Ziim yele ba’ɛ pakɛ mɛ. Ziim san ka bɔna to inya poan, to kan vɔna. Naayinɛ n de to Naaŋɔdaana la zuo, eŋa ma’a n tari sore ti a pa’alɛ to wan tara ziim tuna tuuma se’em. A tɔɣɛ ziim yele la wani? To wan ta’an di ziim bii to dekɛ kɛ̃’ɛsɛ nɛra? Ho wan eŋɛ la wani ta’an loe sɛla n ani soŋa yele wa poan?

1. Yehowa geele ziim yele la wani?

Yehowa yuun yele a yamesi Baabule gulesegɔ saŋa la ti: “Bunvɔa woo vom boi la a ziim poan.” (Malema 17:14) Yehowa zɛ’an ziim ze’ele bo la vom. Vom n de tuulum ge ze’ele Naayinɛ zɛ’an na la zuo, ziim me dela tuulum.

2. Naayinɛ ka boti to tara ziim ita la bem?

Krista n yuun nan ka wa’ana la, Yehowa yuun yele a yamesi ti ba da di ziim. (Kaalɛ Pin’ileŋɔ 9:4 la Malema 17:10.) A yuun tɔɣɛ di’e yele wa zuo la se’em ma’a ti tigere zuo bisegadoma la yuun bo nɔɔrɛ ti kristakɔma ‘kɔʼɔn yese bamesi . . . ziim poan.ʼ​—Kaalɛ Tooma 15:28, 29.

To da di ziim la vuurɛ? Dɔgeta san yeti ho da nyu daam, ho kan nyu. Ge ho wan sakɛ di dia ti daam bɔna bim bii ho wan sakɛ ti ba dekɛ daam eŋɛ pania poan lu hɔ? Ho kan sakɛ. Bala mea ti Naayinɛ n yeti to da di ziim la pa’alɛ ti to da nyu ziim bii to da obe nɛŋɔ ti ba ka kɔregɛ. La me ka nari ti to di dia ti ziim bɔna bim.

Ge dɔgetadoma n tari ziim tuna se’em la me? Ba tibegɔ ase’a kɔ’ɔn giisɛ Naayinɛ lɔɔ mɛ. Yɛla wa ase’a dela ziim kɛ̃’ɛsegɔ bii ba dekɛ ziim bɔba ase’a n de wuu red cells, white cells, platelets la plasma kɛ̃’ɛsɛ hɔ. Tibegɔ basɛba boi ka giisɛ Naayinɛ lɔɔ la wana mɔpi. Makerɛ, tibegɔ ase’a poan ba ni yese la ziim la zipiɣisi pa’asɛ tibɛ nɛra. Tibegɔ basɛba me poan, ba ni yese la nɛra la ziim geele bisɛ ba wan tibɛ en se’em. Yɛla san ta ana wana tomam ayima ayima woo nari ti to geele yele la bisɛ soŋa ta’an loe to wan eŋɛ se’em. a​—Galatia 6:5.

 VIISƐ PA’ASƐ

3. Loe tibeseko n wan basɛ ti Yehowa puurɛ pee

Ho wan eŋɛ la wani loe tibeseko n makɛ la Naayinɛ puti’irɛ? Ŋmɛ VIDIYO la ge nyaa sɔsɛ baŋɛ la de ninmɔ’ɔrɛ se’em ti ho doose yelese’a n gã wa:

• Zusɛ Naayinɛ ti a bo ho yɛm.​—Yames 1:5.

• Viisɛ bisɛ Baabule naresum yɛla ge bisɛ hon wan ta’an dekɛ a tum tuuma se’em.​—Magaha 13:16.

• Viisɛ baŋɛ tibeseto n boi ya gingilega la poan ti ho wan nyɛ.

• Baŋɛ tibeseto n kɔ’ɔn ka nara bɔ’ɔra hɔ.

• Bisɛ ti sɛla ti ho wan loe la wan basɛ ti ho putɛkeeŋa la bɔna fai.​—Tooma 24:16. b

• Mina soŋa soŋa ti ho luɣerɛ kpɛ’a, keenma, ho pa’alegɔdaana bii nɛra se’em ka tari sore ti a loe sɛla n nari ti homea dekɛ ho putɛkeeŋa loe.​—Arom 14:12.

• Gulesɛ hon kɔ’ɛ ho puti’irɛ se’em la biŋe.

4. Yehowa Sɛɛradoma eeri la ba nyɛta tibegɔ n ani soŋa

To ta’an dɔla Naayinɛ lɔɔ la ge kelum nyɛ tibegɔ n ani soŋa ti ziim yele ka bɔna bim. Ŋmɛ VIDIYO la.

Kaalɛ Titus 3:2 ge nyaa sɔsɛ sokere wa:

• Beni n sɔi ti la nara ti to eŋɛ nɔyinɛ ge ana mama to san sɔsa la dɔgetadoma?

 5. Zipiɣisi Yele San Ta Pakɛ

Ziim tari la bɔba anaasi wana mɔpi n de red cells, white cells, platelets la plasma. Bɔba anaasi wa me tari la bɔba ase’a ti ba yi’ira ba ti zipiɣisi. c Ba tari zipiɣisi piɣisi basɛba maala la tiim ti la nyaŋera ba’asi bii la ta’an soŋɛ ti ziim da yɛsera.

La san dɛna zipiɣisi yɛla Kristabia woo nari ti a loe la amea n boti sɛla doose la eŋa n dekɛ Baabule la kumesɛ a putɛkeeŋa se’em la. Basɛba ta’an zaɣesɛ ti ba da dekɛ zipiɣisi tiim la tibɛ bamam. Sɛba me putɛkeeŋa la ta’an bo ba sarɔɔ ti ba to’e zipiɣisi tiim la tibegɔ.

Ho san yeti ho kɔ’ɛ ho puti’irɛ geele sokere wa bisɛ:

• Mam wan eŋɛ la wani ta’an tɔɣɛ pa’alɛ dɔgeta ti a bɔkɛ sɛla n sɔi ti mam wan to’e bii n zaɣesɛ zipiɣisi toseto tibegɔ?

 YELEKPINE

Yehowa ka boti to tari ziim tuna bura bura.

Tiisegɔ Sokere

• Beni n sɔi ti Yehowa geele ziim ti la dela tuulum?

• To wan eŋɛ la wani baŋɛ ti Naayinɛ n bo nɔɔrɛ ti to yese tomesi ziim poan la pa’alɛ ti to da tɔ’ɔsa ziim?

• Hon wan eŋɛ la wani ta’an kɔ’ɛ ho puti’irɛ soŋa doose la ba tari ziim tuna tuuma se’em tibegɔ yɛla poan?