Eclesiastés 2:1-26
2 Upémarõ haʼe chejupe: “Koʼág̃a aiko porã ha ajedivertíta, péicha aikuaáta mbaʼépepa ideprovécho upéva”. Péro ahechakuaa vyroreiha.
2 Upéi haʼe: “Vyresaite ningo la jaiko japuka”.
Ha apensa: “¿Mbaʼépe piko ideprovécho peteĩ persónape la ovyʼa?”.
3 Adesidi ahecha mbaʼe iporãvapa ou jadisfrutávo pe víno,+ ha upe aja asegi chearandu. Adesidi avei ajapo umi mbaʼe ndovaléiva mbaʼeverã, ahecha hag̃ua mbaʼépa pe iporãvéva umi hénte ikatúva ojapo pe hekove mbykyete asývape.*
4 Añepyrũ ajapo heta mbaʼe tuicháva:+ amopuʼã heta óga+ ha areko heta parralty.+
5 Ajapoka umi hardín neporãmba jepéva, upépe añotỹ opaichagua yvyramáta hiʼa porã porãva.
6 Ajoʼoka yvykua tuicháva ambyaty hag̃ua upépe y, pono ofalta y umi yvyramatakuérape, okakuaa porã hag̃ua.
7 Akonsegi heta esklávo ha eskláva+ ha areko avei umi esklávo onasémava voi che rógape. Akonsegi avei heta animál, vaka, guéi, ovecha ha kavara.+ Núnka ndaipóri vaʼekue Jerusalénpe ótra persóna chéicha orekóva heta animál.
8 Añepyrũ ambyaty heta pláta ha óro.+ Ambyaty hetaiterei tesóro orekoháicha umi rréi ha umi distríto.+ Areko heta músiko opurahéi porãva, kuña ha kuimbaʼe. Umi kuña ningo ombopyʼarory kuimbaʼekuérape, ha che areko heta kuña iporã porãva.
9 Hetaiterei mbaʼe areko, ndaipóri vaʼekue Jerusalénpe+ ótro oreko hetavéva chehegui. Ha asegi avei chearandueterei.
10 Ajapo vaʼekue opa mbaʼe ajaposéva.*+ Opa mbaʼe ikatúva chembovyʼa che ajapo. Añetehápe adisfruta ha avyʼa opa che rembiapokuére. Ha upéva la che prémio hetaite ambaʼapo haguére.+
11 Péro upéi ajepyʼamongeta umi mbaʼe ajapo vaʼekuére ha apensa avei hetaite ambaʼapo pohýi hague,+ ha ahechakuaa opa mbaʼe vyroreiha.+ Haʼete voi jaikóva yvytu rapykuéri, ndaipóri mbaʼeve ovalemíva* ko yvy ape ári.+
12 Upémarõ añehaʼã aikuaa porã mbaʼépa heʼise pe arandu ha mbaʼépa heʼise la tavy ha la vyrorei.+ Ha apensa: “Mbaʼe guaʼu la ikatúva oikuaave pe persóna oúva che rire”. Opa koʼã mbaʼe umi hénte ja ojapóma vaʼekue voi.
13 Péro ahechakuaa peteĩ mbaʼépe ikuentaveha ñanearandu ke la ñandetavy,+ ikuentaveháicha ñaime hesakãháme ñaime rangue pytũmbýpe.
14 Pe iñarandúva ohechakuaa moõrupipa oho vaʼerã,*+ pe itavýva katu oiko pytũmbýpe.+ Péro ahechakuaa avei amo ipahápe peteĩchante opaha hikuái.+
15 Upémarõ haʼe che pyʼapýpe: “Oiméramo cherehe oikóta avei umi mbaʼe oikóva umi hénte itavývare,+ ¿mbaʼépe piko ideprovécho chéve la chearandueterei?”. Ha apensa: “Upéva vyrorei avei”.
16 Avave naimanduʼamoʼãi pe iñarandúvare ni pe itavývare.+ Koʼẽrõite enterove opytáta tesaráipe. Pe iñarandúva omanóta pe itavýva omanoháichante avei.+
17 Ipahápe ndachaʼevéi la vídare,+ pórke entéro mbaʼe ojejapóva ko yvy ape ári haʼete peteĩ kárga pohýi. Opa mbaʼe ningo vyrorei,+ haʼete jaikóva yvytu rapykuéri.+
18 Hetaite ambaʼapo pohýi akonsegi hag̃ua umi mbaʼe arekóva, péro ndachaʼevéi ni umi mbaʼe akonsegi vaʼekuére.+ Pórke che kosakuéra opytapa vaʼerã pe che rire oútavape.+
19 Ha che ndaikuaái haʼe iñarandútapa térã ivýrota.+ Upéicharamo jepe chupe opytapáta umi mbaʼe akonsegi vaʼekue chearandu ha ambaʼapo pohýi haguére. Péva ningo vyrorei avei.
20 Upémarõ añepyrũ añekevranta ha ajedesespera, pórke hetaitéma añehaʼã ha ambaʼapo akonsegi hag̃ua la arekóva.
21 Peteĩ kuimbaʼe ikatu ombaʼapo pohýi, oñehaʼã iñarandu, ivale ha oikuaa heta mbaʼe, péro amo ipahápe ikosakuéra opytáta ótro kuimbaʼe nombaʼapói vaʼekuépe okonsegi hag̃ua umíva.+ Péva peteĩ desgrásia. Amo ipahápe entéro mbaʼe vyrorei.
22 ¿Mbaʼe la oganáva upéicharõ peteĩ persóna ombaʼapo pohýi haguére ha ipyʼaite guive oñehaʼã rupi ombaʼapo pohýi ko yvy ape ári?+
23 Oikove aja pukukue opa mbaʼe ojapóva ogueru chupe provléma ha sufrimiénto,+ ha pyharekue entéro oiko oñekevranta ha ndaikatúi opytuʼu porã.+ Ipahápe entéro mbaʼe vyrorei.
24 Péro ahechakuaa ndaiporiha ótra kósa iporãvéva kóvagui: jakaru, jaʼu vevída ha javyʼa* ñambaʼapo pohýivo.*+ Che ahechakuaa koʼã mbaʼe ouha Ñandejáragui.+
25 ¿Oĩne piko ótro chéicha hoʼúva umi tembiʼu ha vevída iporãvéva?+
26 Ñandejára oguerohorýramo peteĩ persónape omeʼẽ chupe arandu, oipytyvõ chupe oikuaa hag̃ua heta mbaʼe ha ovyʼa hag̃ua.+ Péro pe opekávape Ñandejára omanda ombyaty hag̃ua heta mbaʼe, ha upéi omeʼẽ pe haʼe oguerohorývape.+ Entéro mbaʼe vyrorei, haʼete jaikóva yvytu rapykuéri.
Nóta
^ Térã: “unos kuánto díape”.
^ Hebréope: “che resa ojerure vaʼekue chéve”.
^ Térã: “ideprovéchova”.
^ Hebréope: “oreko hesa iñakãme”.
^ Térã: “ñane álma ohecha iporãva”.
^ Térã: “jadisfruta ñande travahokuégui”.
