Lẹdo aihọn pé, gandutọ susu ko biọ dọ mẹlẹ ni nọla na ode awetọ bosọ zẹhudo pipli dopọ lẹpo ji. Kunnudetọ Jehovah tọn lẹ magbe nado setonuna osẹ́ndai ehelẹ dile yé gbẹ́ zindonukọn nado to pli yetọn lẹ basi to hihọ́ mẹ. Nado wà ehe, agun lẹ nọ zan nuyian hodọdopọ video ji tọn lẹ, taidi Zoom.

 Nado sọgan hẹn ẹn diun dọ opli mítọn lẹ to yìyì ganji, Hagbẹ Anademẹtọ lọ nagbè nado họ̀ Zoom lọ na agun lẹ. Ehe ko gọalọna agun delẹ taun, yèdọ agun he sọgan nọma ko penugo nado họ̀ zoom lọ he sọgan vẹahi sọ nudi 12 000 FCFA kavi humọ na yede lẹ. Adà azọ́nwanu Zoom tọn he agun lẹ nọ penugo nado zan vọnu ma nọ dẹn susu, ma nọ na dotẹnmẹ mẹsusu nado wá e ji bo masọ nọ tindo hihọ́ sọmọ. Agun he nọ yí Zoom he titobasinanu lọ họ̀ lẹ zan lẹ nọ penugo nado basi pli to hihọ́ glọ podọ mẹsusu nọ penugo nado wá e ji po awubibọ po to opli dopodopo whenu. Kakajẹ din, agun 65 000 linlán to otò hugan 170 mẹ wẹ to azọ́nwanu he titobasinanu lọ họ̀ ehe yizan.

 Agun Kairagi tọn, to Manado, to Agewaji Sulawesi tọn, to Indonésie, jo Zoom vọnu lọ do bo jẹ Zoom he titobasinanu lọ họ̀ zan ji. Mẹmẹsunnu Hadi Santoso basi zẹẹmẹ dọmọ: “Mẹhe nuyizan lẹtliki tọn ma tlẹ má alọnu na sọmọ lẹ sọgan duvivi pli lẹ tọn din, titengbe na e masọ biọ dọ yé ni nọ gọwá Zoom lọ ji whlasusu to pli dopo whenu ba wutu.”

 Lester Jijón, Jr., mẹho agun tọn dopo to Agun Guayacanes Oeste tọn mẹ to Guayaquil, Équateur, na linlin dọ: “Na ninọmẹ akuẹzinzan tọn mẹmẹsunnu gọna mẹmẹyọnnu mítọn lẹ tọn lẹ fọ́n bo to sinsinyẹn deji wutu, e ma na ko yọnbasi paali na agun delẹ nado họ̀ Zoom lọ na yede, ehe na hẹn ẹn yọnbasi na agun lọ blebu nado nọ wá pli. Todin, na sọha mẹhe sọgan wá Zoom he yin hihọ̀ na mí lọ ji lẹ tọn sù wutu, mí nọ penugo nado basi oylọna mẹdevo lẹ, madibu dọ mí na jẹ dogbó sọha mẹhe sọgan wá azọ́nwanu lọ ji lẹ tọn kọ̀n.”

 Johnson Mwanza, mẹho agun tọn de to Agun Ngwerere North tọn mẹ to Lusaka, Zambie, wlan dọ: “Mẹmẹsunnu gọna mẹmẹyọnnu susu nọ to didọ mapote dọ, ‘azọ́nwanu Zoom he titobasinanu lọ họ̀ lọ ma nọ gọalọna mẹmẹsunnu po mẹmẹyọnnu lẹ po nado dọnsẹpọ ode awetọ kẹdẹ gba, amọ́ e sọ nọ zọ́n bọ mí nọ mọdọ Jehovah yiwanna mí bosọ to nukunpedo mí go.’”

 Akuẹ he yin didedovo na azọ́n kọgbọ tọn wẹ titobasinanu lọ yizan nado họ̀ azọ́nwanu Zoom ehe. Akuẹ ehe nọ yin mimọ sọn nunina sọn ojlo mẹ wá he yin bibasi do azọ́n lẹdo aihọn pé lọ tamẹ lẹ mẹ. Susu nunina ehelẹ tọn nọ yin bibasi gbọn donate.dan124.com ji. Mì wanu na nunina alọtútlú tọn mìtọn lẹ he sọ nọ gọalọ nado wazọ́n kọgbọ tọn lẹ lẹdo aihọn pé.—2 Kọlintinu lẹ 8:14.