena. Ma e anga te iango ae aki tabeitera iai te Baibara. Te mate bon ara kabanea ni kairiribai, ae reke imwin ara bure. (I-Rom 5:​12; 1 I-Korinto 15:26) E ngae ngke e aki riai ni babarekaki te mate, ma e bon aki naba riai ni maakaki, kioina ngkai e berita te Atua bwa e na kautiia akana mate. (Ioane 6:​39, 40) E na kakaaea ana bwainnaoraki ae te kabanea n raoiroi te aomata are karinea te maiu. Ma karaoan anne, tiaki nanona bwa ti riai n rinea te waaki ni bwainnaoraki ae e na kaabwabwaka ana tai te aomata ae e a kaani mate.

Te koaua ae e aki kona ni bwara te bure ni bakabure?

 Tiaki ngaia anne, e aki karinanaki n te Baibara te bakabure i aan te bure ae aki kona ni kabwaraaki. E ngae ngke bon te bure ae rawawata katokani maium i bon iroum, b ma e ota raoi te Atua ni baike a riki n aron tao aorakin te iango, te rawawatannano ae rangi n riao, ke bon rikian te aomata anne man ana utu ae tao e kairiri nakon te kani bakabure. (Taian Areru 103:​13, 14) E katauraoa te karaunano n te Baibara nakoia naake e korakora rawawatan nanoia. E taku naba te Baibara bwa “a na boni mangauti akana raoiroi ma akana aki raoiroi.” (Mwakuri 24:15) E oti n aei bwa iai kantaningaani mangautiia akana karaoi buure aika rawawata, n aron te bakabure.