Káda áño heta ermáno haʼéva siérvo espesiál de tiémpo kompléto, oĩva ko múndo tuichakuére, oho pe Eskuéla Bíblica de Galaad de la Watchtówerpe. Ko eskuéla ojejapo pe Centro Educativo de la Watchtówerpe, opytáva Patterson Nueva Yórkpe. a Ko eskuélape umi estudiánte oaprende mbaʼéichapa ikatu okumpli porãve umi asignasión orekóva Jehová organisasiónpe. Pe entrenamiénto orresivíva hikuái oipytyvõ chupekuéra omombarete ha omokyreʼỹ hag̃ua umi kongregasión ha sukursál oĩvape ko múndo tuichakuére.

 Galaad ningo añetehápe haʼe peteĩ eskuéla internasionál. Por ehémplo, pe kláse 147 ojejapo vaʼekue 2019-pe oreko kuri 56 estudiánte oúva 29 paísgui. Umi ohóva Galaádpe oĩma hína kuri pe servísio espesiál de tiémpo komplétope, ha oservi betelítaicha, prekursór espesiál, superintendénte de sirkuíto térã misionériocha.

 Umi preparatívo ojejapo heta tiémpo oñepyrũ mboyve pe primer día de kláse. Por ehémplo, pe Departamento de Viajes oĩva pe sentrál mundiálpe ojogua umi pasáhe de avión umi oñeinvita vaʼekuépe g̃uarã ko eskuélape. Pe kláse 147-pe g̃uarã ojegasta kuri káda estudiánte extranhérore 1.075 dólar (7 millón imédio de guaranírupi) ou hag̃ua Páttersonpe ha upéi oho jey hag̃ua. Umi estudiánte oho vaʼekue ísla Salomóngui ojagarra vaʼerã kuri 4 avión og̃uahẽ hag̃ua Páttersonpe, ha upéi 3 avión jey oho hag̃ua ipaíspe. Upéicharõ oviaha hikuái mas de 35.400 kilómetro. Ipasahekuéra ovale kuri mas de 2.300 dólar (16 millón de guaranírupi) káda uno. Ikatu hag̃uáicha ojeaorra, pe Departamento de Viajes oipuru peteĩ prográma de komputadóra otopa hag̃ua umi pasáhe ivaratovéva, ha ojerreserva rire jepe peteĩ pasáhe, pe prográma osegi oheka heta semánare térã mésere voi oiméramo oguejyve la pasáhe. Oĩ avei umi oviaha pyʼỹiva ha oganáva umi púnto ojekovra varatove hag̃ua chupe peteĩ vuélo. Haʼekuéra odonáramo koʼã mbaʼe Jehová organisasiónpe, pe Departamento de Viajes oipuru umíva ikatu hag̃uáicha osẽ varatove umi vuélo.

 Heta umi ohóva Galaádpe oikotevẽ vísa oike hag̃ua Estados Unídospe. Upévare pe Departamento de Asuntos Legales oĩva pe sentrál mundiálpe oipytyvõ chupekuéra okonsegi hag̃ua pe vísa de estudiánte. Pe vísa ha umi ótro dokuménto oñekotevẽva ohupyty 510 dólar (3 millón imédio de guaranírupi) por estudiánte.

 ¿Mbaʼéichapa enterovépe ñanepytyvõ pe entrenamiénto orresivíva koʼã estudiánte? Hendra Gunawan oservi ansiánoramo peteĩ kongregasión oĩvape Ásiape, suréste gotyo, oĩháme peteĩ matrimónio oho vaʼekue Galaádpe. Haʼe heʼi: “Anteve ore kongregasiónpe ndaipóri vaʼekue prekursór rregulár. Péro upéi og̃uahẽ ko matrimónio, ha haʼekuéra ikyreʼỹ ha ijaktitu porãiterei, ha upéva omokyreʼỹ ótrope ojapo hag̃ua iprekursorádo. Tiémpo rire peteĩ ermána ore kongregasionpegua oho voi pe Eskuéla de Evanhelisadórpe”.

 Sergio Panjaitan ombaʼapo peteĩ Betel oĩvape Ásiape, suréste gotyo, unos kuánto ermáno oho vaʼekuéndi Galaádpe. Haʼe heʼi: “Pe entrenamiénto orresivi vaʼekue hikuái ndahaʼéi peteĩ vendisión chupekuéra g̃uarãnte, síno oréve g̃uarã avei. ¡Hetaiterei mbaʼe ningo oaprende hikuái! Péro oiko rangue oñemombaʼeguasu umi mbaʼe oikuaávare, haʼekuéra okomparti umíva orendive. Upéva ningo oremokyreʼỹ oréve, ha upéi orehaitéma avei ikatu romokyreʼỹ ótrope”.

 ¿Mbaʼéichapa ojepaga umi gásto orekóvare ko eskuéla? Umi donasión ojejapóva rupive pe óvra mundiálpe. Heta oĩ ojapóva idonasión donate.dan124.com rupive, ha upearã oipuru umi diferénte fórma oĩva upépe oñedona hag̃ua. Roagradeseterei ningo peẽme pendepojera haguére pemeʼẽvo pene kontrivusión. Upéva rupive ningo ikatu ojesegi ojejapo ko eskuéla, oĩháme umi estudiánte oúva ko múndo tuichakuégui.