SHIʼIPA 2
Nnojo piiʼirataain suulia puʼwayuuse
«Saʼaniraapa nukuaippa wane wayuu toolo sümaa wane jierü nütüma Maleiwa, nnojotsü anain süpüla sükatajiraanüin sütüma wayuu.» (Marcos 10:9)
Keeʼireesü naaʼin Jeʼwaa nnojolinjachin niiʼirataain wanee wayuu suulia nuʼwayuuse (Miqueas 6:8). Mawalaʼatale shia nutuma shiʼitaajeerü saaʼin nünain. Süliʼrajüle nia, nnojoleerü miyoʼuin naaliin süpüla.
Maaʼulu yaa, wainma na wayuu eeʼirataakana suulia naʼwayuuse. Müsüjeseʼe paainjüinjatüin maʼin piamasü kasa süpüla waneepiain pia sümaa puʼwayuuse.
1 PAAʼINMAA MAʼIN PUʼWAYUUSE
TÜ SÜMAKAT TÜ WIWÜLIAKAT: «[Jiyaawata] saaʼu jaaʼinrüin tü kasa choʼujaakat maʼin» (Filipos 1:10, TNM). Alanaʼaleeinjatia putuma tü pukuwaʼipakat sümaa puʼwayuuse. Shiainjatü palajanaka putuma.
Nücheküinreʼe Jeʼwaa shiainjatüin paaʼinmaachoin puʼwayuuse otta talatajiraain pia sümaa (Eclesiastés 9:9). Pansaasü nünüiki Jeʼwaa süchiki paaʼinmaachoinjatüin puʼwayuuse waneepia otta püchajaainjatüin tü talatajatkalü amaa shia (1 Corinto 10:24). Shiʼrüinjatü choʼujaain otta kojutüin shia pümüin.
TÜ EEKAT SÜPÜLA PAAINJÜIN:
-
Pülatira kaʼi sümaa puʼwayuuse otta paaʼinmaa maʼin tü sümakat pümüin
-
Jülüja jaaʼin tü jukuwaʼipakat piamaleʼeya
2 PAAʼINMAJA TÜ PAAʼINKAT
TÜ SÜMAKAT TÜ WIWÜLIAKAT: «Chi eekai niirakaain sümüin wane jierü sümaa keeʼireein naaʼin amaʼüjirawaa sümaa, shiimüin sünain [kaainjalaichipain] nia wanaa nümaa eekai nümaʼüjaain» (Mateo 5:28). Nikiiruʼukuʼu nümüle wanee wayuu kakuwaʼipain nia sümaa wanee jierü naata, müsü niiʼiratakai saaʼin nuʼwayuuse.
Waaʼinmajüinjatü tü waaʼinkat naashin Jeʼwaa (Proverbios 4:23; Jeremías 17:9). Süpüla puuntüin tia, jülüjeesü paaʼin kasain pünajüin (Mateo 5:29, 30). Shia püshata nukuwaʼipa Job, niʼitaain nüpüleerua nnojoluinjatüin niirakaain sümüin wanee jierü shiiʼiree jameein nia sümaa (Job 31:1). Piʼitaa suluʼu paaʼin nnojoluinjatüin pünajüin shiyaakua wayuu maichesat otta amaʼüjiraaka sukuwaʼipa. Otta nnojo puuʼulaain sujutuuin suluʼu paaʼin anajüin pümüin wanee jierü naata.
TÜ EEKAT SÜPÜLA PAAINJÜIN:
-
Piiʼiyata süka pukuwaʼipa nnojoluin piiʼirataweein suulia puʼwayuuse
-
Kapüla paaʼin tü alatakat sümüin puʼwayuuse otta puuʼulaa suulia wanaawain paaʼin sümaa wanee wayuu nnojotka puʼwayuusein