Waʼatapajashaatain kashiwai shiʼitaanüin tü programa jee tü videoirua suluʼukat JW Broadcasting. Kapüleepejeʼe namüin na wawalayuu chakana África nanajüinjatüin shia suluʼupünaa internet. ¿Jamüsü kapüleeka tia namüin?

 Nnojotsü eein maʼin internet suluʼu wainma mma chaa África. Eere eein joo shia eesü matsüinre shia jee kojutule shia. Soʼu wanee kaʼi, wanee wawala alapalaakai naaʼu na wawalayuukana chaa Madagascar nüdescargaajüin tü programa ojuʼitakat kashiwai suluʼu JW Broadcasting eere süchekajünüin saaʼu internet, nuwalaajüin chia wawalakai 16 dólar a saaʼu nüdescargaajüin tia. Alatüsü tia nneetkat suulia tü nükanajakat wanee wayuu sünain tü niʼyataainkat soʼu wanee semaana.

 Mayaainjeʼe müin tia wainma wayuu chaa África anajaka JW Broadcasting sümaa nnojoluin internet namaʼana. ¿Jamakuwaʼipat süpüla nanajüin shia?

 Soʼujee tü juyakat 2017, na kepiakana chaa África uuchijeeruʼu sünainjee tü isashiipaʼakat Sahara, eesü süpüla nanajüin JW Broadcasting suluʼu wanee canal. Antüsü tia señalkat sünainjee wanee satélite süpüla sünajünüinjatüin suluʼupünaa telewisoot. Eeʼiyatünüsü tia waneepia masaloui suluʼu 16 anüikii.

 Süpüla nountuin tia, na aküjaliikana pütchi nüchiki Jeʼwaa naʼanapirüin saaʼu nneerü wanee canal süpüla shiiʼiyatünüin JW Broadcasting suluʼupünaa telewisoot sükajee tü señal antakat sünainjee tü satélitekat. Tia señalkat antüsü suluʼumüin 35 mma chaa África uuchijeeruʼuka sünainjee tü isashiipaʼakat Sahara. Achekajünüsü 12.000 dólar kashiwai saaʼu tia. Eesü kaʼi eere suwalaajünüin sooʼomüin nneerü süpüla shiiʼiyatünüin sünain wane canal tü aainjünakat soʼu kaʼikat tia, maʼaka saaʼin tü outkajawaakat miyoʼu jee tü outkajawaa eekat sutuma nüntüin chi wawala aluwataanakai eejeere sukumajünüin tü waʼyataainkat.

 Wainma na wayuu anajakana tia canalkat, wayuu anoujashii jee wayuu manoujainsalii. Wainmapejeʼe wawalayuu nnojotka nneerü namaʼana süpüla nayaʼlajüin tü kasa choʼujaakat süpüla nanajüin tia canalkat. Müsüjeseʼe shiʼitaanüin antena suluʼu 3.670 Piichi Outkajaalee süpüla saapaain tia señalkat, 70 dólar sülia wanee antena sümaa shiʼikajaanüin shia suluʼumüin tü Piichi Outkajaaleekat müleka eere telewisoot. Nnojorüle eein shia achekajünüsü 530 dólar. Sutuma tia eesü süpüla nanajüin na wawalayuukana JW Broadcasting suluʼu tü Piichi Outkajaaleekat.

 Talatüshii maʼin na wawalayuukana sükajee tü canalkat JW. Anuu nünüiki wanee laülaashi napüleerua na wawalayuukana chaa Camerún: «Tü nanajakat na tapüshikana suluʼupünaa tü canalkat JW müsü aka saaʼin maná ousütünaka anain suluʼu wanee mma isashiipaʼa». Anuu tü nümakat chi wawalakai Odebode chejeʼewai nia Nigeria: «Kottushii waya süpüla wanajüin tü canalkat JW apünüintua süpüla semaanaka. Naʼatapajüin maʼin na tachonniikana süntüin tia kaʼikat. Jee soʼu wanee kaʼi naatajatü nanajee amüinrü shia». Anuu tü sümakat Rose chejeʼewat shia Nigeria: «Tanajapuʼuin maʼin paala noticiero, eekajasaʼa maaʼulu shia kamalainka tamüin tanajüin tü canalkat JW. Jamüsüjaʼa tanajapa noticiero üttüsü taa’in neˊe sünainjee sümaa kakuwain taaʼin sutuma tü kasa te’rakat. Eekajasaʼa sutuma tü eeʼiyatünakat suluʼu tü canalkat JW anasü taaʼin sutuma, kamalainshaatasü maʼin tamüin. Shia wanee kasa anasü naapaka Jeʼwaa wamüin».

 Nüküjain wamüin wanee wawala alapalaakai naaʼu na wawalayuukana chaa Mozambique shiyaʼlajünüin tü kasa choʼujaakat süpüla eeinjatüin tü señalkat suluʼu waneirua Piichi Outkajaalee süpüla sünajünüinjatüin tü canalkat JW. Antüshii na wawalayuukana wanee oora süpülapünaa suʼttüin tü outkajawaakat süpüla nanajüin JW Broadcasting.

 Soʼu tü juyakat 2019, soʼunnaa tü outkajawaakat miyoʼu eere nantüin wawalayuu naatakana oumain chamüin Johannesburgo (Sudáfrica), eeʼiyatünüsü suluʼupünaa tü canalkat JW waneirua pütchi aküjünaka sünain tia outkajawaakat namüin wawalayuu suluʼu mekietsat mma. Anuu nünüiki Sphumelele aʼyataashi nia suluʼu Departamento Local de Broadcasting suluʼu tü Weteet chajatkat Sudáfrica: «Eeʼiyatünapuʼusü tü pütchi aküjünakat sünain tü outkajawaakat miyoʼu suluʼupünaa internet, kojutupejeʼe maʼin tia. Eekajasaʼa maaʼulu nnojotsü wakataajüin wainma nneerü sünain tia süka eeitpain tü canalkat JW».

 Sutuma tü nneerü jüsülajakat eesü süpüla nanajüin na wawalayuu chajanakana África tü canalkat JW Broadcasting sükajee tü señal suluʼujeejatkat tü satélitekat. Waapashaatain analuʼut jümüin saaʼujee tü nneerü jüsülajakat suluʼupünaa donate.dan124.com süpüla shikirajünüin wayuu sainküin mma.