Mm̀ gbò deé e tṍó é gé tàí, è ẹbmà dẽè ge dã́ “kòvà bé gím ea aa kuló nè kpẹ̀a bé gím.” (Máátìù 24:⁠6) Náa kal ló béè vó, tṍó e pá vígà mon tã̀àgã̀ boo béè bé gím, bà ólò ié nvèè bá e bà íe bíi ló. Ní ea égè #3 Ãa Kpẹ̀a Ea Aa Bá Gbo Ge Tulè Tóm Níí 2022 kọ́ nú ea kil ló tóm gè nvèè bá nè gbò e bà di Eastern Europe, e bà íe bíi ló nu gè tõ̀òma dùm boo béè bé ea gé béá gbẹá Ukraine. Mósĩ́ deè ní e pá vígà gé nveè bá nè ene náa kal ló béè kọọ̀ bà gé bé-bé kuló kĩée e bà dì e? Éé ní e tóm gè nvèè bá nè pá vígà e bà íe bíi ló nu gè tõ̀òma dùm náa ló pá vígà e bà di Ukraine ẽ?

 Kà lèlà February 24, 2022, e pá Russia nè pá Ukraine beè dààmà togó gè bé-bé, ní e Coordinator Committee beè tenmà gbò nú e bàé nveemà bá nè pá vígà e bà di Ukraine ẽ. Tọ nàà tóm ea di Ukraine beè gbẹá boo zalígi gyã́á lọl gbò kĩée ea dì vá kuló vaá dààmà togó gè dõo má pá vígà tenmá bá 27 gbò Disaster Relief Committee e ba beè íbá ló.

 Gbá ló tóm e tọ nàà tóm ea di Ukraine gé sí mm̀ ge nvèè bá nè pá vígàí, World Headquarter Gbò Neǹ Ditõ̀ò Jìhóvà beè gbẹá boo bugi togó boo gbò sĩ́deè e bàé láá nvèèmà bá. Coordinator committee nè Publishing committee Gbò Ge Tulè Tóm, beè kọ́ nè Global Purchasing Department kọ bàá zọ̀ gbò e bà aa tọ nàà tóm ea di Ukraine nè Poland siá tóm, mm̀ ge ẹ̀b nú ea kil ló bíií vaá noo nu gè naa. Pá vígà e bà ólò sí tóm Purchasing, Shipping, nè Legal department ea di buù kà tọ nàà tóm, bií ló enè nen ea dṹùnà Branch Committee ea di Ukraine, nè gbò e bà dṹùnà Global Purchasing Department beè olòó ié bila ló bel buù dee mm̀ ge ẹ̀b nú ea kil ló pá vígà e bíi di lóí.

 Jay Swinney ea dṹùnà Global Purchasing Department kọ́ọ̀: “Túá kà nú e beè naa dú gè nvèè kpíi ló nú e bà íe bíi ló. È beè gbĩ́ gè nè va gyã́á nè gbò nu gè õ̀òmà ló nu e bà nyímá ló. Níì áá gè nyimá kà lèlà nú e bà íe bíi ló ní ea beè dú nu ànà-ànàe nì, sõò ge nyimá nágé kà lèlà sĩ́deè eé láá vàlẹ̀ bá lẹ̀ẹ̀là gbò nuí nvee Ukraine mm̀ sĩ́deè eé íe kpènà boo béè bé ea gé béá dóí beè dú nágé nu ànà-ànà.”

 Bé ea gá dú March 9, 2022, ba beè nyimá ló gbò nú e pá vígà e bà di Ukraine ié bíi ló. Ba beè lẹ̀ẹ̀là gbò gyã́á e bà ié bíi ló, dì belí nom ea di mm̀ tíì nè gyã́à, súú-súú gyã́á, ọ̀lọ́ọ̀s, nè beans, gbá ló gbò nu gè õ̀òmà ló nu ea dì belí sọ́ọ̀ nè tọ́ílẹ́t pẹpà. Tṍóá, ba beè gbóó dòòmà dẽe ló kọọ̀ mm̀ ténì sè, bàé láá tú nú ea é dú $65 (U.S.) zalmá nú e buù nen íe bíi ló. Boo béè kọọ̀ gã́bug tõ̀ò pá vígà é íe bíi ló sìgà nu, Coordinator Committee beè tenmà gã́bug kpègè ge nvèèmà bá nè va. Sõò, mósĩ́ deè ní e pá vígà é láá lẹ̀ẹ̀là gbò nú e bà ié bíi lóí má va e ba dùm náaé bã́ kèbá gẹẹ-gẹẹ ló é?

 Ló March 13, bàà kà vígà págbálà e bà dú Poland beè dò ge lẹ̀ẹ̀là nu lọl tọ nàà tóm ea di Poland kilma tọ gè sẹlẹ nu ea di kuló Lviv, ea di Ukraine. Gbò deé ea dì besĩ́ì bà kalá ààa, gbò e bà ólò sí tóm tọọ̀ tóm ea di Poland nè Ukraine beè nvèè bá nè bàà kà vígà e ba beè nè lóó gè sí kyẽèí. Tọ nàà tómá beè tú kpá ea é sọ́va tọ́ deè kọ bàá láá fùl bã dó e bà gé kilá lọl bá kpóó ea gé bẹl kọbé bà láá tú nú e bàé nveemà bá nè gbò e bíi di lóí nè va. Ba beè emí nú ea zógè kọọ̀ bà gé nveè bá nè gbò e bíi di ló gbàà kú faà gbò vígàí, vaá noo naa ní e pá vígà e bà di Ukraine é kọ́ kà lèlà kĩée e be bà téní àé dú kuló, tṍó e ba ni ful bã dóá. Tã́áná deè bá ea aa bá Jìhóvà nè kà lé kpóògà dee ló beè naa kọọ̀ é láá lẹ̀ẹ̀là gbò nu gè nvèèmà báí inmá ló gbò Disaster Relief Committee mm̀ nú ea é dú 24 ávà aa ló tṍó e gbò nuí beè iná Lviv, vaá pá vígàí beè òòa kẽ iná Poland mm̀ fẹ́ẹ́-fẹẹ̀ ló.

 Náa kal ló béè kọọ̀ a beè ié togó túá tṍó e pá vígàí beè lẹ̀ẹ̀là nu má va, nyèè nú e ba beè lẹ̀ẹ̀là ge nvèèmà bá náa beè tóólá ene kà metric ton (1 U.S. ton). Ba beè kpáá ié bíi ló gè lẹ̀ẹ̀là nú ea nyèè é tóólá 200 metric ton! (220 U.S. ton) Bàé náà và láá vàlẹ̀ bá lẹ̀ẹ̀là íb gbò gã́bug nuí má vaẹ́?

 Tṍó e pá vígà e bà dì beeá ló bàlà booí ni bugi kpẹ̀a ea di boo jw.org ea kil ló bé e pá vígà e bà di Ukraine gé mon tã̀àgã̀ bá bé gímí naa, ba beè gbĩ́ gè nvèè bá. Gã́bug gbò e bà di kpã́á beè nè lọ̀là-lọ̀là nyòòmà ge nvèèmà sãa kúm sìtóm kọ̀ kpẹ̀a Gbò Nen Ditõ̀ò Jìhóvà ea gé síá beeá ló bàlà booí, vaá ba beè àgala boo kọọ̀ bàé tú gbò kpègèí siimá tóm boo lé bá. Dõona gbò e bà ólò tõó gbò dó ea dì vá kpàn beè láá tú ba tṍó, kói, nè ba gbò ìènù nvèèmà bá. Nee sìgà nu dòòmà báí.

 Gbẹá Poland, gbò e ba beè nè lóó gè nvèè bá beè bõonè ló gã́bug tõ̀ò nú e bàé nveemà bá, boo tṍó e gbò pá nvín beè tãgági nu boo báà nu. Bartosz Kościelniak ea ólò sí tóm Purchasing Department ea di tọ nàà tóm Poland kọ́ọ̀: “Gã́bug tṍó, m beè bugi nú ea di mm̀ kpá Psalm 110:3 ea kọ́ọ̀, ‘gbò níí Jihóvà é tú ba lóó nè.’ Sõò tṍó em túù ńdáà dẽe mònmà gã́bug gbò e bà nè lóó gè nvèè bá vaá di kpènà ló gè gbẹá boo sí tóm, m beè gbóó àgala boo kọọ̀ gbò moǹ belá dú kà-kà.”

 Enè Neǹ Ditõ̀ò Jìhóvà ea íe pọ̀b kà kómpinì ea ólò oo vaá zalí nu lọl dõona kà gbò dó, ea beè nèi gbò a faà gè toomá nu bii nagé ló fọ́ẹ̀l ge tṍ m beè kọọ̀: “Nda ẹbvì naamá nèà deè em íè ge zogè kọ m̀ vulè Jìhóvà nè pá vígà. Nyíém palàge ẹẹ ló gè nvèè bá.” A beè dõo fọ́ẹ̀l ea é láá toolá 7,700 lítà (2,034 gal) vaá pá vígà beè tú ba tṍó nè ba kói ọbmá gbò nú e bà dõoí mm̀ begè dẽé ea é láá dú 48,000 kilometer (30,000 mi) má gbò e bà íe bíi ló!

 Vulè nè tàn e pá vígà págbálà nè pábia íe nyòòmà ge sí tómí beè naa kọọ̀ besĩ́ à kalá dú March 28, ea dú kóló 15 dee aa ló túá deé e ba beè lẹ̀ẹ̀là nu tẹlẹ dóá, ba beè láá lẹ̀ẹ̀là nú ea tóólá 100 bẹ̀lẹ̀ gyã́á (110 U.S. ton), nu gè õ̀òmà ló nu, nè gbò biè tẹlẹ Ukraine! Vaá gbò nú e pá vígà dõo nè ní ea aa bá gbò e ólò zalí nu bá beè naa kọọ̀ gã́bug kpègè e beè noo nyòòmà ge nvèèmà bá á sigá. Kà lèlà kátogóí, Gbò Neǹ Ditõ̀ò Jìhóvà a lẹẹlà nú ea sígá ló 190 bẹ̀lẹ̀ nu gè dõo (209 U.S. ton) nvèèmà bá nè pá vígà e bà di Ukraine. Mósĩ́ deè ní e gbò nú e lẹẹlàí ni nveè bá nè pá vígà ẹ?

 Tṍó e gbò nuí ni íná Lviv, gbò Disaster Relief Committee e bà di Ukraine beè gbóó dõo gbò nuí nè gbò e bíi di ló. Gbò nu gè nvèèmà báí a íná gã́bug bon, e sìgà gbò boní é láá dú begè dẽé ea é sígá ló 1,300 kilometer (800 mi) aa Lviv. Tómí beè tu nágé tṍó, náa kal ló béè kọọ̀ ba beè sí boo bá ea bọ́ló. a

 Markus Reinhardt, ea dṹùnà Branch Committee ea di Ukraine kọ́ọ̀: “Gã́bug pá vígà a mon bé e Jìhóvà vulè va naa nè bélè ea di ló gè gbàntṍ ló tùle ea aa bá a bõ̀ònatõ̀ò tṍó tã̀àgã̀í, bãana besĩ́ tã̀àgã̀ à kalá naaá. Belí nu dòòmà bá, bõ̀ònatõ̀òí ólò siè kpóó ló déne bẹ̀i kọ é kpoogè dee ló gyã́á nè múú ea é láá tõoí bá mm̀ sìgà sè sẹlẹ́ bẹẹ tọ. Ene kà kànen mm̀ bõ̀ònatõ̀ò ea bée kọlà Anton ea di Kyiv kọ́ kilma ló tùleí kọọ̀: ‘Bõ̀ònatõ̀ò Jìhóvà a kpóògèi dee ló nyòòmà tàvàlà dìtõ̀ò váà níí ẹ́ẹ̀lẹ̀i nyíe. Ge kọ e beè ié gyã́á nè múú e beè kpoogè dee ló bií ló rédiò beè kpènà bẹẹ dùm.’ Nyíéi ẹ́ẹ nagé kọọ̀ pá vígà beè tõó boo tùleí boo béè kọọ̀ a beè naa kọọ̀ tọ nàà tóm á láá ié gã́bug tṍó gè kpoomá dee ló gbò nu gè nvèèmà bá.”

 A beè tọá ló pá vígà naa vàẹ tṍó e bà íe gbò nú e bà dõo má vaí é? Mykola nè Zinaida, e bà ólò tõó Kharkiv, beè kọ́ bé ea tọ́àẹ̀ vá ló naa tṍó e bà kọ́ọ̀: “Bọọ vulè palàge tọáí ló. Bọ̀ì zaa gé ló gyã́á nè biè eo dõonìì mái, e palàge mòn kọọ̀ Jìhóvà gé ẹb nú ea kilíí ló.” Valentyna ea ólò tõó nágé kĩá kọọ̀: “Lọl dààmà togó béá, gbò nen beè olòó bã boo begè tãá kọbé bà láá zalí nu e bà íe bíi ló. Náa beè olòó valí gè zalí gbò nú e íè bíi ló, sõò Jìhóvà beè nyimá nú e géè tení bá. A beè íbá ló pá vígà e bàé dõo gbò nú e íè bíi ló máí bẹẹ be, vaá gbò nú e ba beè dõo máií ní ea dú kà lèlà nú e beè ié bíi ló é! Tṍó e nen di kèbá tàvàlà dìtõ̀ò vaá à belí kọọ̀ tọọ̀ kà ẹ̀b dẽesĩ́ á gé ná, nen ólò gbóó mòn kele íb vulè ea aa bá Jìhóvà nè a bõ̀ònatõ̀ò. Nyíè nen ólò palàge ẹẹ tṍó ea mon nvèè bá ea géè ié bíi ló, kà lèlà tṍó ea bọ́ló lọl bá Jìhóvà.

 Yevhen, Iryna, nè Mykyta e ba beè teelá aa Mariupol kọ́ọ̀: “Nyíéi palàge ẹẹ ló bé eo nveenìì bá vaá ẹbvii nú ea kil ló pá bẹẹ tọ nè beele naa. Mm̀ kà-kà, a beè dú kà lèlà tṍó ea bọ́ló. Túá ból, e beè dòòmà kọọ̀ áá gbò nú eo dõonìì mái ní ea di mm̀ kpóá ẹ́, sõò tṍó e kuulà, e beè mòn nàgé gbò nú ea zógè bọọ vulè!”

 Òó láá palàge mòn bé e Jìhóvà beè tú a nyómá nèèmà tùle pá a gbò naa ní e bà láá faalá gbò nú ea zógè vulèí má pá vígà mm̀ tṍó e “kòvà bé gím ea aa kuló nè kpẹ̀a bé gím” dìí naa. Bọọ lọ̀là-lọ̀là ge nvèèmà sãa kúm sìtóm kọ̀ kpẹ̀a eo beè neì gã́bug tenmá boo donate.dan124.com, beè palàge nvèè bá. È palàge zaava ló bọọ gè dõonii nu taalẹi bá!

Gè Tú Gbala-gbala Nvèèmà Bá Mm̀ Sĩ́deè Eé Íé Kpènà Dẹ̀ẹ̀a Boo Bé Ea Válí Naa

1. February 24, 2022: Coordinator Committee beè tenmà gã́bug kpègè e bàé nveemà bá nè pá vígà e bà di Ukraine, e níí beè naa kọọ̀ tọ nàà tómá á láá dààmà togó gè nvèè bá nè va

2. February 24–March 8, 2022: Tọ nàà tóm ea di Ukraine beè zalí sìgà nu gbẹá dóá vaá dààmà togó gè dõo nè pá vígà tenmá bá gbò Disaster Relief Committee. Tọ nàà tómá beè dì nàgé kpènà ló ge tú gbò dõ̀ònù ea aa Poland vaá dõo nè gbò e bíi di ló

3. March 9, 2022: Coordinator Committee beè tenmá kọọ̀ bàá lẹ̀ẹ̀là nu gè nvèèmà bá nè pá vígà e bà di Ukraine

4. March 10–12, 2022: Ba beè noo bé e bàé láá naa vaá lẹ̀ẹ̀là gyã́á nè dõona kà gbò nú e pá vígà íe bíi ló lọl Poland kilma Lviv ea di Ukraine

5. March 13, 2022: Ba beè lẹ̀ẹ̀là túá kà gyã́á nè dõona kà gbò nú e pá vígà íe bíi ló lọl Poland kilma Lviv ea di Ukraine

6. March 14–16, 2022: Gbò e ba beè nè lóó gè nvèè bá ló tóm Local Design/Construction beè kpóògè dee ló gyã́á nè gbò nu gè õ̀òmà ló nu gbẹá Àsémblì Họ́ọ̀l ea di kuló Poznan ea di Poland

7. March 17, 2022: Ténì dee aa ló túá deé e ba beè lẹ̀ẹ̀là nu tẹlẹ dóá, pá vígà beè gbóó dààmà togó gè tú faà toomá nú ea é dú 13 metric ton (14 U.S. ton) nu gè nvèèmà bá tẹlẹ gbà-gbá Poland nè Ukraine

8. March 21–27, 2022: Ba beè tõó Poland bõonè ló gbò nu gè nvèèmà bá ea beè sigá ló gbò ní e ba beè zẹ́ẹ́ lẹ̀ẹ̀làa tẹlẹ Ukraine, ba beè gbóó dõo gbò núá tẹlẹ gbò kĩée bà íe bíi ló mm̀ kóló 24 ávà

9. March 28, 2022: Ba beè lẹ̀ẹ̀là 100 metric ton (110 U.S. ton) gyã́á, nu gè õ̀òmà ló nu, nè biè tẹlẹ Ukraine mm̀ 20 dee aa ló deé e ba beè tenmá kọọ̀ bàá lẹ̀ẹ̀là nu gè nvèèmà bá má pá vígà

 Kátogóí, Gbò Neǹ Ditõ̀ò Jìhóvà a lẹẹlà nú ea sígá ló 190 metric ton (209 U.S. ton) gbò nu gẹ̀ nvèèmà bá má pá vígà e bà di Ukraine.