Michelle: Anuu taya antüin Sofía.

Sofía: Anasiaʼaya süka püntüin.

Michelle: Wanaa sümaa yaajatüin taya waashajaa achikit jamüin naaʼin Maleiwa müliale waya. a Püküjain tamüin kakaliairüin pütüjaweein saaʼu süchiki tia soʼujeʼereeya pasiruwaain tü piikat. ¿Jamakaʼa saaʼin maaʼulu tü piikat?

Sofía: Naaʼaya saaʼin. Anatsia saaʼin soʼukai.

Michelle: Kasataalejeseʼe saawalaain, kapüleekajasaʼa pümüin anainjatüin paaʼin sutuma tü alatakat pümüin.

Sofía: ¿Alateetcheʼe mapa tü müliaa weʼrakat?, eesü müle tanüiki.

Michelle: Tayaawata aaʼu jamüin maka paaʼin. Eesüjaʼa sotule paaʼin tasakirüinkain pia sünain tü pütchi makat: ¿Jamüsü nuuʼulaaka Maleiwa ayatüin eein müliaa mayaainjeʼe pülain nia?

Sofía: Aa, Sotusü taaʼin.

Michelle: Süpülapünaa watüjaain saaʼu tü sümakat tü Bibliakat süchiki tia, anasü sotule waaʼin soʼutku tü yootoko achiki waya semaanaka tiainka.

Sofía: Anakajaʼa.

Michelle: Wekirajaa anainrü nüchiki wanee wayuu nümaiwajachi waneepiakai nümaa Maleiwa asakirakai naaʼin sünain jamüin nuuʼulaka Maleiwa eein müliaa. Nnojoishi jashichin Maleiwa nümüin saaʼujee tü nüsakirakalü anain.

Sofía: Nnojotsü tatüjaain aaʼu tia.

Michelle: Wekirajaa anainrü mojuin naaʼin Jehová müliale waya. Aküjünüsü suluʼu tü Bibliakat mojuin naaʼin soʼunnaa müliain maʼin na israelitakana. b ¿Aashin anain waaʼin sutuma watüjaain saaʼu tia?

Sofía: Aa.

Michelle: Otta wekirajaa anainrü nnojoluin isain nüchiki Maleiwa nunoutuin tü kasa mojusü alatakat sümüin wayuu, jama pülain maʼin nia.

Sofía: Shia nnojotka tayaawatüin aaʼu tia. Pülalejeʼeya nia, ¿jamakaʼa nnojotka najaʼttirüin tü kasa müliakalü atuma saaʼin wayuu?

Michelle: Anashii wekirajaale tü sümakat tü karaloʼutakat Génesis. ¿Paapüirü nüchiki Adán sümaa Eva jee müsia süchiki süchon tü wunuʼu apülajünakat noulia?

Sofía: Aa, ekirajünüsü taya suluʼu tü koleejiakat süchiki tia. Nüküjain Maleiwa namüin nnojoluinjatüin neküin süchon tü wunuʼuliakat, akanasaʼa nayakana nnojoishii oonooin sümaa nünüiki.

Michelle: Ajaa. Anashii wekirajaale sünain tü alatakat süpülapünaa tia. Wayaawateetka saaʼu jamüin müliaka wayuu. Paashajeʼera Génesis kapiitulo 3, wetsiikulo 1 sünainmüin 5.

Sofía: Müsü mayaa: «Saʼaka tü kasa unaʼapüjatkat akumajuushikat nütüma Jehová, chi Maleiwakai, eejatü wüiʼiya. Je tü wüikat, keʼikeʼerüinrü maʼi sümaa yalayalain maʼi suulialeʼeya tü kasakat süpüshua. Sümakalaka joo tü wüikat sümüin tü jietkat: ¿Jamüsü taaʼin nünüiki Maleiwa jümüin? ¿Shiimüinsaʼaya nümüin jümüin nnojoliinjanain jiküin süchon tü wunuʼuliakat süpüshua yaakat suluʼu tü apainkat? mataasü. Süsouktakalaka tü jietkat shiʼipajee tü wüikat: Nnojo, eesü süpüla weküin süchon tü wunuʼuliakat süpüshua yaakat suluʼu tü apainkat. Shia neʼe apülajünaka woulia, tü wunuʼu yaa pasanainkat sünain tü apainkat süpüla nnojolüinjatüin weküin süchon. “Müleka jiküle shia, jaʼitakaje neʼe jipettüle shia, shiimüinshaana ouktajanain jia sütüma”, müshi chi Maleiwakai wamüin. Shiasaʼa jooluʼu sünüiki tü wüikat: Nnojo. Nnojotsü shiimüin tia. Nnojoleena jia ouktüin. Müleka jiküle süchon tü wunuʼukot, kekiijeena maʼi jia süpüla kasa süpüshua. Meena aka jia Maleiwakai sünain jiyaawatüin saaʼu tü anasükat je tü mojusükat. Müsüjeseʼe niyouktüin süpüleerua jiküinjatüin suchon tü wunuʼukot sümataalakalaka tü wüikat».

Michelle: Anashii wekirajaale süchiki tü paashajeʼerüitpakat. Sünain tü pütchikat aküjünüsü saashajaain wanee wüi sümaa Eva. Aküjünüsü suluʼu tü Bibliakat niain chi Yolujaakai, chi Satanás münakai aashajaain sümaa Eva sükajee wanee wüi. c Nüsakirüin Eva süchiki jamüin nnojoluinjatka neküin süchon tü wunuʼukat naashin Maleiwa. ¿Kaseerü alataka nümüin Adán sümaa Eva nnojoliire noonooin sümaa nünüiki Maleiwa?

Sofía: Outajana naya.

Michelle: Müsiaʼaya. Süchikijee tia nüküjaka wanee alawaa chi Yolujaakai nüchiki Maleiwa. Jülüja paaʼin tü nümakat: «Nnojoleena jia outuin». Sutuma tü nümakat alaa chi Maleiwakai naashin.

Sofía: Nnojotyülia taapüin tia pütchikat.

Michelle: Süpüla sütüjaanüin saaʼu alaale chi Maleiwakai alatüinjatü wainma juya. ¿Pütüjaa aaʼu jamüin maka tia?

Sofía: Jamüin.

Michelle: Teʼitaain paala pümüin wanee sukuwaʼipa. Jamüsüjaʼa tantüle pipialuʼumüin sümaa tamüin pümüin: «Katsüinsü maʼin taya puulia». ¿Kasa paaʼinrajatka süpüla pütüjaain saaʼu katsüinre taya?

Sofía: Anain maʼaka wayalerüle wanee kasa eekai jawatüin.

Michelle: Shiimain tia pümakat. Wayalereerü piamaleʼeya wanee kasa eekai jawatüin, watüjaajeetka saaʼu jaralüin katsüin.

Sofía: Mapajeʼe shia paashin.

Michelle: Jama «alaa türa wayuukat» tamüle pümüin. ¿Aashin naataitpain sukuwaʼipa tia?

Sofía: Shiimain.

Michelle: Nnojotsü atüjaanüin saaʼu lotule nukuwaʼipa wanee wayuu sünainjee neʼe niyalerüin wanee kasa eekai jawatüin.

Sofía: Müsüsaʼaya.

Michelle: Alatüinjatü kojuya juya süpüla sütüjaain saaʼu wayuu lotuin pukuwaʼipa.

Sofía: Shiimainpejeʼe tia.

Michelle: Suluʼu tü wetsiikulo waashajeʼerüitpakat, ¿nüküjainche chi Yolujaakai pülaleʼeinña maʼin nia nuulia Maleiwa?

Sofía: Nnojo.

Michelle: Nnojotsüjeʼe kapüleein nümüin Maleiwa niiʼiyatüin pülain maʼin nia nuulia chi Yolujaakai. Tü nüküjakat Satanás shia alaain chi Maleiwakai naashin. Müshi nümakai aaʼin sümüin Eva: «Naʼalainpalasüsa pia, shiimainjaʼa tü taküjakat pümüin».

Sofía: Müsüla shia.

Michelle: Sutuma kekiin Maleiwa nütüjaa aaʼulu alatüinjatüin wainma kaʼi süpüla sütüjaanüin aaʼu nnojoluin alaain nia. Sütüjaaneetka aaʼu alaain Satanás.

Sofía: Outapa Eva wayaawatüin saaʼu shiimain tü nümakat Maleiwa.

Michelle: Nnojotsü shiain neʼe nüküjain Satanás alaain Maleiwa. ¿Kasa maa nüküjakat Satanás sümüin Eva saashin tü wetsiikulokot 5?

Sofía: Neküle süchon tü wunuʼukot kekiijeena naya süpüla kasa süpüshuaʼa.

Michelle: Müsian. Naashin chi Yolujaakai neküle süchon tü wunuʼukot meena naya maʼaka naaʼin Maleiwa sünain nayaawatüin saaʼu tü anasükat jee tü mojusükat. Nüküjainña nüpülajüin Maleiwa kasa anasü suulia wayuu.

Sofía: Aa.

Michelle: Mojusü maʼin tia nüküjakat nüchiki Maleiwa.

Sofía: ¿Suluʼu jamüin?

Michelle: Tü nüküjeekalü achiki chi Yolujaakai sümüin Eva jee müsia namüin napüshuaʼa na wayuukana, shia nnojoluin anain chi Maleiwakai süpüla nuʼunirüin sukuwaʼipa wayuu. Süpüla sütüjaain saaʼu wayuu shiimainre tia nuuʼulaain Jehová sülatüin wainma juya. Müsüjeseʼe nuuʼulaain Maleiwa nuluwataain chi Yolujaakai saaʼu wayuu. Sutuma niain aluwataain chi Yolujaakai saaʼu wayuu, joutsü maʼin müliaa. d Anapejeʼe maʼin tü pütchi taküjeekat pümüin.

Sofía: ¿Kasa saashajaaka achiki tia pütchikat?

Michelle: Aashajaasü shia süchiki aipüralin maʼin Maleiwa, müshijeseʼe nnojoluin wattaluʼuin nia woulia müliale waya. Waashajeʼera tü nümakat David suluʼu Salmo 31:7. Wainma müliaa niʼrakat anuupejeʼe tü nümakat nümüin Maleiwa, Anasü paashajeʼerüle tia pütchikat.

Sofía: Anakajaʼa, müsü shia: «Talateerü maʼin taaʼin süka miyoʼuin taalin püpüla, pükaalinjain taya soʼu teʼrüin müliaa otta soʼu shapaain maʼin taaʼin».

Michelle: Mayaainjeʼe müliain David, anasü naaʼin süka nütüjaain saaʼu niʼrüin Jehová tü alatakat nümüin. ¿Anasüche paaʼin sutuma pütüjaain saaʼu niʼrüin Jehová tü alatakat pümüin, tü kasa nnojotkat shiyaawatüin aaʼu wayuu?

Sofía: Jamüsaʼa.

Michelle: Süküjainña tü Bibliakat nnojoleenain müliain waya waneepia. Alüʼütsü maʼin tü kaʼi nnojoleetka nuluwataain oʼu Satanás saaʼu wayuu jee nunouteerü Maleiwa tü kasa mojusü eekat nutuma Satanás. Nnojoleerü müliain tü piikat jee müsia piakat. Aleʼejeerü taya soʼu tü wane semaanakat, süpüla taküjain pümüin süchiki jamüin wanoujaka sünain choʼujaʼalaain neʼe paliʼirü kaʼi süpüla najaʼttirüin Maleiwa tü müliaakat. e

Sofía: Ajaa, anakajaʼa.