‘Iñañáva ogoverna aja, hetãyguakuéra ohasa asy.’ (Proverbios 29:2, ÑÑB.)

Ymaite guive oĩ diktadór ipyʼahatãva umi héntendi ha ombohasa asyetereíva chupekuéra. Péro oĩ avei umi governánte ipyʼaporãva ha osolusionaséva umi provléma oĩva hetãme. Upéicharamo jepe amo ipahápe ndaikatúi ojapo mbaʼeve oĩgui igoviérnope heta opuʼãva hese omandaségui avei. Heta governánte katu omyenyhẽ ivolsíllonte ha péicha operhudika hetãme. Peteĩ polítiko Estados Unidosgua hérava Henry Kissinger heʼi: “Umi goviérno heta mbaʼéma ohupytyse péro oñehaʼãmba rei hikuái, mbaʼevénte nosẽporãi chupekuéra”.

La Biblia heʼi: “Yvypóra ndaikatúi ijehegui reínte oiporavo porã haperã” (Jeremías 10:23, NM). Peteĩ persóna imperfékto ningo ndoikuaái ni osẽ porãnepa chupe umi mbaʼe odesidíva, ha koʼytevéntema ijetuʼúta ogueraha porã hag̃ua peteĩ tetã. ¿Rehechakuaámapa koʼág̃a mbaʼérepa umi governánte ndaikatúi oipeʼapaite umi mbaʼe ñanembohasa asýva? Hiʼarive heta vése haʼekuéra voi la omoñepyrũva umi provléma.

“Pejoayhúramo, enterove ohechakuaáta peẽ haʼeha che disípulo.” (Juan 13:35, NM.)

Umi rrelihión omoakãva ningo opárupi heʼi jajoayhu vaʼerãha. Péro noipytyvõi umi héntepe oiko hag̃ua peteĩ ñeʼẽme ni ohayhu hag̃ua opavavépe, tahaʼe haʼéva tetãygua. Heta vése ikausarekuéra umi hénte noñontendéi, ha sapyʼánte katu umi tetã jepe opuʼã ojuehe. Pe lívro El cristianismo y las grandes religiones oskrivi vaʼekue pe teólogo Hans Küng heʼi voi: “Umi oĩva polítikape tuichaháicha oiko vai jepi ha heta vése umi omoakãva rrelihión la omoñepyrũva umi provléma”.

Umi omoakãva rrelihión heʼi avei ndaivairiha kuña oiko kuñándi, ha kuimbaʼe kuimbaʼéndi térã peteĩ kuimbaʼe ha peteĩ kuña oreko rrelasión sexuál omendaʼỹre. Upéicha rupi oĩ hetaiterei mbaʼasy ováva rrelasión sexuál rupive, oĩ kuña opytáva hyeguasu ha upéi oitykáva imemby,  ha avei hetave ohóvo tembireko ha ména ojuejáva. Koʼã mbaʼe ningo ombohasa asyeterei enterovévape.

“Káda uno ñañemoñuhã, jahejávo umi mbaʼe jajaposéva ñandestira ha ñanembotavy. Umi mbaʼe jajaposéva oñembohapóramo ñande pyʼapýpe, upéva omoheñói pekádo.” (Santiago 1:14, 15, NM.)

Ñaneimperfékto rupi enterovévape ñandestira umi mbaʼe vai ha ñañehaʼãmbaite vaʼerã pono “jasegi ñande rete rembipota vai” (Efesios 2:3, NM). Ha ijetuʼuvéntema jajejoko oñepresentáramo ñandéve peteĩ oportunida jajapo hag̃ua ivaíva. Péro tuichaiterei ningo ikatu jajeperhudika jajapóramo.

Peteĩ karai ohaíva lívro hérava P. D. Mehta oskrivi: “Heta vése jahasa asy ñande káusare voi, jaiko rupi vyʼa rapykuérinte térã jaipotapotavégui umi mbaʼe ñandegustáva ha ñañemeʼẽgui umi mbaʼe ñanemoakãrakúvape”. Oĩ ojedrogáva, ikaʼúva, ihugadór, hekokyʼáva ha ojapóva hetave mbaʼe vai. Umi tapicha ivuénova jepe sapyʼánte ou hoʼa koʼã mbaʼépe ha ombohasa asy ifamília ha iñamigokuérape. Enterovéva ningo jahechakuaa koʼã mbaʼe oikoha ñaneimperfékto rupi. Heʼiháicha la Biblia: ‘Ñande jaikuaa entéro koʼag̃aite peve ipyahẽ ha ohasa asyha oñondivepa’ (Romanos 8:22, NM).

La Biblia heʼi Satanás haʼeha “ko múndo jára” ha omoirũha chupe heta demónio ipoderóso ha iñañáva (2 Corintios 4:4, NM; Revelación [Apocalipsis] 12:9).

Satanás ha idemoniokuéra ojapo opa mbaʼe ikatu hag̃uáicha ombotavy umi héntepe ha oreko chupekuéra ipoguýpe. Apóstol Pablo heʼi vaʼekue voi: “Ñande ningo nañañorairõi yvypórandi, ñañorairõ guei umi espíritu aña yvagapeguándi; koʼãva haʼe hína umi governánte, autorida ha mburuvicha orekóva ipoguýpe ko múndo oĩva pytũmbýpe” (Efesios 6:12, NM).

Umi demóniope igústo omolesta ha ombotavy umi héntepe, péro oĩ ótra kósa iñimportantevéva chupekuéra g̃uarã. Haʼekuéra ojapo opa mbaʼe pono ñañemoag̃ui Ñandejára Jehováre (Salmo 83:13). Upearã ojevale jepi heta mbaʼére, por ehémplo máhia, paje ha umi oadivináva ñane renonderã. Upévare Jehová ñandeavisa ipeligrosoha koʼã mbaʼe ha heʼi ñanepytyvõtaha ndajaipotáiramo umi demónio ñanembotavy (Santiago 4:7).

Ojapóma dos mil áño rupi la Biblia heʼi hague: “Eikuaa porãke ko mbaʼe, umi ára pahápe pe situasión ijetuʼúta ha hasýta jagueropuʼaka hag̃ua”.

Upéi heʼi mbaʼéicha rupípa upéva: “Umi hénte ijehénte ojepyʼapýta, iplatarayhúta, oñembotuicháta, ijejapóta, [...] ndohayhumoʼãi ihéntepe, oñemohatãta heʼívape, okopíta ótrore, ndojejokokuaamoʼãi, oñemboharáita hapicháre, ndohayhumoʼãi mbaʼeve iporãva, itraisionérota, hovaʼatãta, oñemombaʼeguasúta, oikóta vyʼarã rapykuéri ohayhu rangue Ñandejárape”. Upéicha jahecha jahasa asyha jaiko rupi “umi ára pahápe” (2 Timoteo 3:1-4, NM).

Jahecha rire koʼã mbaʼe ñantende porãve mbaʼéicha rupípa yvyporakuéra oñehaʼãramo jepe, ndaikatúi oipeʼapaite umi mbaʼe ñanembohasa asýva. Upéicharõ ¿mávapa ikatúta osolusiona koʼã mbaʼe? Ñande Apohare. Haʼe opromete ‘ohunditaha pe Aña rembiapokue’ ha umi demónio ojapóva avei (1 Juan 3:8, NM). Pe ótra páhinape jahecháta mbaʼépa ojapóta Ñandejára oipeʼa hag̃ua umi mbaʼe ñanembohasa asýva.