Jiwheyẹwhe Sinsẹ̀n Wẹ Yin Amasin Etọn!

To whenue gbehosọnalitọ awe delẹ yin oylọ-basina biọ owhé de gbè to Kenya, e paṣa yé nado mọ dawe agbasa pẹvinọ de to aimimlọn to akanma de ji. Gotò etọn whè podọ awà etọn lẹ whègli. To whenue yé dọhona ẹn do opagbe Jiwheyẹwhe tọn he dọ dọ “pòtẹn na lọ́n di agbanlin” ji, e vivi na dawe lọ sọmọ bọ e jẹ nuko ji.—Isa. 35:6.

Gbehosọnalitọ lọ lẹ sè dọ dawe enẹ he nọ yin Onesmus yin jiji po azọ̀n de po, ehe nọ zọ́n bọ ohú mẹtọn ma nọ sinyẹn. Ohú etọn lẹ ma sinyẹn sọmọ bọ eyin onú pẹvi de jẹ yé go yé nọ wẹ́n. Na nukunpedomẹgo dotowhé tọn dagbe de ma tin nado hẹn azọ̀n lọ gbọ wutu, Onesmus mọdọ awufiẹsa mẹ wẹ emi na zan pipotọ gbẹzan emitọn tọn te to kẹkẹ sẹkunọ lẹ tọn de mẹ.

Onesmus kẹalọyi nado plọn Biblu. Ṣigba, onọ̀ etọn gbẹ́ dọ e ma na yì opli Klistiani tọn lẹ bo na whẹwhinwhẹ́n dọ enẹ sọgan gbleawuna ẹn bosọ na yidogọna awufiẹsa etọn. Enẹwutu, mẹmẹsunnu lẹ nọ yí tito-to-whinnu opli lẹ tọn do kanji bọ Onesmus nọ dotó yé to whégbè. To whenue Onesmus plọnnu na osun atọ́n godo, e basi dide dọ emi na nọ yì opli lẹ mahopọnna owù he mọwiwà bẹhẹn lẹ.

Be opli Klistiani tọn lẹ yìyì yidogọna awufiẹsa Onesmus tọn wẹ ya? Kọdetọn lọ gbọnvo taun. Onesmus dọmọ: “E taidi dọ awufiẹsa he n’nọ to mimọ to whepoponu nọ depò to opli lẹ ji.” E lẹndọ todido yọyọ he emi tindo wẹ zọ́n bọ ninọmẹ emitọn do pọnte pẹẹde. Onọ̀ Onesmus tọn doayi e go dọ ninọmẹ visunnu emitọn tọn pọnte bọ homẹhun in sọmọ bọ ewọ lọsu yigbe nado plọn Biblu. E nọ dọ dọ: “Jiwheyẹwhe sinsẹ̀n wẹ yin amasin visunnu ṣie tọn.”

E ma dẹn bọ Onesmus lẹzun wẹnlatọ he ma ko yí baptẹm. To nukọn mẹ, e yí baptẹm bo to sinsẹ̀n todin taidi devizọnwatọ lizọnyizọnwiwa tọn. Dile etlẹ yindọ Onesmus ma sọgan nọ yí afọ etọn lẹ po dopo to awà etọn lẹ mẹ po zan, ewọ tindo ojlo nado wà nuhe go e pé lẹpo to sinsẹ̀nzọn Jehovah tọn mẹ. E jlo e nado basi gbehosọnalitọ alọgọtọ tọn, ṣigba e whleawu nado doalọwemẹ. Etẹwutu? Na e yọnẹn dọ emi dona nọ ganjẹ mẹdevo lẹ go to whelẹponu nado nọ sisẹ́ kẹkẹvi emitọn wutu. To whenue e dọ ahunmẹdunamẹnu etọn na Klistiani hatọ etọn lẹ, yé dopà nado gọalọna ẹn. Yé wàmọ nugbo, bo gọalọna Onesmus nado basi gbehosọnalitọ alọgọtọ tọn.

To whenue Onesmus jlo nado lẹzun gbehosọnalitọ whepoponu tọn, e whleawu whladopo dogọ. Ṣigba to gbèdopo, e mọ tulinamẹ he e tindo nuhudo etọn yí sọn wefọ egbesọegbesọ tọn de mẹ. Wefọ lọ wẹ Psalm 34:8 he dọmọ: ‘Dọ́pọ́n bosọ mọdọ Jehovah yọ́n.’ To whenue Onesmus lẹnayihamẹpọn do wefọ enẹ ji godo, e basi dide nado lẹzun gbehosọnalitọ whepoponu tọn. To alọnu din, e nọ dọyẹwheho na azán enẹ to sẹmẹsẹmẹ podọ e tindo plọnmẹ Biblu susu he to nukọnyi to gbigbọ-liho. To 2010, e yí Wehọmẹ Sinsẹ̀nzọn Gbehosọnalitọ tọn. Lehe homẹ Onesmus tọn hùn do sọ nado mọdọ dopo to mẹmẹsunnu awe he wá dọyẹwheho na ẹn to tintan whenu lẹ mẹ yin mẹplọntọ wehọmẹ lọ tọn!

To egbehe, Onesmus ko dibla tindo owhe 40. Mẹjitọ etọn lẹ masọ tin ba, ṣigba mẹmẹsunnu po mẹmẹyọnnu he to agun lọ mẹ lẹ po nọ penukundo nuhudo egbesọegbesọ tọn etọn lẹ go. E nọ dopẹ́ na dona he e to vivi etọn dù todin lẹpo tọn, podọ e to nukọnpọnhlan azán lọ to whenue “finẹnu lẹ ma to na dọmọ, yẹn to azọ̀njẹ.”—Isa. 33:24.