Baabule La Tɔɣɛ Buraa N Ka Di Pɔka Ge Naɛ La En Bɔna Yele La Wani?
Baabule la lebesego
Baabule la yeti Naayinɛ puti’irɛ dela nɛreba “yese [bamesi] yalumtuuma poan.” (1 Tesalonika 4:3) Baabule la poan, “yalumtuuma” dela pɔɣedisa’aŋɔ, buraasi n gã taaba la pɔɣesi n gã taaba la buraa n ka di pɔka ge naɛ la en bɔna.
Beni n sɔi ti la yele pakɛ Naayinɛ ti buraa san bɔta pɔka a di en?
Naayinɛ n basɛ ti pɔɣedire bɔna. A yuun eŋɛ pɔɣedire bo la yia buraa la pɔka la, se’em ma’a ti a yuun dekɛ ba laɣum taaba la. (Pin’ileŋɔ 2:22-24) A yuun ka boti buraa la pɔka naɛ taaba bɔna ge ka di taaba.
Naayinɛ mi sɛla n ani soŋa bɔ’ɔra nɛresaaleba mɛ. A yuun basɛ ti pɔɣedire bɔna mɛ ti la ta’an basɛ ti buraa la pɔka naɛ taaba bɔna daarewoo ge me soŋera ge tɛ’ɛla deodoma la za’a. Ti’isɛ makerɛ wa yele bisɛ. Nɛra san maalɛ lɔkɔ, a ni gulesɛ pa’alɛ hon wan dekɛ lɔkɔ la tuna tuuma ti la ana soŋa se’em mɛ, bala mea nɔɔ ti Naayinɛ pa’alɛ tɔ to wan eŋɛ se’em ti sira la pɔɣa la kɔma la za’a bɔna ti la ana soŋa. Naayinɛ pa’alegɔ kɔ’ɔn soŋera sɛba woo n tari de tuna tuuma mɛ.—Isaiah 48:17, 18.
Nɛra san maalɛ lɔkɔ, a ni gulesɛ pa’alɛ hon wan dekɛ lɔkɔ la tuna tuuma ti la ana soŋa se’em. Naayinɛ pa’alɛ tɔ to wan eŋɛ se’em ti to deodoma ta’an bɔna soŋa
Nɛreba san ka eŋɛ pɔɣedire ge gã la taaba, la wan ta’an tara daaŋɔ zo’e zo’e na. Makerɛ dela, la wan ta’an basɛ ti ho nyɔkɛ puurɛ ti ho ka bɔta bii ho nyɛ bã’a bii susa’aŋɔ ta’an paɛ hɔ. a
Naayinɛ bo buraasi la pɔɣesi yɔ’ɔ mɛ ti ba ta’an ga’arɛ la taaba ta’an dɔɣɛ kɔma. Naayinɛ geele vom ti la tara tuulum mɛ ge me dekɛ bo’olum n ani soŋa bo nɛreba, n de ba ta’an dɔɣɛ kɔma. Naayinɛ boti la to na’asa pɔɣedire ti la pa’alɛ ti to tari gilema bɔ’ɔra bo’olum wa.—Hebru 13:4.
Buraa la pɔka ta’an naɛ taaba bɔna ti ba baŋɛ taaba soŋa ge nyaa di taaba?
Sɛla n wan ta’an basɛ ti pɔɣedire ana soŋa daɣɛ la buraa la pɔka n wan deŋɛ nɛŋa naɛ la taaba bɔna ti ba “bisɛ la ani se’em” ge nyaa di taaba, se’ere n sɔi la sankana wa poan ba se’em sa’am ta’an basɛ a tadaana ge keŋɛ. Ge sɛla n tuɣum basɛ ti buraa la pɔka tiŋasuka ana soŋa dela ba san tara nɔyinɛ ge laɣum maala daaŋɔ seto n paari ba la. b Pɔɣedire n basɛ ti nɔyinɛ bɔna.—Matu 19:6.
Sireba la pɔɣeba wan ta’an eŋɛ la wani ti ba pɔɣedire la ana soŋa?
Pɔɣedire ka boi n di mi’a zina. Ge sireba la pɔɣeba san tara Baabule kaaŋɔ la tuna tuuma, la wan basɛ ti ba pɔɣedire la ana soŋa. Ka’aŋɔ la ase’a n wana:
Basɛ ti ho luɣerɛ kpɛ’a la yele pakɛ hɔ gana homea yele.—1 Korint 7:3-5; Filipi 2:3, 4.
Tari ya nɔŋerɛ la gilema bɔ’ɔra taaba.—Epesus 5:25, 33.
Nyɔkera homea ho yetɔɣum poan.—Magaha 12:18.
Di’isa suure ge me dita suɣeri.—Kolose 3:13, 14.
a Kaalɛ yele wa n de “Bunbilipaalesi Soke Yeti . . . Ba San Pɛregera Mam Ti N Ga’arɛ La Nɛra N Wan Eŋɛ La Wani?”
b Kaalɛ yele wa n de “Deodoma N Tari Bɔnsoŋa—Nɔyinɛ.”
Ho Me Ta'an Bɔta Yele Ana
TO YƐLA
Mam Boti La Ya Wa’ana
Sɔsɛ ya sɛla n boi Baabule la poan bii ho zamesɛ Yehowa Sɛɛradoma yɛla pa’asɛ.