El 4 de abril de 2022 pe secretario general de las Naciones Unidas, António Guterres, ojapo peteĩ diskúrso oñeʼẽva pe infórme omeʼẽvare pe Grupo Intergubernamental de Expertos sobre el Cambio Climático. Haʼe heʼi: “Yvyporakuéra ningo ojapo heta mbaʼe koʼẽrõite opátava peteĩ desástre klimátikope. Heta siuda tuicháva oñeinundapáta ha opytáta y guýpe, hakuetereíta arakaʼeve oikoʼỹ haguéicha, oúta umi torménta tuicháva ha ndevaipa jepéva, opárupi ofaltapáta y ha odesapareséta un millón de espésie umi plánta ha animalkuéragui. La verda ke ndahaʼéi ambotuichánteva hína la oikótava. Umi sientífiko ohechakuaa sarambi oikotaha ko yvýgui umi autorida osegínterõ oipuru vai umi rrekúrso oĩva ko planétape ojejapo hag̃ua enerhía”.

 “Umi sientífiko oavisa porãma de ke umi áño oúvape pe kámbio klimátiko káusare hakuetereíta, ha upéva tuicha operhudikáta haimete entéro umi párke nasionál oĩvape Estados Unídospe. Koʼã mbaʼe vai ikatúva oiko umi 423 párke nasionál rehe ojogua voi umi profesía bíblicape: ikatu oiko inséndio, inundasión, ikatu hykupa umi kápa de iélo, pe mar tuichave rupi ohóvo ikatu ombodesaparese umi yvy isekoha, ha avei pe temperatúra ojupieterei rupi ikatu hakuetereive”. (“Flooding Chaos in Yellowstone, a Sign of Crises to Come” [Caóticas inundaciones en Yellowstone, un aviso de las crisis que vendrán], The New York Times, 15 de junio de 2022).

 ¿Ikatúnepa oñesolusiona koʼã provléma tuichaitéva ikatúva ohundi ñane planéta? Oiméramo ikatu, ¿mávapa ojapóta upéva? Eñatendemína mbaʼépa heʼi la Biblia koʼã mbaʼére.

 La Biblia heʼi Ñandejára ‘ohunditaha umi ohundívape ko yvy’ (Apocalipsis 11:18). Ko téxto bíblicogui ñaaprende mbohapy mbaʼe:

1.  1. Yvyporakuéra tuichaiterei operhudikáta hague ko yvy.

2.  2. Umi perhuísio ojejapóva pe médio ambiéntere oñesolusionataha.

3.  3. Ñandejára osolusionataha koʼã provléma, ndahaʼéi yvyporakuéra.

 Ñandejára Ñeʼẽ oasegura ñandéve ‘ko yvy opytataha pára siémpre’ (Eclesiastés 1:4). Arakaʼeve ndopytamoʼãi nandi, siémpre oĩta oikóva pype.

•   “Umi hembiapo porãvape oñemeʼẽta ko yvy, ha oikóta pype opa ára g̃uarã” (Salmo 37:29).

 Ñane planéta ojerrekupera jeýta, ku okueraiterõguáicha, ha oikóta chugui peteĩ lugár ne porãva.

•   “Pe ñu ha pe yvy isékova ovyʼáta, pe desiérto ovyʼaitereíta, henyhẽta yvoty porã porãgui” (Isaías 35:1).