Bebe po otọ́ etọn po vẹ́ taun. Họntọn vivẹ́ whẹndo lọ tọn de wẹ dọ ohó enẹlẹ, ṣigba hogbe lọ lẹ hẹn awubla Bebe tọn sinyẹn deji wẹ, kakati nado miọnhomẹna ẹn. Bebe nọ to didọna ede mapote dọ, “nude ma ka yọ́n to okú etọn mẹ nẹ.” Owhe susu lẹ godo, whenue Bebe donù asidan lọ go to owe de mẹ, e họnwun dọ e gbẹ́ to awubla.

Dile Bebe doayi e go do, e sọgan yí ojlẹ susu whẹpo mẹde nido duto awubla ji, titengbe eyin yè vẹ́ po mẹhe kú lọ po taun. To Biblu mẹ, okú yin yiylọdọ “kẹntọ godo tọn.” (1 Kọlintinu lẹ 15:26) E nọ wá mí ji to ajiji mẹ bo nọ wlu gbẹzan mítọn pete to whenue mí ma donukun in paali, bosọ nọ sún mẹvivẹ mítọn lẹ sẹ̀ vaun bọ mẹde ma nọ penugo nado glọnalina ẹn. Mímẹpo go wẹ ehe sọgan jọ do. Enẹwutu, e ma yin nupaṣamẹ de dọ mí nọ jẹflumẹ taun to whenue mẹyiwanna mítọn de kú.

Vlavo a nọ kanse dewe dọ: ‘Nawẹ mẹde sọgan blawu dẹnsọ? Nawẹ yè sọgan duto awubla ji gbọn? Nawẹ n’sọgan miọnhomẹna mẹhe to aluẹmẹ lẹ gbọn? Be todido de tin na mẹyiwanna mítọn he ko kú lẹ ya?’