EESÜ wanee wayuu kanüliaka Doreen, moʼoopünaasü wanaa sümaa süküjünüin sümüin eein wanee tumor cerebral outasiroʼu nünain Wesley, chi suʼwayuusekai, eeyaai neʼe wayuuin miyoʼuin nia, 54 nuuyase. * Naashin na tottootkana, palitchon neʼe kashi katajachin oʼu. Müsü Doreen: «Wattasü taaʼin soʼu kojuya semaana sutuma, nnojotsü tanoujayaain tia münakat tamüin. Mataasü nnojotkai tayain alatüin amüin tia. Yapawalain joo taya süpüla tia».

Tü alatakat sümüin Doreen alatüsü sümüin wayuu süpüshuaʼa. Eesü süpüla süntajaain wanee ayuulii outasiroʼu wanain. Eesü wayuu anaka, matüjainka akulajawaa sünain aaʼinmajaa wanee süpüshi kanainkat wanee ayuulii mepisat. Kapüleepajaʼa maʼin aaʼinmajaa wanee wapüshi ayuuikai. ¿Kasa naaʼinrajatka nüpüshi chi ayuuishikai süpüla natütüleʼerüin naaʼin jee süpüla naaʼinmajüin nia? ¿Kasa naaʼinrajatka na aaʼinmajüliikana suulia naapüin naaʼin sünain tü mojaakalü aaʼin? ¿Kasa naaʼinrajatka natüjaapa saaʼu nülüʼülüin maʼin süpüla outaa? Wekirajaa sünain jamüin kapüleeka maʼin maaʼulu aaʼinmajaa wanee wayuu kanainka wanee ayuulii outasiroʼu.

Jamüsüjaʼa soʼu tü sien juya alatüitpakat, nnojotpuʼusü kakaliain katüin soʼu wayuu, jaʼitakajeʼe suluʼu tü mma eere washinnuuin wayuu. Mamaʼajaapuʼusat wayuu sutuma wanee ayuulii jee shiale sutuma pasiruwaain. Palitchon na wayuu oʼuninnapuʼukana pitaaraluʼumüin, eepuʼushii na wayuu aaʼinmajakana napüshi eekai mayein maʼin jee outaʼatshii neʼe naya nepialuʼu.

Maaʼulu yaa, eeitpa epinase natuma na cientiificokana süpüla kakaliain katüin soʼu wayuu, jaʼitairü ayuulin maʼin shia. Kepisü maaʼulu tü ayuulii mamaʼajaapuʼukalü atuma wayuu sümaiwa,  eeitpa süpüla kakaliain katüin soʼu. Nnojotpejeʼe anaʼleein wayuu sutuma tü epinase aapünakat namüin. Eesü wayuu mojuleekalia sutuma wanee ayuulii sünainka, eesü isale maʼin süchiki sukutulaain sutuma alin maʼin shiʼiruku sutuma. Suluʼujee tia, kapüleesü aaʼinmajaa wayuu eekai ayuulin.

Wainmaleesia wayuu outaka pitaaraluʼu noulia na ayuuishii aaʼinmajünakana nepialuʼu. Maaʼulu yaa, wainma na nnojoliikana atüjaain saaʼu jamüin nukuwaʼipa wanee wayuu nülüʼütpa süpüla outaa. Otta palitchon na aakatkana apüshi noʼupala. Nnojorüle natüjaain saaʼu na wayuukana tü naaʼinrajatkat süpüla naaʼinmajüin wanee napüshi eeka mayein maʼin, kapüleejeerü namüin jee shapaajeerü naaʼin. ¿Kasa akaaliinjeenaka naya?

Wainma na wayuu shapaakana aaʼin natüjaapa saaʼu eein wanee ayuulii outasiroʼu nünain wanee napüshi maʼaka saaʼin tü alatakat sümüin Doreen. Sutuma shapaain naaʼin, mmoluin naya otta mojuin maʼin naaʼin, ¿kasa naaʼinrajatka süpüla eejiraain naya sümaa tia? Anuu nünüiki wanee wayuu aʼyataapuʼuka waneepia nümüin Maleiwa: «Püküja maa wamüin wayaawataiwa saaʼu jeʼrain kaʼi tü katüinjatkalü oʼu waaʼin süpüla kekiin waya sünain tü waaʼinrajatkat» (Salmo 90:12, TNM). Puchunta maʼin nümüin Maleiwa süpüla anainjatüin sukuwaʼipa putuma naaʼinmajia chi püpüshi alüʼütkai süpüla naakalüin.

Eeshi süpüla püsakirüin nia jaralinjachin nüneeküin süpüla naashajaain nüpüleerua mayeinpa maʼin nia. Jaashajaale süchiki tü nüchekakat chi ayuuishikai, nnojoleerü eein mojujirawaa otta nnojoleerü mojuin maʼin jaaʼin saaʼujee tü jaaʼinrajatkat nüka mayeinpa maʼin nia. «¿Pücheküin saaʼalijüin paaʼin maakina suluʼu pitaat, jee shiale saapünüin pümüin wanee tratamiento?», eesü süpüla müin jünüiki nümüin. Pansaale jünüiki nümüin chi jüpüshi ayuuikai, jütüjaweerü saaʼu tü jaaʼinrajatkat süpüla jaaʼinmajüin nia mayeinpa maʼin nia. Müsü tü Wiwüliakat: «Mojeerü sukuwaʼipa wanee kasa nnojorüle saashajaanüin achiirua palajana» (Proverbios 15:22, TNM).

Chi aaʼinmajüikai, nütütüleʼerüinjatü naaʼin chi ayuuishikai. Choʼujaasü nütüjaain saaʼu chi ayuuishikai alin nia apüla jee nnojoluin nümüiwaʼain nia. ¿Kasa eeka süpüla saainjünüin? Eesü süpüla saashajeʼennüin karaloʼuta nümüin jee shiiʼirajünüin muusika kamalainka nümüin, tü atütüleʼerüinjatkat naaʼin. Eeshi eekai anain nümüin naapaanüle ajapü jee naashajaanüle amaa.

Na anaʼlaakana wanee wayuu mayeinka maʼin, anasü naküjüle nümüin jaraliin naya. Müsü wanee pütchi ashajünaka suluʼu karaloʼuta: «Ayatüsia naapüin pütchi wanee wayuu mayeinka maʼin. Mayaainjeʼe eein süpüla müin nutunkakai aaʼin,  naapüinya neʼe tü pütchikat. Müshiijeseʼe nnojoliinjanain jia yootuin nüʼütpaʼa süchiki wanee kasa nnojotka jaashajaweein achiki nümaa, jaʼitaichi nutunküin jiʼrüin».

Eeshii süpüla juʼuraajüin nümaa. Saashin tü Wiwüliakat, müliashi maʼin atumawaa Pablo namaa na nümaajanakana otta neʼrüin tü outaakat nooʼomüin. ¿Kasaka naaʼinrüin? Nuchuntüin Pablo namüin na anoujashiikana noʼuraajüinjanain napüleerua (2 Corinto 1:8-11). Shapaale maʼin jaaʼin otta mayeinre maʼin jia sutuma wanee ayuulii, jütateerü jaaʼin juʼuraajüle süka süpüshuaʼa jaaʼin.

Mojushaatasü waaʼin weʼrüle outajachin wanee wapüshi. Makaʼa wakuwaʼipa shia süka nnojoluin suluʼuin waaʼin outajanain waya. Nnojoishii akumajünüin waya süpüla müinjatüin wakuwaʼipa (Roma 5:12). Waʼünüü tü outaakat saashin tü Wiwüliakat (1 Corinto 15:26, TNM). Müsüjeseʼe wayoutüin maʼin outuin wanee wapüshi.

Watüjaale saaʼu tü alatajatkat nümüin wanee wapüshi sutuma tü ayuulii nünainkat, wakaaliinjeechi nia suulia shapaain maʼin naaʼin otta suulia müliain maʼin naaʼin. Tü nukuwaʼipakat wanee wayuu nülüʼütpa süpüla naakalüin, aküjünüsü suluʼu tü pütchikat «Nülüʼütpa süpüla outaa». Soʼutku tü aküjünakat sünain tia pütchikat, eesüjaʼa süpüla sülatüin nümüin wanee wayuu kanainka ayuulii mepisat. Nnojotpejeʼe wanaawain tü aikat nanain na ayuuishiikana, jaʼitairü wanaawain tü naʼlechekat.

Süchikijee outuin wanee wapüshi, anashii waashajaale nümaa wanee waʼaleewain akaaliinjeeka waya. Na wayuu aaʼinmajakana chi ayuuishikai otta na nüpüshikana, choʼujaasü sümüliannüin naaʼin. «Anaichipa nia, nnojoluichipa müliain», eesü süpüla müin wanüiki namüin. Süka niain Maleiwa Kakumalain waya, nüküjain wamüin nnojoluin kasain natüjaain aaʼu na outushiikana (Eclesiastés 9:5).

Choʼujaasü weʼitaain waaʼin nünain Maleiwa wanaa sümaa waaʼinmajüin wanee wapüshi kanainka ayuulii mepisat otta süchikijee naakalüin. Nümülialeerü paaʼin Maleiwa sükajee nanüiki na wayuukana otta tü naaʼinrakat püpüleerua. Anuu sünüiki Doreen: «Nnojotsü mojushiin tamüin takaaliinjünüin. Wainma maʼin na akaaliinjakana waya. Tatüjaa aaʼu tayaka nümaa chi taʼwayuusekai sünain müin nünüiki Jeʼwaa wamüin: ‹Anii taya jümaa süpüla takaaliinjain jia›. Nnojoleerü motuin taaʼin tia».

Nia neʼe Jeʼwaa atüjaka aaʼinmajaa wayuu. Nütüjaa aaʼu Jeʼwaa tü wamülialakat süka niain chi Kakumalakai waya. Keeʼireesü maʼin naaʼin nükaaliinjain waya sümaa nütütüleʼerüin waaʼin süpüla eejiraain waya sümaa tü alatakat wamüin. Naapüin nünüiki Jeʼwaa wamüin sünain najaʼttirüinjatüin tü outaakat otta nüsoʼireʼerüinjatüin saaʼin tü outusükalüirua (Juan 5:28, 29; Alateetkat Mapeena 21:3, 4). Nikeraajapa Maleiwa tia, meerü wanüiki maʼaka naaʼin Pablo: «Nnojoliinapa jooluʼu waya mmolüin seema tü ouktaakat, süka nükanajüitpain shia chi Maleiwakai» (1 Corinto 15:55).