Jehovah Jiwheyẹwhe jlo dọ mẹlẹpo ni plọnnu gando ewọ po Ahọluduta etọn he to olọn mẹ po go, mahopọnna ninọmẹ yetọn. (1 Timoti 2:3, 4) Enẹ wẹ zọ́n bọ Kunnudetọ Jehovah tọn lẹ nọ zín Biblu gọna owe Biblu pinplọn tọn lẹ jẹgbonu na mẹsusu dile e sọgan yọnbasi do, kakajẹ tókunọ lẹ ji. Titobasinanu mítọn ko de video a fọtọ́n susu tọ́n na tókunọ lẹ do tókunọ-gbè 100 linlán mẹ! Nawẹ mí nọ wleawuna video ehelẹ bosọ nọ má yé pé gbọn? Podọ obá tẹ mẹ wẹ mí ko hẹn yé pọnte jẹ dile ojlẹ to yìyì?

 Pipli lẹdogbedevomẹ-basitọ lẹ tọn lẹdo aihọn pé wẹ nọ wleawuna video tókunọ lẹ tọn. Mẹhe to pipli dopodopo mẹ lẹ nọ yiagbọji do nọ gbeje nue yé jlo na lẹdogbedevomẹ lọ pọ́n. Enẹgodo, yé nọ pọ́n aliho he na yọ́n hugan nado lilẹ́ ẹ do tókunọ-gbè mẹ, bo nọ wá yí video lọ do kanji. To alọnu din, pipli lẹdogbedevomẹ tọn 60 wẹ nọ lilẹ́ owe Biblu pinplọn tọn lẹ do tókunọ-gbè mẹ to gbesisọ mẹ, bọ pipli 40 devo lẹ nọ wazọ́n lọ sọn ojlẹ de mẹ jẹ devo mẹ.

 To dai, e nọ biọ akuẹzinzan susu nado wleawuna video tókunọ-gbè tọn lẹ. Caméra he nọ wleawuna video po azọ́nwanu devo lẹ po nọ vẹahi taun to whenẹnu hugan to egbehe. Humọ, video lọ lẹ nọ yin yíyí do kanji to azọ́nwatẹn hoyidokanji tọn he mí wleawuna de mẹ, podọ to whedelẹnu ohọ̀ hoho he mí vọjlado de wẹ mí nọ yizan. To bladopọ mẹ, e nọ biọ dọla 30 000 b linlán (nudi CFA livi 17 linlán) nado wleawuna azọ́nwanu lẹ na pipli he nọ bayi lẹdogbedevomẹ do tókunọ-gbè mẹ de.

 Nado sọgan yí nunina he yin bibayi lẹ zan to aliho dagbe mẹ, titobasinanu mítọn ko dovivẹnu nado hẹn aliho he mẹ lẹdogbedevomẹ lọ nọ yin bibasi te pọnte dogọ bosọ hẹn ẹn bọawu. Enẹwutu, mí nọ zan azọ́nwanu he tọ́n to agọe bo nọ wazọ́n ganji bo masọ nọ biọ akuẹzinzan susu lẹ. Kakati nado zan azọ́nwatẹn hoyidokanji tọn de, pipli he nọ bayi lẹdogbedevomẹ lẹ sọgan wleawuna fide he tindo sinmẹ amamú to azọ́nwatẹn yetọn nado sọgan yí video lẹ do kanji. Eyin mẹsusu wẹ dona yí alọ do dọho to video tókunọ-gbè tọn de mẹ, e ma biọ dọ mẹmẹsunnu po mẹmẹyọnnu lẹ po ni yì azọ́nwatẹn hoyidokanji tọn de dandan ba, kakatimọ yé gán yí adà yetọn lẹ do kanji sọn azọ́nwatẹn yetọn kavi sọn owhé yetọn gbè.

 Mí ko sọ wleawuna aplikasiọn wunmẹ de nado hẹn azọ́n mẹhe nọ yí alọ do dọho lẹ tọn pọnte. Vọjlado ehelẹ zọ́n bọ madoawe whenu he pipli lẹdogbedevomẹ tọn lẹ nọ zan dai nado wleawuna video tókunọ-gbè tọn dopo wẹ ko depò. Mẹmẹsunnu mítọn lẹ yọ́n pinpẹn aliho he mẹ nulẹ yin hinhẹn pọnte te ehe tọn taun. Mẹmẹsunnu de he nọ yin Alexander dọ dọ: “Video tókunọ-gbè tọn lẹ nọ saba tọ́n todin hugan dai. Enẹ vivina mi taun. Azán lẹpo ji wẹ n’nọ pọ́n video lọ lẹ te.”

 To agọe lẹ, akuẹ he mí nọ zan nado wleawu azọ́nwanu lẹ tọn na pipli lẹdogbedevomẹ tọn dopo ma nọ hugan dọla 5 000 (nudi CFA livi awe daa linlán). Enẹwutu, mí nọ de video tókunọ-gbè tọn lẹ tọ́n to ogbè susu mẹ dogọ.

 Eyin yè yí video tókunọ-gbè tọn de do kanji fó, mẹhe do hudo etọn lẹ dona mọ ẹn yí. To dai, mí nọ de video lọ lẹ tọ́n do kasẹti po DVD lẹ po ji, amọ́ e nọ biọ akuẹzinzan, whenu po azọ́n sinsinyẹn wiwà po. Video lọ lẹ dona sọ yin didohlan azọ́nwhé devo de nado bayi susu yetọn. Gbọngodo, kasẹti po DVD lọ lẹ po nọ yin didohlan agun lẹ gbọn bato mẹ. To 2013 kẹdẹ, dọla livi awe linlán (nudi CFA liva dopo e lán livi 200) wẹ mí zan nado de video tókunọ-gbè tọn lẹ tọ́n to DVD ji.

 Tókunọ lẹ yọ́n pinpẹn awuwledainanu ehelẹ tọn taun. Amọ́, e ma nọ bọawu nado zan video lọ lẹ to whelẹponu, titengbe na sọha kasẹti po DVD lọ lẹ po tọn nọ fọ́n bo nọ to jijẹ e ji wutu. To whedelẹnu, e nọ biọ dọ yè ni zan DVD susu do yí owe Biblu tọn dopo poun do kanji. Mẹmẹsunnu Gilnei he nọ nọ̀ Brésil dọ dọ: “Whedepopenu he mí jlo na hia wefọ de, mí dona dín kasẹti he mẹ e te bo nasọ dín fie wefọ lọ te to e mẹ. E ma nọ bọawu paali.” Mẹmẹyọnnu Rafayane he nọ zan DVD tókunọ-gbè tọn dọ dọ: “Oplọn mẹdetiti tọn bibayi nọ pé agbọ́ mẹ. Whenu susu wẹ mí nọ zan do dín wefọ kavi alọdlẹndonu lẹ poun.” Podọ eyin mẹmẹsunnu po mẹmẹyọnnu lẹ po to kunnude, e nọ biọ dọ yé ni hẹn DVD po kasẹti lẹ po, ehe yé gán hò to televiziọn jlodotọ de tọn ji. Mẹmẹsunnu delẹ tlẹ nọ hẹn nuhe yé nado hò DVD lẹ. E madẹn bọ nuyizan pẹvi he gán hò DVD de tọ́n, podọ mẹmẹsunnu susu wẹ yí i zan. Bobby he nọ nọ̀ États-Unis dọ dọ: “To whenue yè ko do wefọ de hia mẹde bosọ jlo na do devo hia, DVD devo wẹ a dona zan. Ehe nọ biọ whenu susu bosọ nọ zọ́n bọ e nọ vẹawu nado yí Biblu zan do dọho hẹ mẹlẹ.”

 To 2013, titobasinanu Jehovah tọn de aplikasiọn he bẹ video tókunọ gbè tọn lẹ hẹn de tọ́n (JW Library Sign Language), ehe zọ́n bọ mẹmẹsunnu po mẹmẹyọnnu lẹ po gán yí video tókunọ-gbè tọn lẹ bo hò yé to alokan po tablẹti yetọn lẹ po ji. Jẹnukọn whẹ́, Aplikasiọn lọ yin didetọn to Tókunọ-Gbè Amelika tọn mẹ. Enẹgodo to 2017, e yin vivọjlado nado bẹ tókunọ-gbè he pò lẹpo hẹn. Homẹ mẹmẹsunnu po mẹmẹyọnnu lẹ po tọn hùn taun lẹdo aihọn pé. Juscelino he nọ nọ̀ Brésil dọ dọ: “E jiawu na mi taun! N’nọ to nulẹnpọndo owanyi he Hagbẹ Anademẹtọ lọ dohia míwu tókunọ lẹ ji mapote gọna lehe yé jlo dọ mí ni yinukọn to nugbo lọ mẹ taidi mẹhe nọ do ogbè he pò lẹ do. Homẹ ṣie hùn taun, podọ aplikasiọn lọ nọ whàn mi nado plọn Biblu dogọ.”

 To egbehe, video tókunọ-gbè tọn lẹpo nọ yin didetọn to nuyizan lẹtliki tọn lẹ ji bo nọ yin zizedo nọtẹn Intẹnẹt tọn mítọn ji podọ do aplikasiọn JW Library Sign Language mẹ. Taidi kọdetọn de, kakati nado yí osun kavi owhe lẹ zan do bayi lẹdogbedevomẹ video tókunọ-gbè tọn lẹ tọn, yí yé do kanji bosọ má yé pé, azán kleun de poun ko pé. Na nugbo tọn, video tókunọ-gbè tọn susu nọ tọ́n to ojlẹ dopolọ mẹ hẹ zinjẹgbonu mẹhe ma yin tókunọ lẹ tọn.

 Pọ́n nuhe mẹmẹsunnu po mẹmẹyọnnu mítọn tókunọ delẹ po dọ. Mẹmẹyọnnu Klízia dọ dọ: “Titobasinanu tẹwẹ sọ tin he nọ hò tókunọ lẹ tọn pọ́n sọmọ bo nọ wleawuna núdùdù gbigbọmẹ tọn lẹ na yé to aliho he bọawu taun ehe mẹ? Mí ma gán yí nuhe titobasinanu Jehovah tọn nọ wà na mí lẹ jlẹdo nudepope go to aihọn lọ mẹ.” Vladimir dọ dọ: “Video lọ lẹ nọ dohia mi dọ Jehovah nọ hò tókunọ lẹ tọn pọ́n dile e nọ wà do na mẹhe nọ sènu lẹ.”

 Hogbe ehelẹ nọ saba tọ́n to video tókunọ-gbè tọn mítọn lẹ mẹ: “Owe ehe ma nọ yin sisà gba. E yin awuwlena taidi apadewhe azọ́n Biblu pinplọnmẹ lẹdo aihọn pé tọn mítọn he nọ yin godonọna gbọn nunina sọn ojlo mẹ wá lẹ dali.” Mí yọ́n pinpẹn nunina mìtọn lẹ tọn taun, ehe susu yetọn nọ yin bibayi gbọn donate.dan124.com ji. Nunina ehelẹ nọ zọ́n bọ mí nọ de Biblu po owe Biblu pinplọn tọn lẹ po tọ́n na gbẹtọ lẹpo, etlẹ yin na mẹhe nọ zan tókunọ-gbè lẹ.