Miguel jee «san Miguel» maʼaka süküjain waneirua iküleesia, shia tü nünüliakat Jesús süpülapünaa jee süchikijee yaajachin nia mmapaʼa saashin tü Bibliakat. a Aküjünüsü suluʼu tü Bibliakat nüʼülüjüin Miguel nümaa Satanás naaʼujee Moisés süchikijee outuin nia otta akaalinjünüshi wanee aapiee nutuma eʼikajaainjachikai wanee pütchi nümüin Daniel, chi nünüikimaajachikai Maleiwa (Daniel 10:13, 21; Judas 9). Kojutusü nümüin Miguel laülaain Jehová otta atkaashi nia namaa na nüʼünüükana Maleiwa. Müsüjeseʼe maluʼuluin tü nünüliakat «¿Jarai maʼaka naaʼin Maleiwa?» (Daniel 12:1; Alateetkat Mapeena [Apocalipsis] 12:7).

 Wekirajaa joo sünain jamüin watüjaka saaʼu niain Jesús, chi sülaülajanashikai aapiee.

•   «Miguel, chi sülaülajanashikai aapiee» (Judas 9). Piamasü neʼe tü wetsiikulo aküjakat tia anülieekat. Sünain tia nnojotsü aküjünüin kojuyashiin naya makalaka waneeshiain neʼe chi aapiee sülaülajanashikai aapiee. Müsü sünüiki wanee wetsiikulokot: «Wanaa sümaa weenaküneenain nütüma Cristo, aapüneerü shiʼira nojontoroyoise chi Maleiwakai ooʼulaka nünüiki chi sülaülakai tü aapieekalüirua» (1 Tesalónica 4:16). Saashin pütchikat tüü aapüneerü nünüiki Jesús, chi sülaülakai aapiee. Makalaka niaʼinña neʼe Jesús, chi Miguel münakai.

•   Nia aluwataaka Miguel naaʼu na aapieekana chaa iipünaa. Miguel namaa na nümaajanakana «atkaashii naya nümaa chi kayuushikai», chi Yolujaa münakai (Alateetkat Mapeena 12:7). Kaawainsü tü aʼyatawaa aapünakat nümüin chaa iipünaa. Süküjain tü Bibliakat niain wanee laülaashi kojutukai amüinñu otta ekiipüʼü nia (Daniel 10:13, 21; 12:1). Sükajee tia anülieekalüirua wayaawata aaʼu «niain sülaülashikai tü aapieekalüirua chaa iipünaa». Müsia neʼe nünüiki David Aune, wanee ekirajaakai sünain tü Ashajuushikat Nuevo Testamento.

   Waneeshia neʼe chi aküjünakai anülia suluʼu tü Bibliakat kaawainkai maʼin sünain aluwatawaa naaʼu na aapieekana. «Soʼu tü kaʼi niiʼiyataainjachikat oʼu chi Wasenyotsekai Jesucristo sümüin wayuu chajee iipünaajee namaa na aapiee pülashiikana maʼi pasanain sünain wane suwarala siki chuwatsü maʼi» (2 Tesalónica 1:7, 8; Mateo 16:27). Anuu sünüiki 1 Pedro 3:21, 22 nüchiki Jesús: «Oʼunushi nia chaa iipünaamüin nünainmüin chi Maleiwakai, süpüla eeinjachin nia nikialuʼujee sünain laülaain nia saaʼu kasa süpüshua, sünain jüüjüüin namüin na aapieekana je na laülaayuushiikana napüshua». Miguel nia neʼe Jesucristo, nnojoishii peʼipolooin naya piamaleʼeya sünain aluwatawaa naaʼu na aapieekana, waneeshia neʼe nia.

•   «Atamaajeechi Miguel» soʼunnaa «wanee müliaa miyoʼu maʼin» eejeetka (Daniel 12:1). Tü pütchi «atamaweerü» makat suluʼu tü karaloʼutakat Daniel shia süküjeeka achiki naaʼinrüinjatüin wanee aluwataai wanee kasa anaka maʼin (Daniel 11:2-4, 21). Jesucristo «chi kanüliakai pütchi» jee «chi Señotkai aluwataakai pülashikai» najaʼttireena napüshuaʼa na nüʼünüükana Maleiwa otta naaʼinmajeena na aʼyataakana nümüin Jehová (Alateetkat Mapeena 19:11-16). Naaʼinreerü shia soʼunnaa tü müliaa miyoʼu eejeetkat. «Nnojotsü eeirüin wanee müliaa makalü aka saaʼin tia soʼujee sukumajünüin wayuu sünainmüinreʼeya maaʼutpünaa» (Mateo 24:21, 42).