Chiiruaajatka karaloʼuta nümüinjatka Timoteo 3:1-17
3 Pütüjaainjatpejeʼe saaʼu kapüleejeerüin maʼin tü kasa alatakat jee keemeerüin maʼin tü mmapaʼakat sülüʼütpa sükalia süpüla sajaʼttüin kasa mojusü.
2 Jamüshiijaʼa na wayuukana kapüleerü neʼe naaʼin nakuwaʼipa namüiwaʼa, alanaʼaleejeeria namüin sujutu nneerü, aʼwaataweena saaʼu wanee kasa, pülayaajeerü naaʼin, mojeerü nanüiki sümüin wayuu, nnojoleena oonooin sümaa sünüiki nei jee sümaa nünüiki nashi, nnojoleena aapüin analuʼut jee nnojoleena naya waneepiain namaa na waneinnua,*
3 mamülialeerü wayuu namüin, nnojoleerü anashiin namüin anajiraain naya, mojeerü nanüiki süchiki wayuu, nnojoleerü nachecherüin naaʼin, wayuujeena jashichi naya jee nayouteerü süchiki aaʼinraa kasa anasü.
4 Aainjeena kasa mojusü namüin naʼaleewainyuu, macheʼejeena süchiirua tü namakat, yaleteerü naaʼin, kamalainjeerü namüin tü suchuntaakat naaʼin suulialeʼeya oonowaa sümaa nünüiki Maleiwa.
5 Anoujayaajeena naya nünain Maleiwa suʼupala wayuu, nnojoleetpejeʼe jaʼyain saaʼu nakuwaʼipa shiimain tü nanoulakat. Kaaʼin pia noulia naya wayuukana.
6 Naʼakajee naya wayuukana eeshii na emeejüliikana, antüshii naya nepialuʼumüin na jieyuu jookana süpüla emeejünaa, ataʼünna aaʼinchii naya natuma, kaainjaralii naya jieyuukana, shia neʼe naaʼinraka tü suchuntaakat naaʼin.
7 Ekirajaashii maʼin naya waneepia, isapejeʼe nachiki nayaawatüin maʼin saaʼu tü pütchi shiimainkat.
8 Jamüshijaʼa Janes nümaa Jambres peʼipaashii naya nümaa Moisés, akaataajaʼa neʼe naya wayuukana, nayouta achikit tü pütchi shiimainkat. Mojusü tü nekiirujutkat, nnojotsü anain tü naaʼinrakat noʼuluʼu Maleiwa, jama nnojoluin anain tü nanoulakat.
9 Nnojoleerü kasain neʼrüin suluʼujee tia, shiyaawateerü aaʼu wayuu süpüshuaʼa malaain neʼe tü naaʼinrakat, meerü nakuwaʼipa maʼaka nukuwaʼipa Janes nümaa Jambres.
10 Eekajasaʼa piakai shia paaʼinraka tü tekirajakalü anain, püshatüin takuwaʼipa, shia puunteeka tü tounteekalü amüin, püshatüin tanoula, nnojoishi pia aashichijaain maʼaka nnojolin taashichijaain, aisü wayuu püpüla maʼaka alin wayuu tapüla otta achechetshi pia paaʼin maʼaka tachecherüin taaʼin.
11 Pütüjaa aaʼu tapüleeruaanüin aaʼin jee müliain taya atumawaa maʼaka tü aainjünakat taka chaa Antioquía, Iconio otta müsia Listra. Tachecherüin taaʼin soʼunnaa tia müliaakat jee nükaalinjain taya chi Señotkai soʼunnaa tia.
12 Mülieena atumawaa napüshuaʼa na wayuu aʼwaajeekana chi Maleiwakai sümaa paaʼinwain naya nümaa Cristo Jesús.
13 Eekajasaʼa na mojulaashiikana jee na emeejüliikana, oʼuneena neʼe suluʼu mojuin tü nakuwaʼipakat, emeejeena naya wayuu jee emeejüneena nayaya.
14 Aluʼusaʼa piakai, ayataʼaya püchecheraain süchiirua tü ekirajünakalü anain pia jee tü anoujinnakalü anain pia, jama pütüjaain saaʼu jaraliin na ekirajakana pia sünain
15 otta joʼuuiwaʼaya pia pütüjaatüjülia aaʼu tü sümakat tü pütchi nüchikimaajatkat Maleiwa, pütüjaa aaʼulu kekiijeechin pia sutuma tia pütchikat süpüla puʼtteʼennajachin sünainjee kanoulain pia nünain Cristo Jesús.
16 Nümaʼanajeejatü Maleiwa süpüshuaʼa tü Karaloʼuta Nüchikimaajatkat, anasü shia süpüla ekirajaa, süpüla achiawaa, süpüla anoutaa wanee kasa otta süpüla ekirajaa wayuu wanaapünaa sümaa tü kasa eekai anain.
17 Niasaʼa chi wayuu aʼyataakai nümüin Maleiwa keraajeechi nia jee yapeechi nia süpüla aaʼinraa kasa anasü.
Noota
^ Jee shiale «nnojoleena naya waneepiain nümaa Maleiwa».
