Jaagradesékena ha ñaporopytyvõ

LA Biblia voi heʼi ñande Ru ñanderayhuetéva Jehová ojepyʼapyha ñanderehe (1 Ped. 5:7). Ha upéva ohechauka ñandéve ñanepytyvõvo jaservi hag̃ua chupe Haʼe oipotaháicha (Isa. 48:17). Haʼe ningo ñanepytyvõse ha koʼýte jajejopy ha ñañeñandu vai jave. Jahechamína mbaʼéichapa ohechauka upéva pe léi mosáika.

Jehová ohayhu rupi isiervokuérape omoĩuka iléipe oñepytyvõ hag̃ua umi oikotevẽvape, ityreʼỹvape, umi viúdape ha ambue tetãygua oikóvape Israélpe (Lev. 19:​9, 10; Deu. 14:29). Haʼe ningo oikuaa isiervokuéra koʼág̃a rupi oikotevẽha avei oñepytyvõ chupekuéra (Sant. 1:27). Upévare, Jehová ojokuáiramo peteĩ ermánope ñanepytyvõ hag̃ua, ndajarrechasaivaʼerã. Javyʼavaʼerã katu ha jaheja tañanepytyvõ.

La Biblia heʼi avei Ñandejára siervokuéra ikatuha oporopytyvõ. Nemanduʼápa pe viudami Jesús ohechavaʼekuére témplope Jerusalénpe? (Luc. 21:​1-4.) Oiméne chupe oipytyvõrakaʼe pe léi heʼíva oñepytyvõvaʼerãha umi viúdape. Péro la Bíbliape naimanduʼái hese imboriahu haguére, ipojera haguére uvei. Upévare upe viúda oiméne ovyʼaitereirakaʼe, Jesús heʼi haguéicha “javyʼave ñameʼẽvo, ñandéve oñemeʼẽrõguágui” (Hech. 20:35). Upéicharõ mbaʼéichapa ikatu ñandepojera ha javyʼa avei? (Luc. 6:38.)

Mbaʼéichapa japagáta Jehovápe?

Pe salmísta ningo oporandu: “Mbaʼéicha piko ikatúta amyengovia Ñandejárape haʼe ipyʼaporãite haguére chendive?” (Sal. 116:12). Mbaʼéichapa Ñandejára oipytyvõrakaʼe chupe? Jehová ningo oipytyvõ chupe ‘ojepyʼapy ha vyʼaʼỹme ojechárõ guare’. Ha oñangareko voi hese ani hag̃ua ojejuka chupe. Upévare, haʼe opagase Jehovápe umi mbaʼe porãite ojapóvare hese. Mbaʼéichapa ikatu ojapo upéva? Haʼe voi heʼi: ‘Ajapóta opa mbaʼe aprometevaʼekue Ñandejárape’ (Sal. 116:​3, 4, 8, 10-14). Upeichaite, pe salmísta odesidi ojapopaitetaha umi mbaʼe oprometevaʼekue Jehovápe, ha umi hembiaporã omeʼẽvaʼekue chupe.

Ñande avei ikatu jajapo upéicha. Upearã jajapovaʼerã opa mbaʼe Jehová heʼíva. Ñamotenondevaʼerã Jehová servísio ñande rekovépe ha jaheja ijespíritu sánto tañanesãmbyhy opa mbaʼe jajapóvape (Ecl. 12:13; Gál. 5:​16-18). Ha jaikuaa ningo arakaʼeve ndajapagapamoʼãiha Jehovápe umi mbaʼe porãita ojapóvare ñanderehe. Upéicharõ jepe, ikatu ñambovyʼa Jehovápe ñañehaʼãramo jaservi chupe ñande pyʼaite guive (Pro. 27:11). Ajépa tuichaite mbaʼe upéva!

 Mbaʼépa ikatu jajapo oĩ hag̃ua pyʼaguapy ha joayhu kongregasiónpe

Enterove ningo oimevaʼerã jahechakuaa hetaiterei hendáichama ñanepytyvõha la kongregasión. Jehová ningo pe kongregasión rupive ñanemboʼe ha omeʼẽ ñandéve opa mbaʼe ñaikotevẽva jajeroviave hag̃ua hese, ñasẽ hag̃ua pytũnguýgui ha rrelihión japu poguýgui (Juan 8:32). Umi rreunión ha asambléa opreparáva pe ‘tembiguái jeroviaha ha iñarandúva’ ñanepytyvõ avei jaikuaa hag̃ua Jehovápe ha ñañemoag̃uive hese. Upéicha rupi ikatúta jajesalva ha jaiko Ñandejára múndo pyahúpe (Mat. 24:​45-47). Añetehápe hetaiterei mbaʼe porãma jahupyty kongregasión rupive ha hetaitereive mbaʼe porã ñaneraʼarõ. Ha ñande piko mbaʼe ikatu jajapo kongregasión rehehápe?

Apóstol Pablo ohai: ‘Pe kongregasión ningo ku ñande retéicha, opa mbaʼe oĩramo hendápe porã ha ojoajupáramo ojuehe, opa mbaʼe oiko porãramo, Cristo kongregasión imbaretevéta ohóvo imborayhúpe’ (Efe. 4:​15, 16). Koʼápe oñeñeʼẽramo jepe umi ungídope, ñandéve g̃uarã avei upe heʼivaʼekue. Upéicharõ enterove ñaipytyvõvaʼerã jaiko porãmba hag̃ua kongregasiónpe. Mbaʼéichapa ikatu jajapo upéva?

Upéva ikatu jajapo akóinte ñañehaʼãramo ñambopyʼaguapy ha ñamokyreʼỹ ermanokuérape (Rom. 14:19). Ikatu avei ñamoheñói ñande rekovépe umi mbaʼe porã Ñandejára espíritugui oúva ha jatrata porã ñane ermanokuérape (Gál. 5:​22, 23). Ha ikatu avei ‘jajapo iporãva opavavépe g̃uarã, tenondete umi ñanemoirũvape ñande jeroviápe’ (Gál. 6:10; Heb. 13:16). Apóstol Pablo heʼi haguéicha káda uno ñañehaʼãmbaitevaʼerã jahayhu ñane ermanokuérape, ha upéicha ñañomokyreʼỹmba hag̃ua kongregasiónpe.

Ikatu avei jaiporu opa mbaʼe jarekóva ñamombeʼu hag̃ua pe marandu porã. Jesucristo ningo heʼi voi: ‘Oñemeʼẽvaʼekue peẽme gratis, pemeʼẽ reíke peẽ avei’ (Mat. 10:​8, BNP). Upévare, ñande kyreʼỹme japredikavaʼerã ha ñaporomboʼe (Mat. 24:14; 28:​19, 20). Mbaʼépa jajapokuaa ndaikatúiramo ñasẽ pyʼỹi predikasiónpe? Ñapensamína pe viúda Jesús imanduʼavaʼekuére. Jesús ningo heʼi pe viúda omeʼẽ hetave hague hapichakuéragui, pórke omeʼẽmbaite la orekomíva ndahetáiramo jepe (2 Cor. 8:​1-5, 12).

Jaagradesékena oĩramo ñanepytyvõva

Heta vése ningo ñande voi ikatu ñaikotevẽ ermanokuéra ñanepytyvõ. Upéicha jave, jahejákena chupekuéra tañanepytyvõ. Upéva ningo katuete ñanemombaretéta jagueropuʼaka hag̃ua opa mbaʼe ko múndo añáme. Ha Jehová voi ojokuái heta ermáno ikatupyrývape oñangareko hag̃ua mborayhúpe kongregasiónre. Haʼekuéra ningo katuete ñanepytyvõta ñaneprovléma jave (Hech. 20:28). Umi ansiáno ha ambue ermanokuéra ningo katuete oñangarekóta ñanderehe, ñanembopyʼaguapy ha ñanepytyvõta ñaikotevẽ jave (Gál. 6:2; 1 Tes. 5:14).

Jaagradesékena ñane ermanokuérape ñanepytyvõ jave. Aníkena ñanderesarái Jehová imbaʼeporãguinte ojokuaiha umi ermánope ñanepytyvõ hag̃ua (1 Ped. 4:10). Ha mbaʼérepa jaagradesevaʼerã? Pórke ñande nañanemalagradesidoséi ko múndope ojejapoháicha.

Aníkena jajepyʼapyeterei ñandejehénte

Apóstol Pablo ohaivaʼekue peteĩ kárta pe kongregasión de Filípospe, ha upévape  heʼi Timoteo rehe: “Ambue ermáno haʼeichagua ningo ndarekói, ipyʼapeteĩva chendive ha ojepyʼapýva añetehápe penderehe pyʼapotĩme. Opavave ningo oheka imbaʼerãnte, noñehaʼãi ojapo hag̃ua Jesucristo rembipota” (Fili. 2:​20, 21, ÑÑB). Upévare iporã ñañeporandu: “Mbaʼépa ikatu ajapo ani hag̃ua ajepyʼapyeterei chejehénte?”.

Aníkena jajopy ñane ermanokuérape ñanepytyvõ hag̃ua. Mbaʼérepa ndovaléi jajapo upéicha? Jajepyʼamongetamíntena ko mbaʼére: Jajopýnepa ñane ermanokuérape omeʼẽ hag̃ua ñandéve pláta jajejopy vai jave? Ajépa ndajajapomoʼãi upéicha? Jaagradesetereíta ningo chupekuéra ñanepytyvõramo, péro ndajajopymoʼãi chupekuéra upearã. Upéicha avei ndajaperdekareimoʼãi chupekuéra itiémpo, ñanepytyvõséramo jepe ñanembaʼerechakuaavaʼerã hendivekuéra. Ñandéve ningo hiʼãiterei ñane ermanokuéra ñanepytyvõ kyreʼỹme, ndahaʼéi jajopýgui chupekuérante.

Ñanepytyvõséramo jepe ñane ermanokuéra, heta mbaʼépe ningo ndaikatumoʼãi ñanepytyvõ. Upéicha jave jajeroviakuaa Jehová katuete ñanepytyvõtaha, oipytyvõ haguéicha pe salmístape (Sal. 116:​1, 2; Fili. 4:​10-13).

Upéicharõ, jahejákena Jehovápe tañanepytyvõ jahasa asy jave (Sal. 55:22). Ha jaagradesékena chupe upévare. Upéicha avei, Jehová ohaʼãrõ ñande ñaipytyvõ vyʼápe ñane ermanokuérape. Upévare, ñañehaʼãkena ñaipytyvõ kongregasiónpe ijaháicha ñandéve (2 Cor. 9:​6, 7). Ha jaagradesékena oĩ jave ñanepytyvõva, ha ñande pyʼaite guive ñaporopytyvõ avei.

[Taʼanga ha rrekuádro oĩva páhina 31-pe]

“Mbaʼéicha piko ikatúta amyengovia Ñandejárape haʼe ipyʼaporãite haguére chendive?”(Sal. 116:12)

▪ ‘Jajapókena iporãva opavavépe g̃uarã’

▪ Ñañehaʼãkena ñambopyʼaguapy ha ñamokyreʼỹ ñande rapichakuérape

▪ Kyreʼỹmekena ñasẽ japredika ijaháicha ñandéve