YMA ningo peteĩ majordómo oñenkarga vaʼekue okuida peteĩ ógare térã umi mbaʼe orekóvare ótra persóna.

Oĩrõ guare esklávoramo Egíptope, Jacob raʼy Josépe oñenombra vaʼekue majordómo ipatrón rógape. La Biblia heʼi voi ipatrón oheja hague “José kárgope entéro mbaʼe orekóva” (Gén. 39:2-6). Upéi, Joségui oiko rire peteĩ governánte ipoderósova Egíptope, haʼe oiporavo peteĩ majordómo hógape g̃uarã (Gén. 43:16).

Jesús tiémpope, umi hénte ijyvy hetáva pyʼỹinte oiko vaʼekue umi siuda opytávape mombyry umi ijyvýgui. Upévare haʼekuéra oiporavo vaʼekue imajordomorã, ikatu hag̃uáicha umíva odirihi umi traváho ojejapóva ijyvykuérape.

¿Mávaguipa ikatu vaʼekue oiko majordómo? Peteĩ eskritór rrománo hérava Columella, oiko vaʼekue síglo primérope, heʼi vaʼekue peteĩ esklávope oñenombra hag̃ua enkargádo, térã majordómo, tekotevẽha “oaprende porã mbaʼéichapa ojejapo umi traváho”. Tekotevẽ kuri avei “ojasegura umi travahadór okumpliha umi traváho oñemeʼẽva chupekuéra, péro ndovaléi kuri iñaña ni ojopyeterei rasa hendivekuéra”. Columella heʼi vaʼekue avei “oĩ hague ótra kósa iñimportantevéva oñehaʼarõva peteĩ majordómogui: Nopensái vaʼerã kuri haʼe oikuaapaha entéro mbaʼe ha oĩ vaʼerãha dispuésto oaprendévo hetave mbaʼe”.

Ñandejára Ñeʼẽ oipuru ehémploramo pe majordómope ohechauka hag̃ua unas kuánta kósa ojejapóva kongregasiónpe. Por ehémplo, apóstol Pedro omokyreʼỹ vaʼekue umi kristiánope oipuru hag̃ua umi mbaʼe ojapokuaáva, Ñandejára ombokatupyry rupi chupe, ‘oservi hag̃ua ótrope, pórke haʼekuéra majordómo ivaléva orresivi vaʼekue Ñandejára mbaʼeporã’ (1 Ped. 4:10, nóta).

Jesús voi oipuru vaʼekue ehémploramo pe majordómope omoĩrõ guare pe ehémplo jatopáva Lucas 16:1-8-pe. Avei, pe profesía omombeʼúvape pe señál ohechaukáva haʼe oĩmaha rréiramo, Jesús oasegura isegidorkuérape onombrataha peteĩ “esklávo de konfiánsa ha iñarandúva”, térã “majordómo de konfiánsa”. ¿Mbaʼépa hína pe traváho iñimportantevéva orekótava ko majordómo? Omeʼẽ vaʼerã Cristo segidorkuérape umi mbaʼe oikotevẽva omombarete hag̃ua ijerovia umi ára pahápe (Mat. 24:45-47; Luc. 12:42). Ajépa jaagradesete ikatu haguére ñande avei jarresivi umi puvlikasión opreparáva pe majordómo de konfiánsa, ha oĩva disponívle entéro persóna oĩvape g̃uarã ko múndope.