Eyin Gbẹninọ Pé Agbọ́ We
BE APỌ̀ ko ṣì we sọmọ pọ́n bọ e ma jlo we nado nọgbẹ̀ ba ya? Eyin mọ wẹ, be a na mọnukunnujẹ nuhe dọ Adriana te mẹ. E jẹ azọ̀n apọṣimẹ tọn na ojlẹ de, ehe hẹn ẹn blawu sọmọ bọ e ma do todido de ba. Doto lẹ mọ azọ̀n apọṣimẹ sinsinyẹn tọn na Adriana.
Mẹdevo wẹ dawe Japon-nu de he nọ yin Kaoru, he nọ penukundo mẹjitọ etọn yọnhonọ he to azọ̀njẹ lẹ go. “To whenẹnu, azọ́n nọ sù do mi taun to azọ́nmẹ,” wẹ e dọ. “To nukọn mẹ, onú ma nọ yọ́n dù na mi ba, bọ n’masọ nọ mọ amlọndọ ganji. N’jẹ nulẹnpọn ji dọ n’na vò sọn ehe lẹpo mẹ eyin n’gbọ bo kú.”
Dawe de he nọ yin Ojebode to Nigéria dọmọ: “Awubla mẹ ján n’nọ te whelẹponu bo tlẹ nọ viavi, enẹwutu n’tẹnpọn nado hù dee.” Mí dopẹ́ dọ Ojebode, Kaoru po Adriana po ma hù yede. Amọ́, gbẹtọ fọtọ́n susu lẹ wẹ nọ hù yede to whemẹwhemẹ.
FIE YÈ GÁN MỌ ALỌGỌ TE
Suhugan mẹhe nọ hù yede lẹ tọn wẹ yin sunnu, bọ winyan nọ hù susu yetọn nado biọ alọgọ. Jesu dọ dọ mẹhe to azọ̀njẹ do hudo doto tọn. (Luku 5:31) Hún, eyin a nọ lẹn onú mọnkọ, jaale ma kuwinyan nado biọ alọgọ blo. Susu mẹhe to azọ̀n apọṣimẹ tọn jẹ lẹ tọn wẹ ko mọdọ doto lẹ gán gọalọna yé nado dudeji. Ojebode, Kaoru po Adriana po dín alọgọ doto lẹ tọn bọ e ko pọnte na yé todin.
Doto lẹ gán na we amasin kavi dọho hẹ we kavi yí aliho awe lẹ zan nado gọalọ. Mẹhe to azọ̀n enẹ jẹ lẹ nọ do hudo alọgọ, homẹfa gọna mẹtọnhopọn whẹndo po họntọn lẹ po tọn. Họntọn vivẹ́ hugan he mẹde gán tindo wẹ Jehovah Jiwheyẹwhe, mẹhe ko wleawuna alọgọ dagbe do Ohó etọn Biblu mẹ.
BE PỌNGBỌ TẸGBẸ TỌN DE TIN YA?
Mẹhe to azọ̀n apọṣimẹ tọn jẹ lẹ nọ do hudo nukunpedomẹgo whenu dindẹn tọn bosọ dona basi diọdo lẹ to gbẹzan yetọn mẹ. Amọ́, eyin a to azọ̀n ehe jẹ, a gán donukun sọgodo dagbe de taidi Ojebode. E dọ dọ, “N’to nukọnpọnhlan nado mọ hẹndi Isaia 33:24 tọn, ehe dọ dọdai ojlẹ de tọn whenue mẹde ma na dọ dọ ‘N’to azọ̀njẹ.’” Taidi Ojebode, dike opagbe “aigba yọyọ” tọn he Jiwheyẹwhe do, fie “awufiẹsa” ma na tin te, ni miọnhomẹna we. (Osọhia 21:1, 4) Opagbe enẹ dohia dọ azọ̀n he nọ yinuwadomẹji to apọ̀nmẹ podọ to numọtolanmẹ-liho lẹpo na doalọte. Awufiẹsa towe na lẹzun otàn. Awufiẹsa towe lẹ ma nasọ “yin finflin ba, mọ yé ma na gọwá ahun [towe] mẹ ba.”—Isaia 65:17.
