BÉ E BÀ ÓLÒ TÚ GBÒ O LỌ̀LÀ-LỌ̀LÀ SIIMÁ TÓM NAA
Ńkem̀ Kpó Ea Ólò Naa Kọọ̀ Gbò Nen Á Ié Agẹ Zìgà
SEPTEMBER 1, 2020
Kátogóí, Gbò Neǹ Ditõ̀ò Jìhóvà palàge íe gã́bug kpá nè vídiò ea dẹẹ̀a Kpá Káí ea di boo íntanèt èlmà tṍó ea kil nvéeá. Sõò sìgà kiẽ́e e pá vígà dì beeá ló bàlà booí, íntanèt á gé. Sìgà gbò di kiẽ́e e íntanèt náa ólò bọọgẹ̀ dì, àbèè ge ọọ, àbèè kọọ̀ á gé.
Náa kal ló béè vó, gã́bug pá vígà é gbóó láá naa dã̀ànlóòd bẹẹ gbò kpá nè vídiò e bà náa é nveè ba Íntanèt boo! Mósĩ́ deè ní e níí ólò valí é?
JW Box dú ńkem̀ kpó e bà ólò nè gbò bõ̀ònatõ̀ò e bà náa íe íntanèt. À fáálá router e ba beè zalí lọl kèki, à íe software e Computer Department ea di Bethel beè nvee m, vaá ié nágé gbò kpá nè vídiò ea dẹẹ̀a boo Kpá Káí ea di boo jw.org. Kpègè e buù kà kpóí ólò sì é toolá $75 U.S.
Gbẹá Kíndòm Họ́ọ̀l, pá vígà ólò nvèè ba Wi-Fi boo kọbé bà láá naa dã̀ànlóòd gbò kpá nè vídiò ea dẹẹ̀a boo Kpá Káí ea di mm̀ JW Boxí. Kọbèè gbò e ba fóòn ni dú nómá àbèè kọọ̀ náa bọọ gè sí kpègè é láá naa kònékt. Sõò beè bõ̀ònatõ̀ò náa íe íntanèt, mósĩ́ deè ní e ãa kpá e bà tẹ́lẹ boo jw.org láá bã mm̀ JW Boxí é? Aa tṍó dọ tṍó, tọ nàà tóm ólò lẹ̀ẹ̀làgì USB key, e buù kà é láá sí $4 U.S. domá, e ãa-ãa nú e bà ã́àa tẹlẹ boo jw.org di boo, kọbé bà láá nvee mm̀ JW Box.
Mósĩ́ deè ní e JW Box ni nveè bá nè pá vígà ẹ? Nathan Adruandra, ea dú ene kà tẹ̀ boo tọ ea ólò tõó Democratic Republic of Congo, beè kọọ̀: “Gã́bug tṍó m̀ ólò pììgà ge naa dã̀ànlóòd nu gè ẹ̀b ea kọlà ‘Nda Dẹlẹ̀ Ni Nyíé Boo, E Jìhóvà’ nè Kẽeaí Boo Nu Ea Beè Lẹ̀ẹ̀a Ló Vaà Lọ́t. Sõò ním beè láá naa, vaá níí beè palàge ọọvẹ́m ló. Kátogóí m láá naa dã̀ànlóòd gbò vídiòí nvee boo nà fóòn, vaá a nveè bá nèi kọ é láá noòmà nuù bẹẹ gbò nvín.”
Ene kà vígà págbálà ea ólò nvèè bá noo JW Box nè gbò bõ̀ònatõ̀ò ea di Nigeria kọ́ọ̀: “Pá vígà ẹb kọọ̀ à dú kà kele íb dõ̀ònù ea aa bá Jìhóvà. Nyíé va palàge ẹẹ béè kọọ̀ bàé gbóó láá naa dã̀ànlóòd gbò vídiò nè gbò kpá E Ólò Noòmà Gbò Nen.”
Baa lẹẹlà nú ea é sígá ló 1,700 ńkpóí má gbò bõ̀ònatõ̀ò ea di Africa, Oceania, nè South America, vaá bà gé noo nagé gè lẹ̀ẹ̀là má gã́bug dõòna kà gbò bõ̀ònatõ̀ò. Ãàa ní e ólò ié gbò kpègè e síìmà tómí lọ̀lẹ? Tení dú ló lọ̀là-lọ̀là e bà ólò nè boo béè ge nvèèmà sãa kúm tóm ea gé síá beeá ló bàlà booí. Bà ólò nè gã́bug lọ̀là-lọ̀làí tenmá boo donate.dan124.com. Bọ̀ì zaagé ló bọọ gè nei nu taalẹi bá.
