Jìhóvà Bàrì gbĩ́ kọọ̀ kọ̀láá nen á nó nú ea kilìè ló ẹlẹ nè a Boǹ Méné, e náa dẹẹ̀a boo ba dìtõ̀ò. (1 Tímotì 2:​3, 4) Boo béè vó, Gbò Neǹ Ditõ̀ò Jìhóvà a émígi gã́bug Kpá Káí nè gbò kpá gè noomá Kpá Káí naa ní ea é íná ló gã́bug nen, bã̀àna gbò káá tṍ. Kàsĩ́, bẹẹ bõ̀ònatõ̀ò a tab gã́bug tõ̀ò kpá nvee mm̀ vídiò ea di mm̀ dém bel gbò bólá gã́ nè gbò káá tṍ, a ea ni íná mm̀ nú ea sígá ló 100 dém bel! Mósĩ́ deè ní e ólò naa vaá dõo gbò vídiòí zaali é? Váà mókà gbò lé nu ní ea ni silà aa m, mm̀ gbò gbáá e ni náámá ẽ́?

 Gbò e bà ólò sí tóm gè tàb bel beeá ló bàlà booí ní e bà ólò naa gbò vídiò gbò bólá gã́ nè gbò káá tṍ ẽ́. Buù gbò e bà ólò tàb dém belí ólò tú tṍó tenmá boo kpá e bà gbĩ́ gè tàb. Tṍó e ba ni náa vó lọ̀l, bà ólò gbóó beeláfùl boo kà lé sĩ́deè e bàé tabmà nvee mm̀ dém bel gbò bólá gã́ nè gbò káá tṍ. Bà ólò gbóó naa rẹ́kọọ̀d nú e ba beè emí mm̀ kpáá nvee mm̀ vídiò. Kátogóí, e íè 60 gbò e bà gé tab gbò kpá gè noomá Kpá Káí nvee mm̀ dém bel gbò bólá gã́ nè gbò káá tṍ dénè tṍó, nè dõona kà 40 gbò e bà ólò tàb sìgà tṍó.

 Gè naa vídiò gbò bólá gã́ nè gbò káá tṍ beè olòó bọ̀ọ̀gè sí kpègè tṍó ea kil nvéeá. Gbò kámerà ge naamá vídiò nè dõona kà gbò nuù tóm beè olòó palàge sí kpègè tṍó ea kil nvéeá èlmà kátogóí. Nagé, ba beè olòó tõó stúdìò naa rẹ́kọọ̀d vídiò, vaá níá ólò bĩiná kọọ̀ é tìb stúdìò, sìgà tṍó à ólò bĩiná kọ é kpáá sí tóm ló tọ ea beè dì. À ólò láá tú gã́bug kpègè ea sígá ló $30,000 b ge naamá kọ̀láá kà nu e áá kóló tẽ̀ènè kà gbò ge tàb dém bel gbò bólá gã́ nè gbò káá tṍ é síímá tóm.

 Kọbé è láá tú gbò lọ̀là-lọ̀là siimá tóm leevè, bẹẹ bõ̀ònatõ̀ò a gbĩ́ gã́bug sĩ́deè ge naamá kọọ̀ tóm gè tàb dém bel á kpáá dú lé vaá valí bá. È gbóò tú gbò ãa nuù tóm ea gé síá tóm leevè e náa sí gã́bug kpègè siimá tóm. Tãa vó e bà tõó stúdìò naa rẹ́kọọ̀d, gbò e bà ólò tàb bel é láá tú green background e bà kólíe green screen siimá tóm gè naamági rẹ́kọọ̀d vídiò gbẹá ba tọọ̀ tóm. Tṍó e bà ie bíi ló gã́bug gbò e bà ólò ló bel gbò bólá gã́ nè gbò káá tṍ, pá vígà págbálà nè pábia é láá tõó ba tọọ̀ tóm àbèè ba tọ naa rẹ́kọọ̀d kīée ea kuú va bá e bà náa é íe na bíi ló gè kil stúdìò.

 E náa nagé nu gè siimá tóm ea é nveè bá nè gbò e bà ólò sí tóm gè tàb dém bel gbò bólá gã́ nè gbò káá tṍ. Gbò nuí a náa kọọ̀ tóm gbò ge tàb dém belí á gá tuná vá gã́bug tṍó bá belí bé ea beè olòó dì nàa. Nyíè pá vígà ẹẹ ló nakà gbò sìm kil sĩ́í. Ene kà vígà págbálà ea kọlà Alexander kọ́ọ̀: “Gbò vídiò ea di mm̀ dém bel gbò bólá gã́ nè gbò káá tṍ kpáá palàge tọla kẽ kátogóí èl gbò tṍó ea kil nvéeá. Níá palàge ẹẹlẹ̀m nyíe. M̀ ólò ẹ̀b gbò vídiòí kọ̀láá dee.”

 Kátogóí, kpègè e bà ólò zalmá nuù tóm nè enè gbò e bà ólò tàb dém bel náa ólò toolá $5,000. Vó a náa kọọ̀ é láá nagi gã́bug vídiò gbò bólá gã́ nè gbò káá tṍ nvee mm̀ gã́bug dõona kà gbò dém bel.

 Tẽ̀ènè tṍó e gbò e bà ólò tàb dém bel gbò bólá gã́ nè gbò káá tṍ ni náa rẹ́kọọ̀d lọ̀l, gbò vídiòí ólò gbóó iè ge iná ló gbò e bà íe bíi ló. Gbò tṍó ea kil nvéeá, e beè olòó tú gbò vídiòí nveè boo kàsẹ́ẹ̀t nè DVD, sõò níí beè olòó túi gã́bug tṍó nè kpègè bá vaá nvèè nài gé gã́bug tóm bá. E beè olòó lẹ̀ẹ̀là gbò ní e ni náa rẹ́kọọ̀d lọ̀l má gbò kómpinì kọbé bà bọọvẹ̀ tõ̀ò. Tṍó e ni náa vó lọ̀l, è ólò gbóó lẹ̀ẹ̀là gbò DVD nè kàsẹ́ẹ̀tí tẹlẹ kele-kele bõ̀ònatõ̀ò. Áá mm̀ gbáá 2013, e beè tú nú ea sígá ló $2,000,000 naamá DVD gbò bólá gã́ nè gbò káá tṍ.

 Nyíè gbò bólá gã́ nè gbò káá tṍ beè palàge ẹẹ ló gbò vídiòí. Sõò, náa beè valí gè tú gbò vídiòí siimá tóm, boo béè kọọ̀ gbò DVD àbèè kàsẹ́ẹ̀tí beè bọọ̀gẹ̀ bọọ́ tõ̀ò. Sìgà tṍó, a beè olòó tú va gã́bug DVD bá besĩ́ bà kálá láá naa rẹ́kọọ̀d ene kà kpá ea di mm̀ Kpá Káí lọ̀l. Ene kà vígà págbálà ea dú Brazil ea bée kọlà Gilnei kọ́ọ̀: “Kọ̀láá tṍó e gbĩ́ì ge bugi ene kà dọ̀ Kpá Káí è ólò gbĩ́ kàsẹ́ẹ̀t e ba beè naa rẹ́kọọ̀d nvee boo, vaá gbóó gbĩ́ kīée e dọ̀ Kpá Káíá dì. Níí beè olòó palàge tàvàlà.” Ene kà vígà pábia ea bée kọlà Rafayane, ea beè olòó tú DVD gbò bólá gã́ nè gbò káá tṍ siimá tóm kọ́ọ̀: “A beè olòó ọọvẹ́m ló gè nó nu boo nà lóó, boo béè kọọ̀ a beè olòó túm gã́bug tṍó bá gè gbĩ́ gbò dọ̀ Kpá Káí àbèè gbò nú ea nyoone.” Vaá tṍó e pá vígà sí gé kọ́ kpẹ̀a, bà ólò faalá gã́bug DVD nè kàsẹ́ẹ̀t e bàé bila boo TV nen ea íe lèèmá m. Kàsĩ́, sìgà pá vígà beè olòó faalá ba nu gè bìlà DVD m tṍó e bà gé sí gé kọ́ kpẹ̀a. Pọ́ì ńkem̀ tṍó aa ló tṍóá, pá vígà beè gbóó ié nu gè bìlà DVD boo ea íe ketõ̀ò ge ẹ̀b ea bélí TV e náa bọọ̀gẹ̀ bọọ́ kà, vaá níá ní e ba beè gbóó olòó kọọmá kpẹ̀aẹ́. Ene kà vígà págbálà ea ólò tõó United State, ea kọlà Bobby kọ́ọ̀: “Tṍó eo ni bilà ene kà dọ̀ Kpá Káí lọ̀l vaá ò gbĩ́ì ge bìlà ńdõona kà, à ólò bọọ̀gẹ̀ dú bíi gè tú dõona kà DVD bìlmà. Níí ólò naa kọ á tàvàlà vaá túi gã́bug tṍó bá gè bugi Kpá Káí tṍó e gé kọ́ kpẹ̀a nè nen.”

 Mm̀ gbáá 2013, bõ̀ònatõ̀ò Jìhóvà beè tú JW Library Sign Language app tẹlẹ bàlà kẽ, ea náa kọọ̀ pá vígà págbálà nè pábia á láá naa dã̀ànlóòd vaá bìlà vídiò gbò bólá gã́ nè gbò káá tṍ boo ba fóòn. Ba beè zẹ́ẹ́ tẹlẹ bàlà kẽ mm̀ dém bel gbò bólá gã́ nè gbò káá tṍ pá America. Tṍó e tṍó téní, mm̀ gbáá 2017, ba beè nyaaná bá ló kọbé dénè dém bel gbò bólá gã́ nè gbò káá tṍ láá sila boo. Nyíè pá vígà págbálà nè pábia e bà di zivèkà bàlà booí beè palàge ẹẹ. Ene kà vígà págbálà ea kọlà Juscelino, ea di Brazil kọ́ọ̀: “A beè tàvàlà ḿ ló gè zìgà! M̀ ólò bugi togó boo bé e Gbò Ge Tulè Tóm zógè kọọ̀ bà vulèè beélé gbò káá tṍ nè bé e bà gbĩ́ kọ é sìm kilsĩ́ mm̀ kà-kàí naa, belí bé e bà gé náa nagé kilma ló gbò e bà ólò láá ló bel naaá. Nyíém palàge ẹẹ, vaá nakà nuù tómí a nveè bá nèm kọ ḿ láá palàge nó Kpá Káí.”

 Kátogóí, è ólò naa kọ̀láá kà vídiò gbò bólá gã́ nè gbò káá tṍ, ní ea é di boo kòmpútà vaá tẹlẹ boo bẹẹ website nè boo JW Library Sign Language app. Vó a náa kọọ̀ á láá túi pọ́ì ńkem̀ dee bá ge tàb kpá gbò bólá gã́ nè gbò káá tṍ, naa rẹ́kọọ̀d vaá dõo zaali, tãa vó ea túi gã́bug ẽ́ àbèè gbáá bá. Kàsĩ́, a dú gè tú gbò vídiò ea di mm̀ gã́bug dém bel gbò bólá nè gbò káá tṍ tẹlẹ bàlà kẽ tẽ̀ènè tṍó e bà tú níí gbò e bà ólò láá ló bel tẹlẹ nàgé bàlà kẽ.

 Nvèè kpíí ló nú e sìgà pá vígà e bà náa ólò dã́ nu kọ́. Ene kà vígà pábia ea kọlà Klízia kọ́ọ̀: “Mókà bõ̀ònatõ̀ò ní ea ólò láá palàge ẹ̀b nú ea kil ló gbò bólá gã́ nè gbò káá tṍ vaá di kpènà ló ge naa kọ bàá ié gbò búma ea aa bá Bàrì mm̀ sĩ́deè ea válí naaí ẽ́? Née é láá tú gbò nú e bõ̀ònatõ̀ò Jìhóvà gé náa nèi doolé ló tọ́ọ̀ kà nú ea di mm̀ nakà bàlà booí.” Vladimir kọ́ọ̀: “Gbò vídiòí náa kọ ḿ nyimá kọọ̀ Jìhóvà ólò palàge ẹ̀b nú ea kil ló gbò káá tṍ belí bé ea ẹb nagé nú ea kil ló gbò e bà ólò dã́ nu naa.”

 Bà ólò bọọ̀gẹ̀ kọ́ mm̀ bẹẹ gbò vídiò gbò bólá gã́ nè gbò káá tṍ kọọ̀: “À beè dú gè naa nakà vídiòí naa ní ea é dṹùnà tóm gè noomà Kpá Káí beeá ló bàlà booí e bà ólò nvèè sãa kúm tení dú ló lọ̀là-lọ̀là e nen ne lọa bùlà.” Nyíéi palàge ẹẹ ló bọọ gbò lọ̀là-lọ̀là, ea ólò dú gè nè gã́bug tenmá boo donate.dan124.com. Gbò kpègèí ní ea náa kọ é láá emígi Kpá Káí nè gbò kpá gè noomá Kpá Káí naa ní ea é nveè bá nè dénè nen bií nágé ló gbò bólá gã́ nè gbò káá tṍ ẽ́.