KAPÍTULO 17

Mbaʼérepa ijetuʼuete chéve añeʼẽ umimbaʼe agueroviávare?

“Koléhiope ningo heta vése otoka porãiterei chéve añeʼẽ hag̃ua Ñandejárare péro ndaaprovechái.” (Caleb)

“Peteĩ jey che profesóra oporandu oréve mbaʼépa ropensa pe evolusiónre. Amyesakã rangue mbaʼépa omboʼe la Biblia, añepyrũ asosopa ha itáicha akirirĩ. Ambyasyeterei ningo upe rire ndaʼéi haguére mbaʼeve.” (Jazmín)

 OIMÉRÕ nde testígo de Jehová rehasámaneraʼe Caleb ha Jazmín ohasavaʼekue. Remombaʼe la Biblia omboʼéva ha reikuaaukase nde rapichápe, péro nderyʼái roʼysãmbáma voi repensa haguénte reñeʼẽtaha mboʼehaópe. Jahechamína mbaʼépa nepytyvõta reñeʼẽ hag̃ua pyʼaguasúpe koléhiope:

1. Reikuaavaʼerã mbaʼérepa rekyhyje. Rekyhyjérõ reñeʼẽ hag̃ua repensáta voi nosẽporãmoʼãiha ndéve. Péro ndahasyivéta ndéve reñehaʼãramo rehecha mbaʼérepa añetehápe rekyhyje.

Ekompleta hag̃ua:

● Añepyrũramo añeʼẽ koléhiope la Bíbliare, akyhyje oikórõ g̃uarã ko mbaʼe: ․․․․․

Péro ani rejepyʼapyeterei. Heta mitãrusúpe ijetuʼu avei oñeʼẽ hag̃ua imboʼehaópe umi mbaʼe ogueroviávare. Cristóbal, orekóva 14 áño omombeʼu voi: “Ndaipotaieténgo che kompañerokuéra oñembohory ha omaña vaipa cherehe”. Calébpe katu oipyʼapy ambue mbaʼe: “Akyhyje oñeporandúramo chéve peteĩ mbaʼe nantendeporãiva ha ndaikuaáirõ g̃uarã mbaʼéichapa ambohováita”.

2. Ani reguevi. Ikatúpa jaʼe rekyhyje reinteha? Nahániri, epensamína mbaʼépa oikovaʼekue Ánare, orekóva 20 áño: “Peteĩ jey che kompañerokuéra oporandu guaʼu chéve heta mbaʼe che rrelihiónre. Che amyesakã chupekuéra, péro upéi haʼekuérantema omohendapa igústope ha oñepyrũ oñembohorypa cherehe”. Nicole orekóva 17 áño heʼi: “Peteĩ che kompañéro ogueraha ibíblia koléhiope ha oñepyrũ ombojoja che bíbliare. Ohechávo  ojoavyha heta ñeʼẽme, heʼi chéve che Biblia oĩ vaiha. Ndaikuaái ningo mbaʼépa haʼéta chupe!”. a

Koʼã mbaʼe nemongyhyjétante voi. Péro umi oservíva Ñandejárape ombohováitante voi koʼãichagua situasión (2 Timoteo 3:12). Mateo, orekóva 13 áño heʼi voi: “Jesús heʼivaʼekue ojepersegitaha hemimboʼekuérape, upévare ndajahecharamói oĩrõ ndaʼijaʼéiva ñanderehe” (Juan 15:20).

3. Ou porãta avei ndéve. Oiméramo rehasa avei koʼãichagua situasiónre, mbaʼéichapa ikatu ideprovécho ndéve? Andrea, orekóva 21 áño omombeʼu: “Heta ñane irũnguéra nomombaʼeiete la Biblia, ha upévare ijetuʼuvéntema ñañemongeta hendivekuéra. Péro ñañeʼẽramo umi mbaʼe jagueroviávare, ñande voi ñantendeve umíva” (Romanos 12:2).

Nemanduʼami jey mbaʼérepa rekyhyjeve. Ha ehai mbaʼéichapa ideprovéchota ndéve rembohováirõ upéva.

1 ․․․․․

2 ․․․․․

Rejepyʼamongeta hag̃ua: Ne kompañerokuéra oikuaa porãrõ mbaʼe rrelihionguápa nde, nemboligánepa manterei mbaʼe vairã? Ajépa revyʼaitéta  pyʼaguasúpe reñeʼẽramo umi mbaʼe regueroviávare? Mbaʼéichapa upéva nemoag̃uivéta Ñandejárare? Ha mbaʼéichapa haʼe oñeñandúta ndereheve? (Proverbios 23:15.)

4. Ejeprepara. “Hekojojáva ojepyʼamongeta raẽ oporombohovái hag̃ua” heʼi Proverbios 15:28. Upéicharõ, rehechamavaʼerã mbaʼe rehépa reñemongetakuaa ne irũnguérandi ha mbaʼépa oporandúne hikuái. Upéi eheka informasión ha epensa mbaʼéichapa reiporukuaa rembohovái porã hag̃ua chupekuéra ( rrekuádro oĩva páhina 127-pe nepytyvõkuaa).

5. Nde voi eñehaʼã emoñepyrũ. Mbaʼéichapa reñepyrũkuaa? Upéva ndetéma redesidíta. Haʼete ku reho jave rejahu pisínape: Ikatu reike mbeguekatúpe térã rejepoíntema voi. Upéicha avei saʼi saʼípe reñepyrũkuaa reñeʼẽ ne irũnguérandi. Tenonderã ambue mbaʼérente, ha rembohape rehóvo, ipahápe reñeʼẽ hag̃ua la Biblia omboʼévare. Péro rehecháramo upéva ijetuʼutaha ndéve ha rejeretereíma hína, ikatu “rejepoíntema” ha reñepyrũ reñeʼẽ (Lucas 12:11, 12). Andrés  orekóva 17 áño heʼi: “Añeʼẽta jave Ñandejárare che irũnguérape, apensáma voi asẽ vaitaha, péro sapyʼánte ñane akãmente oĩ upéva, ñañepyrũ hag̃uánte ningo la ijetuʼúva”. b

6. Eñatende porãke. Rréi Salomón ohaivaʼekue: ‘Iñarandúva oñatende ojapóvare’ (Proverbios 13:16). Rehónepa rejepoi otĩvo peteĩ arroyo ipererĩhápe? Ni mbaʼevéicharõ, ajépa? Péicha avei rehecháramo ne irũnguéra oñemongetaha nendive oñembohory térã nemoĩ vai hag̃uánte, ani rembopukueterei ha esẽnte upégui. Nemanduʼákena oĩha ára ñakirirĩ hag̃ua ha ára ñañeʼẽ hag̃ua (Eclesiastés 3:1, 7).  Jesús jepe ohechakuaavaʼekue sapyʼánte iporãveha okirirĩnte (Mateo 26:62, 63).

Ha rembohováitarõ chupekuéra, eñehaʼã mbykymínte eñeʼẽ ha eñatende upe erétavare. Ñamoĩ chupe peteĩ ne irũ oñembohoryse nderehe ha heʼi: “Ha nde pio mbaʼére nderepitái?”. Nde ikatu ere chupe: “Ndarekoséi rupi kánser”. Rehecha rire mbaʼéichapa ojagarra upéva, rehechakuaáta tekotevẽpa remyesakãve térã nahániri.

Koʼã konsého jahechavaʼekue nepytyvõta reñeʼẽ hag̃ua ‘umi mbaʼe regueroviávare’ (1 Pedro 3:15, BNP). Añetehápe ijetuʼuʼimíta gueteri ndéve, péro rehupytýta heta mbaʼe porã. Epensamína Alena, orekóva 18 áño heʼívare: “Reñeʼẽramo nde jeroviáre koléhiope ijetuʼúramo jepe ndéve, revyʼaiterei upe rire, koʼýte osẽ porãmbárõ ndéve. Mbaʼérepa? Nde voi rehecha ndepyʼaguasuvemaha rehóvo ha nderekyhyjeveimaha yma guaréicha”.

PE KAPÍTULO OÚVAPE

Mbaʼépa ikatu rejapo reñandúrõ reñekevrantaitereiha nde koléhiope?

[Nóta]

TÉYSTO OĨVA LA BÍBLIAPE

‘Akóinte peñembosakoʼi pembohovái hag̃ua opa oporandúvape peẽme pende jeroviáre. Péro pejapo upéva pyʼaguapýpe ha pehechauka pemombaʼeha pende rapichápe.’ (1 Pedro 3:15, ÑÑB)

PETEĨ KONSÉHO

Ani ereséti ne kompañerokuérape mbaʼépa ogueroviavaʼerã. Upéva rangue emyesakã porãnte mbaʼépa heʼi la Biblia ha mbaʼérepa ndéve g̃uarã oĩ porã.

REIKUAÁPARAʼE?

Ikatu oĩ ne irũnguéra ohechakuaáva rejeporta porãha ha oguerohory reiko lája, péro otĩ oporandu hag̃ua ndéve ne rrelihiónre.

UMI MBAʼE AJAPÓTAVA!

Añemongetáta la Biblia omboʼévare peteĩ che kompañérondi (ehai héra): ․․․․․

Cherenduséta katuete añeʼẽramo chupe ko témare: ․․․․․

Mbaʼépa aporanduse che ru térã che sýpe ko témare? ․․․․․

NDÉPA MBAʼE ERE?

● Mbaʼérepa oiméne ne irũnguéra oñembohory jepi umi mbaʼe regueroviávare?

● Reñeʼẽ jave la Biblia omboʼévare, mbaʼérepa nde voi rehechaukavaʼerã rejeroviaha umi mbaʼére?

[Komentário oĩva páhina 126-pe]

“Ymave aikosevaʼekue che irũnguéraicha ha ndaipotái haʼekuéra chemboyke che rrelihiónre. Péro upéi ahechakuaa umi mbaʼe aaprendéva la Bíbliagui tuicha chepytyvõha avyʼa ha cherekoporãve hag̃ua. Upémarõ chepyʼaguasuve ha ndakyhyjevéima añeʼẽ hag̃ua umívare”. (Jason)

[Rrekuádro oĩva páhina 124-pe]

 Reñepyrũ hag̃ua reñemongeta

● “Mbaʼe rejapóta vakasiónpe?” [Ombohovái rire, emombeʼu chupe mbaʼépa nde rejapóta vakasión aja, pór ehémplo rehotaha peteĩ asambléape térã resẽvetaha repredika.]

● “Rehendu piko raʼe pe oikovaʼekue...? [Ikatu remombeʼu peteĩ notísia.] Mbaʼe nde repensa koʼã mbaʼére?”

● “Koʼág̃a rupi ijetuʼueterei la situasión. Ndéverõ g̃uarã, jaiko porãvénepa amo gotyove? [Ombohovái rire eporandu.] Mbaʼére ere upéva?”

● “Nde piko rejerovia Ñandejárare?”

● “Mbaʼépa repensa oikóne hag̃ua ndehegui koʼái cinco áño?” [Ehendu porã pe heʼíva ha upéi emombeʼu chupe mbaʼépa rejaposeve Ñandejárape g̃uarã.]

 [Informasión oĩva páhina 127-pe]

 (Emaña pe kuatiañeʼẽre rehecha hag̃ua osẽ hagueichaite ko párte)

Rekompleta hag̃ua

Mbaʼéichapa rembohováita?

Efotokopia hag̃ua

Mbaʼéichapa rekompletáta: Ejerure nde tuvakuéra ha ambue testígo ndeaveguápe tanepytyvõ remyenyhẽ hag̃ua. Ekalkula mbaʼépa ikatu oñeporanduve ndéve ha mbaʼéichapa rembohováita.

Tetãregua

Porandu

Mbaʼére nde nderepurahéiri pe himno? Nderehayhúi mbaʼe piko ne retã?

Mbaʼépa haʼekuaa

Ndahaʼéingo péicha. Ojepurahéi jave pe hímno ningo oñemombaʼeguasu pe tetãme, ha che Ñandejárape añoite amombaʼeguasu.

Ambue porandu

Upéicharõ nde nereñorairõmoʼãi ñane retãre?

Mbaʼépa haʼekuaa

Nahániri. Ha umi testígo de Jehová ambue tetãygua arakaʼeve noñorairõmoʼãi avei ñane retã kóntrape.

Tuguy

Porandu

Mbaʼére piko peẽ napemoĩkái tuguy?

Mbaʼépa haʼekuaa

La Biblia heʼi naiporãiha upéva. Péro oĩ heta tratamiénto ndojeporuihápe tuguy. Ha roiporúgui umíva rojehekýi heta mbaʼasýgui, pór ehémplo hepatitis ha sida.

Ambue porandu

Ha ojeʼérõ ndéve remanotaha neremoĩkáiramo? Umícha jave ningo Ñandejára neperdonáta, ajépa?

Mbaʼépa haʼekuaa

․․․․․

Redesidíva

Porandu

Fuláno ne rrelihiongua, ha haʼe ojapo. Mbaʼére piko upéicharõ nde nderejapói avei?

Mbaʼépa haʼekuaa

Ore rostudia ha roikuaa Ñandejára Ñeʼẽ heʼíva, péro káda únoma rodesidi rojapótapa térã nahániri.

Ambue porandu

Peẽ piko upéicharõ peiporavo mbaʼe mbaʼépepa peneñeʼẽrendúta?

Mbaʼépa haʼekuaa

․․․․․

Evolusión

Porandu

Mbaʼére nde nderegueroviái pe evolusión?

Mbaʼépa haʼekuaa

Ha mbaʼére piko agueroviáta? Ni umi sientífiko noñemoĩri peteĩ ñeʼẽme, hiʼarive haʼekuéra ndajeko la ontendevéva koʼã mbaʼe.

Ambue porandu

․․․․․

Mbaʼépa haʼekuaa

․․․․․

[Taʼanga oĩva páhina 125-pe]

Reñemongeta hag̃ua umi mbaʼe regueroviávare rejapokuaa mbeguekatúpe térã rejepoíntema voi