Nọ Kẹalọyi po Ayajẹ po—Nọ Namẹ po Ahundopo Po

JEHOVAH otọ́ owanyinọ olọn mẹ tọn mítọn nọ hò mítọn pọ́n. Ohó Jiwheyẹwhe tọn na jide mí dọ e nọ jẹtukla kavi hò devizọnwatọ etọn lẹpo tọn pọ́n taun. (1 Pita 5:7) Dopo to aliho he mẹ Jehovah nọ do mẹtọnhopọn etọn hia te lẹ mẹ wẹ alọgọ voovo he e nọ wleawu etọn na mí nado sọgan sẹ̀n ẹn po nugbonọ-yinyin po. (Isa. 48:17) Jehovah nọ jlo dọ mí ni mọaleyi sọn alọgọ he e wleawuna lẹ mẹ, titengbe to whenue mí to pipehẹ nuhahun he nọ hẹn ayimajai wá lẹ. Osẹ́n Mose tọn do nugbo ehe hia.

To Osẹ́n enẹ glọ, Jehovah wleawuna alọgọ owanyinọ de na “wamọnọ lẹ” kavi mẹhe to yaji lẹ, taidi tọṣiọvi lẹ, asuṣiọsi lẹ, po jonọ lẹ po. (Lev. 19:9, 10; Deut. 14:29) E yọnẹn dọ delẹ to devizọnwatọ emitọn lẹ mẹ sọgan tindo nuhudo alọgọ tọn sọn sinsẹ̀n-basitọ hatọ lẹ si. (Jak. 1:27) Enẹwutu, e ma jẹ dọ devizọnwatọ Jehovah tọn depope ni whleawu nado kẹalọyi alọgọ mẹhe e whàn nado wàmọ de tọn. Ṣigba eyin mí tlẹ wá kẹalọyi alọgọ mọnkọtọn janwẹ, e na yọ́n dọ mí ni wàmọ po mẹwhinwhàn dagbe po.

Etomọṣo, Jiwheyẹwhe dohia to Ohó etọn mẹ dọ omẹ emitọn lẹ sọ tindo dotẹnmẹ hundote lọ nado nọ nanumẹ. Flin “asuṣiọsi wamọnọ” he go Jesu doayi to tẹmpli mẹ to Jelusalẹm lọ. (Luku 21:1-4) E sọgan ko nọ mọaleyi sọn nuhe Jehovah gbọn owanyi dali wleawu etọn na asuṣiọsi lẹ to Osẹ́n Mose tọn glọ lẹ mẹ. Ṣogan, mahopọnna dọ e yin asuṣiọsi wamọnọ de, mí ma nọ flin in taidi mẹhe nọ kẹalọyi nunamẹ gba, ṣigba taidi nunamẹtọ. Gbigbọ nunamẹ tọn etọn dona ko hẹn ayajẹ wá na ẹn, dile Jesu dọ do dọ, “nado namẹ do dona [kavi ayajẹ] hú nado mọyi.” (Owalọ 20:35) Po nugbo ehe po to ayiha mẹ, nawẹ hiẹ sọgan nọ “namẹ” bo duvivi ayajẹ tọn gbọn?—Luku 6:38.

‘Etẹwẹ Yẹn Na Na OKLUNỌ?’

Psalm-kàntọ lọ kanse dọmọ: “Etẹwẹ yẹn na na . . . OKLUNỌ na dagbewà etọn lẹ hlan dali ṣie?” (Ps. 116:12) Dagbewà kavi ale tẹlẹ wẹ e mọyi? Jehovah nọgodona ẹn to ojlẹ “tukla po awubla po” tọn lẹ mẹ. Humọ, Jehovah sọ “whlẹn ayiha [etọn] sọn okú mẹ.” Todin, ewọ jlo na “na” kavi suahọ Jehovah to aliho de mẹ. Etẹwẹ psalm-kàntọ lọ na wà? E dọmọ: “Yẹn na depà ṣie lẹ hlan OKLUNỌ.” (Ps. 116:3, 4, 8, 10-14) E magbe nado hẹn opà he e do na Jehovah lẹpo di bo setonuna nubiọtomẹsi etọn lẹpo.

Hiẹ lọsu sọgan wà nudopolọ. Gbọnna? Gbọn gbẹninọ sọgbe hẹ osẹ́n po nunọwhinnusẹ́n Jiwheyẹwhe tọn lẹ po to whepoponu dali. Enẹwutu, hẹn ẹn diun dọ sinsẹ̀n-bibasi towe hlan Jehovah gbẹ́ yin nujọnu hugan to gbẹzan towe mẹ bo dike gbigbọ Jiwheyẹwhe tọn ni deanana we to nuyiwa towe lẹpo mẹ. (Yẹwh. 12:13; Gal. 5:16-18) Nado dọ hójọhó, hiẹ ma sọgan suahọ nuhe Jehovah wà na we lẹpo tọn fó gbede. Etomọṣo, ‘homẹ Jehovah tọn nọ hùn’ nado mọdọ hiẹ to nuhe go a pé lẹpo wà to sinsẹ̀nzọn etọn mẹ po ahundopo po. (Howh. 27:11) Lẹblanulọkẹyi jiawu nankọ die nado hẹn homẹ Jehovah tọn hùn to aliho ehe mẹ!

 Yidogọna Dagbemẹninọ Agun lọ Tọn

Matin ayihaawe, ale susu wẹ hiẹ na ko mọyi sọn agun Klistiani tọn mẹ to aliho voovo lẹ mẹ. Gbọn agun lọ gblamẹ, Jehovah ko hẹn núdùdù gbigbọmẹ tọn susu tin-to-aimẹ. Nugbo he hiẹ mọ lọ ko hẹn we jẹ mẹdekannu sọn nuṣiwa sinsẹ̀n tọn po zinvlu gbigbọmẹ tọn po si. (Joh. 8:32) To opli po plidopọ he “afanumẹ nugbonọ, nuyọnẹntọ” lọ nọ wleawuna lẹ po ji, hiẹ nọ mọ oyọnẹn he na plan we yì ogbẹ̀ madopodo mẹ to paladisi aigba ji tọn de mẹ yí, fie awufiẹsa po yajiji po ma na tin te. (Mat. 24:45-47) E họnwun dọ hiẹ ma sọgan jẹ ale he a ko mọyi lẹ lẹn ji kavi slẹ dehe a na gbẹsọ wá mọyi gbọn agun Jiwheyẹwhe tọn gblamẹ lẹpo pọ́n gbede. Etẹwẹ hiẹ sọgan na agun lọ do ehelẹ tamẹ?

Apọsteli Paulu wlan dọmọ: “Yè yí yẹyi do sìn agbasa lẹpo pli dopọ, bo sẹawubọ dopọ gbọn ehe mẹ yè gọ́ agómẹ lẹpo, kẹdẹdi azọ́n he ma nọ diọ lọ to ojlẹnu awà popo tọn mẹ, nado hẹn agbasa lọ sudeji hlan didó daga ede tọn to owanyi mẹ.” (Efe. 4:15, 16) Dile etlẹ yindọ Klistiani yiamisisadode lẹ whẹ́whẹ́ go wẹ wefọ ehe gando, nunọwhinnusẹ́n he e bẹhẹn lẹ sọ gando Klistiani lẹpo go to egbehe ga. Mọwẹ, dopodopo hagbẹ agun lọ tọn lẹ tọn wẹ sọgan yidogọna dagbemẹninọ po nukọnyiyi agun lọ tọn po. To aliho tẹlẹ mẹ?

Mí sọgan wà ehe eyin mí nọ dovivẹnu nado yin asisa tulinamẹ po kọfanamẹ gbigbọmẹ tọn po na mẹdevo lẹ to whepoponu. (Lom. 14:19) Mí sọgan sọ gọalọ nado “hẹn agbasa lọ sudeji” gbọn sinsẹ́n gbigbọ Jiwheyẹwhe tọn didohia to nuyiwa mítọn lẹpo mẹ hẹ yisenọ hatọ lẹ dali. (Gal. 5:22, 23) Humọ, mí sọgan dín dotẹnmẹ lẹ nado nọ “wà dagbe hlan omẹ popo, humọ hlan yé he yin yise whédo tọn lẹ.” (Gal. 6:10; Heb. 13:16) Hagbẹ agun lọ tọn lẹpo—yèdọ mẹmẹsunnu, mẹmẹyọnnu, jọja po mẹho po—wẹ sọgan yí adà de wà na ‘didó daga agbasa lọ tọn to owanyi mẹ.’

To yidogọ mẹ, mí sọgan yí nugopipe, huhlọn po nutindo mítọn lẹ po zan nado tindo mahẹ to azọ́n gbẹwhlẹngán tọn he mẹ agun lọ nọ doalọ te mẹ. Jesu Klisti dọmọ: “Vọnu wẹ mì mọyi.” Eyin mọ wẹ, nawẹ mí dona yinuwa gbọn? “Vọnu wẹ mì ni namẹ” wẹ e dọ. (Mat. 10:8) Enẹwutu, nọ tindo mahẹ gigọ́ to azọ́n titengbe yẹwheho Ahọluduta lọ tọn didọ po gbẹtọ lẹ hinhẹn zun devi tọn po mẹ. (Mat. 24:14; 28:19, 20) Be a ma penugo nado wà susu wẹ ya? Flin asuṣiọsi wamọnọ he Jesu dọho etọn lọ. Nuhe e na lọ whè tlala, ṣogan Jesu dọ dọ ewọ wẹ na hú mẹlẹpo. E na nuhe ninọmẹ etọn hẹn ẹn nado na lẹpo.—2 Kọl. 8:1-5, 12.

Nọ Kẹalọyi po Mẹwhinwhàn Dagbe Po

Ṣigba, e sọgan wá jọ bọ hiẹ na tindo nuhudo alọgọ agun lọ tọn. Ma whleawu gbede nado kẹalọyi godonọnamẹ agun lọ tọn depope to whenuena a to ahidi hẹ kọgbidinamẹ titonu ehe tọn lẹ blo. Jehovah ko de sunnu he pegan he nọ homẹtọnpọn lẹ nado “yìn agun” lọ—yé na gọalọna we to whlepọn po nuhahun lẹ po whenu. (Owalọ 20:28) Mẹho lẹ po hagbẹ agun lọ tọn devo lẹ po na miọnhomẹna we, gọalọna we, bosọ basi hihọ́na we to ojlẹ sinsinyẹn lẹ mẹ.—Gal. 6:2; 1 Tẹs. 5:14.

Ṣigba eyin hiẹ mọ alọgọ he a tindo nuhudo etọn delẹ yí, kẹalọyi i po mẹwhinwhàn dagbe po. Nọ kẹalọyi alọgọ he a mọyi lẹ po pinpẹn-nutọn-yinyọnẹn po. Nọ pọ́n alọgọ yisenọ hatọ towe lẹ tọn hlan taidi dohia nukundagbe majẹhẹ Jiwheyẹwhe tọn. (1 Pita 4:10) Naegbọn enẹ do yin nujọnu? Na mí ma jlo na yinuwa dile aihọnmẹnu susu nọ wà do bo ma nọ yọ́n pinpẹn nunamẹ tọn paali.

Yin Jlẹkajinọ Podọ Lẹnpọn Dagbenọ

To wekanhlanmẹ etọn hlan agun Filippi tọn mẹ, Paulu wlan gando Timoti go dọmọ: “Na yẹn ma tindo gbẹtọ ayihamọnọ de di ewọ, he na yí homẹ etọn lẹpo do jẹtukla to mì ji gba.” Ṣigba Paulu yidogọ dọmọ: “Na yemẹpo wẹ to onú yede tọn dín, e ma yin onú he yin Jesu Klisti tọn gba.” (Flp. 2:20, 21) Po ayidonugo  Paulu tọn enẹ po to ayiha mẹ, nawẹ mí sọgan dapana alọnu hinhẹn ján to “onú [míde] tọn” lẹ mẹ zẹjlẹgo to egbehe gbọn?

To whenue mí biọ alọgọ sọn mẹdevo lẹ si to agun mẹ, vlavo nado na mí whenu po ayidonugo yetọn po, mí ma dona tẹkudeji gbede dọ yewlẹ wẹ na didẹ nuhahun mítọn lẹ gba. Etẹwutu? Lẹnnupọndo ehe ji: Ayihaawe ma tin dọ homẹ mítọn na hùn taun eyin mẹmẹsunnu de gọalọna mí to agbasa-liho to whenue nujijọ ajiji de jọ do mí go. Ṣigba be mí na ko tẹkudeji dandan dọ e ni na mí alọgọ mọnkọtọn wẹ ya? Lala. Mọdopolọ, whenue e yindọ mẹmẹsunnu yiwanna mítọn lẹ nọ hùnhomẹ to whepoponu nado gọalọna mí, mí dona yin jlẹkajinọ po lẹnpọn-dagbenọ po gando whenu he mí nọ donukun sọn yé si lẹ go. To popolẹpo mẹ, nudepope he yisenọ hatọ mítọn lẹ na basi nado gọalọna mí to ojlẹ sinsinyẹn lẹ mẹ, e na yọ́n dọ mí ni dike yé ni wà ẹ sọn ojlo mẹ wá.

Matin ayihaawe, mẹmẹsunnu po mẹmẹyọnnu Klistiani towe lẹ po nọ tin to gbesisọ mẹ whepoponu nado gọalọna we sọn ojlo mẹ wá. Etomọṣo to whedelẹnu, yé sọgan nọma penugo nado gọalọna we to gigọ́ mẹ dile a jlo do. Eyin enẹ wá jọ janwẹ, gboadọ dọ Jehovah na nọgodona we to whlepọn depope he a sọgan pehẹ mẹ, dile e basi na psalm-kàntọ lọ do.—Ps. 116:1, 2; Flp. 4:10-13.

Enẹwutu, ma whleawu nado yí ayajẹ do kẹalọyi alọgọ depope he Jehovah nọ na we, titengbe to ojlẹ ayimajai po nuhahun tọn lẹ po mẹ blo. (Ps. 55:22) E jlo dọ hiẹ ni wàmọ. Ṣigba e sọ jlo dọ hiẹ ni yin “nunamẹtọ homẹhunhunnọ.” Enẹwutu, magbe mlẹnmlẹn “to ayiha [towe] mẹ” nado na nudepope he ninọmẹ towe hẹn ẹn yọnbasi na we, nado sọgan nọgodona sinsẹ̀n-bibasi nugbo lọ. (2 Kọl. 9:6, 7) To mọwiwà mẹ, hiẹ na penugo nado kẹalọyi po ayajẹ po bosọ namẹ po ahundopo po.

[Apotin/ Yẹdide to weda 31]

‘Etẹwẹ yẹn na na OKLUNỌ na dagbewà etọn lẹ hlan dali ṣie?’—Ps. 116:12

▪ Nọ dín dotẹnmẹ hundote lẹ nado “wà dagbe hlan omẹ popo”

▪ Yin asisa tulinamẹ po kọfanamẹ gbigbọmẹ tọn po na mẹdevo lẹ

▪ Nọ tindo mahẹ gigọ́ to azọ́n gbẹtọ lẹ hinhẹn zun devi tọn mẹ jẹ obá he mẹ ninọmẹ towe lẹ na we dotẹnmẹ jẹ