Dọnsẹpọ Jiwheyẹwhe

‘Wiwe Wẹ Yẹn Jehovah Jiwheyẹwhe Mìtọn’

Levitiku Weta 19

“WIWE, wiwe, wiwe, [wẹ Jehovah] Jiwheyẹwhe.” (Osọhia 4:8) Po hogbe ehelẹ po, Biblu dohia dọ Jehovah yin wiwe, ehe zẹẹmẹdo dọ e ma do oblọ bosọ yin dodonọ jẹ otẹn godo tọn mẹ. Jiwheyẹwhe ma tindo kanṣiṣa depope hẹ ylando; ylando ma sọgan bẹpla ẹ to aliho depope mẹ. Be ehe dohia dọ gbẹtọvi mapenọ lẹ ma sọgan dọnsẹpọ Jiwheyẹwhe he wé hugan lọ wẹ ya? Paali! Mì gbọ mí ni gbadopọnna hogbe he namẹ todido he yin kinkàndai to Levitiku Weta 19 mẹ lẹ.

Jehovah dọna Mose dọmọ: “Dọho hlan agun ovi Islaeli tọn lẹ tọn.” Nuhe yin didọ bọdego lẹ gando mẹhe tin to akọta lọ mẹ lẹpo go. Etẹwẹ Mose dona dọna yé? Jiwheyẹwhe zindonukọn dọmọ: ‘Dọhlan yé dọmọ, Mìwlẹ na yin wiwe, na wiwe wẹ yẹn Jehovah Jiwheyẹwhe mìtọn.’ (Wefọ 2) Islaelivi dopodopo dona yin wiwe. Hogbe lọ “mìwlẹ na yin” dohia dọ gbedide de wẹ ehe yin, e ma yin ayinamẹ. Be Jiwheyẹwhe to nuhe ma yọnbasi biọ to yé si wẹ ya?

Doayi e go dọ Jehovah ma do wiwe-yinyin etọn hia taidi nujinọtedo he kọ̀n akọta lọ dona jẹ de gba, ṣigba taidi whẹwhinwhẹ́n he nọgodona gbedide lọ. To hogbe devo mẹ, Jehovah ma biọ to sinsẹ̀n-basitọ mapenọ etọn he tin to Islaeli lẹ si nado yin wiwe jẹ obá dopolọ mẹ taidi ewọ gba. Enẹ ma na yọnbasi. Jehovah, “Wiwenọ Dopo lọ,” yin wiwe hugan mẹdevo depope. (Howhinwhẹn lẹ 9:10) Ṣigba, na Jehovah yin wiwe wutu, e nọ donukun sọn sinsẹ̀n-basitọ etọn lẹ si nado yin wiwe jẹ obá he mẹ e yọnbasi na gbẹtọvi mapenọ lẹ jẹ. Aliho tẹlẹ mẹ wẹ yé sọgan dohia dọ yé yin wiwe te?

To gbedide lọ nina nado yin wiwe godo, Jehovah slẹ nubiọtomẹsi delẹ gbọn Mose gblamẹ he gando adà gbẹzan tọn lẹpo go. Islaelivi dopodopo dona jẹ nubiọtomẹsi walọ dagbe tọn delẹ kọ̀n taidi: osi he jẹ didohia mẹjitọ lẹ po mẹhomẹ lẹ po (wefọ 3, 32); mẹtọnhopọn didohia tókunọ, nukuntọ́nnọ, po wamọnọ lẹ po (wefọ 9, 10, 14); nuyiwa hẹ mẹdevo lẹ po nugbodidọ po matin mẹnukuntahihopọn (wefọ 11-13, 15, 35, 36); podọ owanyi didohia sinsẹ̀n-basitọ hatọ lẹ. (Wefọ 18) Gbọn tonusisena nubiọtomẹsi ehelẹ po devo he yin sislẹ lẹ po dali, Islaelivi lẹ sọgan “yin wiwe hlan Jiwheyẹwhe” yetọn.—Osọha lẹ 15:40.

Gbedide lọ nado yin wiwe hẹn mí mọnukunnujẹ pọndohlan po aliho nuyiwa Jehovah Jiwheyẹwhe tọn lẹ po mẹ. Di apajlẹ, mí mọdọ nado tindo haṣinṣan pẹkipẹki de hẹ ẹ, mí dona wà nuhe go mí pé lẹpo nado nọgbẹ̀ sọgbe hẹ nujinọtedo walọ wiwe tọn etọn lẹ. (1 Pita 1:15, 16) Gbọn tonusisena nubiọtomẹsi enẹlẹ dali, mí sọgan duvivi gbẹzan dagbe hugan tọn.—Isaia 48:17.

Gbedide lọ nado yin wiwe sọ dohia dọ Jehovah dejido sinsẹ̀n-basitọ etọn lẹ go. Jehovah ma nọ donukun nususu sọn mí si hugan nuhe mí sọgan wà. (Psalm 103:13, 14) E yọnẹn dọ taidi gbẹtọvi he yin didá to apajlẹ etọn mẹ lẹ, mí tindo nugopipe lọ nado yin wiwe—e whè gbau jẹ obá de mẹ. (Gẹnẹsisi 1:26) Be ehe whàn we nado plọn nususu dogọ gando lehe hiẹ sọgan dọnsẹpọ Jiwheyẹwhe wiwe lọ, Jehovah do go ya?

[Yẹdide to weda 9]

Mí tindo nugopipe lọ nado yin wiwe