Afọdide Ṣinawe Nado Mọaleyi sọn Biblu Hihia Mẹ

“Biblu ma yin owe he disa hugan to whenuho gblamẹ kẹdẹ gba, e sọ yin owe he nọ disa hugan to whemẹwhemẹ.”—TIME MAGAZINE.

“N’nọ hia Biblu to whedelẹnu, ṣigba n’mọdọ e nọ ṣiapọmẹ gbau.”—KEITH, HÀNSINỌ DE HE DIYIN TO ANGLETERRE.

E BLAWU dọ gbẹtọ susu wẹ tindo Biblu, ṣogan e taidi dọ ale vude poun wẹ yé nọ mọyi sọn Biblu hihia mẹ. Ṣigba, mẹdevo lẹ nọ mọdọ nuhe yé hia to Biblu mẹ lẹ họakuẹ. Di apajlẹ, nawe de he nọ yin Nancy dọmọ: “Sọn whenue n’jẹ Biblu hia ji bo nọ lẹnayihamẹpọn do e ji to afọnnu fuu lẹpo, n’nọ wleawufo nado pehẹ nudepope he azán lọ sọgan hẹnwa. Aṣa ehe gọalọna mi taun nado de nuyiwadomẹji apọṣimẹ tọn ṣie lẹ pò hugan nuhe n’ko tẹnpọn to owhe 35 he wayi lẹ mẹ.”

Eyin hiẹ ma tlẹ hia Biblu pọ́n, be e ma fọnjlodotena we nado mọdọ mẹdevo lẹ mọ alọgọ yí sọn e mẹ ya? Eyin hiẹ nọ hia Biblu, be e na jlo we nado mọaleyi dogọ sọn wehihia towe mẹ ya? Eyin mọwẹ, tẹ́n afọdide ṣinawe he tin to hosọ ehe mẹ lẹ pọ́n.

Afọdide 1​—Nọ Hia Ẹ po Mẹwhinwhàn Dagbe Po

◼ Hiẹ sọgan hia Biblu taidi owe dagbe de poun, kavi hia ẹ na a mọdọ dandannu wẹ e yin, kavi hia ẹ po linlẹn lọ po dọ a sọgan mọ anademẹ nado pehẹ aihọn tukla tọn ehe. Ṣigba, a na mọaleyi hugan eyin yanwle towe wẹ nado plọn nugbo lọ gando Jiwheyẹwhe go. Humọ, hiẹ na mọ dona susu yí eyin mẹwhinwhàn towe wẹ nado yọ́n lehe owẹ̀n Biblu tọn sọgan yinuwado gbẹzan towe ji do.

Owe-wiwe zinnudo nujọnu-yinyin Biblu hihia po mẹwhinwhàn dagbe po tọn ji gbọn Biblu yiyijlẹdo mẹpọ́nnu de go dali dọmọ: “Eyin mẹdepope yin sisètọ ohó lọ tọn, bo ma yin basitọ, omẹ ehe taidi dawe de he to nukunmẹ jọwamọ  tọn etọn pọ́n to mẹpọ́nnu de mẹ. Na e pọ́n ede, bo tọ́nyi podọ to afọdopolọji e wọn gbẹtọ wunmẹ he e yin. Ṣigba ewọ he zín nukun do osẹ́n pipé he yin mẹdekannujẹ tọn lọ mẹ bo zindonukọn to e mẹ, omẹ ehe, na e ko lẹzun basitọ azọ́n lọ tọn, bo ma yin sisètọ nuwọntọ, na yin ayajẹnọ to bibasi i mẹ.”—Jakọbu 1:23-25.

Dawe he yin nùdego to apajlẹ ehe mẹ pọ́n nukunmẹ etọn to mẹpọ́nnu mẹ ṣigba e gboawupo nado jla awusọhia etọn do. Vlavo e yìnnukunpọn ede to mẹpọ́nnu lọ mẹ poun wẹ, kavi vlavo ma tindo ojlo nado jla ede do. Mọdopolọ, ale vude wẹ mí na mọyi eyin mí nọ hia Biblu to aliho mọmọ tọn mẹ kavi nọ gboawupo nado yí nuhe mí hia lẹ do yizan mẹ. To vogbingbọn mẹ, mí sọgan mọ ayajẹ nujọnu tọn yí eyin mí nọ plọn Biblu vẹkuvẹku po linlẹn lọ po nado lẹzun “basitọ” de, bo dike linlẹn Jiwheyẹwhe tọn lẹ ni yinuwado linlẹn po nuyiwa mítọn lẹ po ji.

Afọdide 2tọ​—De Lẹdogbedevomẹ Dejidego De

◼ Vlavo lẹdogbedevomẹ Biblu tọn susu wẹ tin to ogbè towe mẹ bọ hiẹ dona de dopo. Dile etlẹ yindọ hiẹ sọgan mọaleyi sọn lẹdogbedevomẹ Ohó Jiwheyẹwhe tọn depope mẹ, delẹ yí hogbe he ko dohó kavi he gẹdẹ bo vẹawu nado mọnukunnujẹemẹ lẹ zan. (Owalọ lẹ 4:13) Lẹdogbedevomẹ delẹ tlẹ diọ owẹ̀n wiwe Biblu tọn gbọn aṣa gbẹtọvi tọn lẹ hihodo dali. Delẹ ko yí tẹnmẹ yinkọ lẹ taidi “Jiwheyẹwhe” kavi “OKLUNỌ” do diọ oyín Jiwheyẹwhe tọn, Jehovah. Enẹwutu, eyin hiẹ jlo na de lẹdogbedevomẹ Biblu tọn he a na nọ hia, dín dehe sọgbe bo bọawu bosọ dọ̀n wehiatọ.

Wehiatọ livi susu lẹdo aihọn pé wẹ mọdọ Lẹdogbedevomẹ Aihọn Yọyọ Tọn jẹ yanwle enẹ kọ̀n. a Lẹnnupọndo whẹho mẹhomẹ de tọn ji to Bulgarie. E yì opli Kunnudetọ Jehovah tọn lẹ tọn bọ yé na ẹn vọkan Lẹdogbedevomẹ Aihọn Yọyọ Tọn dopo. To godo mẹ, e dọmọ: “N’ko hia Biblu na owhe susu, ṣigba n’ma ko hia lẹdogbedevomẹ he bọawu nado mọnukunnujẹemẹ podọ he yinuwado ji e sọmọ pọ́n.”

Afọdide 3tọ​—Nọ Hodẹ̀

◼ Hiẹ sọgan mọnukunnujẹ Biblu mẹ dogọ eyin a biọ to Dowatọ etọn si nado gọalọna we, dile psalm-kantọ lọ wà do dọmọ: “Hiẹ ni hùn nukun ṣie, na yẹn nido pọ́n onú jiawu jiawu lẹ sọn osẹ́n towe mẹ.” (Psalm 119:18) Nọ hodẹ̀ na Jiwheyẹwhe to whedepopenu he a jlo na hia Owe-wiwe, bo biọ to e si nado gọalọna we nado mọnukunnujẹ Ohó etọn mẹ. Hiẹ sọgan sọ dopẹ́ na Biblu he mí tindo, na matin ewọ mí ma sọgan yọ́n Jiwheyẹwhe.—Psalm 119:62.

Be Jiwheyẹwhe nọ sè odẹ̀ mọnkọtọn lẹ nado gọalọ ya? Lẹnnupọndo nuhe jọ do yọnnu awe he yin nọvi-nọvi lẹ bo to owhe aflanmẹ tọn mẹ to Uruguay go ji. Nuhe Biblu dọ to Daniẹli 2:44 mẹ paṣa yé bọ yé hodẹ̀ dọ Jiwheyẹwhe ni do mẹde hlan nado gọalọna yé nado mọnukunnujẹemẹ. To whenuena Biblu viyọnnu lọ lẹ tọn gbẹ́ pò to hùnhùn, Kunnudetọ Jehovah tọn awe wá ohọ̀n yetọn ji bo hia wefọ he yé hodẹ̀ gandego lọ pẹpẹ bosọ basi zẹẹmẹ dọ wefọ lọ dohia dọ Ahọluduta Jiwheyẹwhe tọn na diọtẹnna gandudu gbẹtọvi tọn lẹ. b Yọnnu he yin nọvi-nọvi lọ lẹ mọdọ Jiwheyẹwhe na gblọndo odẹ̀ yetọn na alọgọ.

Afọdide 4tọ​—Nọ Hia Ẹ Egbesọegbesọ

◼ Owe zinjẹgbonutọ de basi zẹẹmẹ dọ to mẹgbeyinyan nukunbianamẹtọ lẹ tọn to États-Unis to 11 septembre 2001 godo, “gbẹtọ susu jẹ Biblu họ̀ ji.” To ojlẹ ayimajai tọn mẹ kẹdẹ wẹ mẹsusu nọ lẹhlan Ohó Jiwheyẹwhe tọn. Ṣigba, Biblu dotuhomẹna mí nado nọ hia ẹ egbesọegbesọ, na e dọmọ: “Owe osẹ́n lọ tọn he ma na yì sọn onù  towe gba, ṣigba hiẹ na nọ lẹnayihamẹpọn to e mẹ finẹ to okle po ozán po, na hiẹ nido payi nado nọ wà kẹdẹdi enẹ he yè wlan do e mẹ finẹ lẹpo: na whenẹnu wẹ hiẹ na hẹn aliho towe yin nuyọnnanọ, podọ whenẹnu hiẹ na tindo nuwadotana dagbe.”—Jọṣua 1:8.

Nujọnu-yinyin Biblu hihia to gbesisọ mẹ tọn sọgan yin yiyijlẹdo dawe he to ahunzọ̀n jẹ bo de nado nọ dù núdùdù hunsindagbe tọn lẹ dogọ de go. Be ehe na wà dagbe na ẹn eyin whenue akọ́nnu to vivẹ́ ẹ janwẹ e nọ dù núdùdù hunsindagbe tọn lẹ ya? Lala. E dona tẹdo núdùdù hunsindagbe tọn dùdù go nado mọaleyi hugan. Mọdopolọ, Biblu hihia egbesọegbesọ na gọalọna we nado “hẹn aliho towe yin nuyọnnanọ.”

Afọdide 5tọ​—Nọ Yí Aliho Voovo Zan

◼ Biblu hihia sọn Gẹnẹsisi yì Osọhia sọgan wà dagbe, ṣigba aliho devo lẹ tintẹnpọn sọgan jlọmẹdote. Ayinamẹ delẹ die.

Nọ hia gando omẹ tangan de to Biblu mẹ go. Hia weta kavi owe lẹpo he dọhodo sinsẹ̀n-basitọ Jiwheyẹwhe tọn tangan de ji, taidi ehelẹ:

• Josẹfu: Gẹnẹsisi 37-50.

• Luti: Luti 1-3.

• Jesu: Matiu 1-28; Malku 1-16; Luku 1-24; Johanu 1-21. c

Nọ na ayidonugo hosọ dopo. Nọ hia wefọ he gando e go lẹ. Di apajlẹ, basi dodinnanu do hosọ odẹ̀ tọn ji, podọ hia ayinamẹ Biblu tọn he gando odẹ̀ go gọna delẹ to odẹ̀ susu he Biblu bẹhẹn lẹ mẹ. d

Nọ hia ẹ daga. Hiẹ sọgan mọ ale susu yí eyin a nọ hia Biblu daga. (Osọhia 1:3) Hagbẹ whẹndo tọn lẹ tlẹ sọgan nọ hia ẹ daga to pọmẹ, bo nọ hia hukan lẹ sọn mẹde ji jẹ mẹde ji kavi hia gando omẹ voovo lẹ go to Biblu mẹ. Mẹdelẹ nọ duvivi todidoai na Biblu hihia yidokanji tọn. Nawe de dọmọ: “E ma bọawuna mi nado bẹ Biblu hihia jẹeji, enẹwutu n’bẹjẹeji gbọn todidoai na Biblu hihia yidokanji dali. Todin, n’mọdọ Biblu hihia nọ hẹn ayajẹ susu wá hugan owe de poun hihia.”

Afọdide 6tọ​—Nọ Lẹnayihamẹpọn

◼ Mizọnmizọn he aihọn egbehe tọn nọ do namẹ po ayihafẹsẹnamẹnu etọn lẹ po ma nọ na tulimẹ nado lẹnayihamẹpọn. Ṣigba, dile nuhe mí dù dona yin lìlì whẹpo agbasa mítọn nido mọaleyi sọn e mẹ do, mí dona lẹnayihamẹpọn do nuhe mí hia sọn Biblu mẹ lẹ ji nado mọaleyi. Mí nọ wà ehe gbọn nulinlẹnpọn do nuhe mí hia ji podọ gbọn kanbiọ he taidi ehelẹ kinkanse míde dali dọ: ‘Etẹwẹ n’plọn gando Jehovah Jiwheyẹwhe go? Nawẹ ehe gando go e gbọn? Nawẹ n’sọgan yí i zan nado gọalọna mẹdevo lẹ gbọn?’

Ayihamẹlinlẹnpọn mọnkọtọn nọ dike owẹ̀n Biblu tọn ni jẹ ahun mítọn mẹ bo nọ hẹn ayajẹ he mí nọ mọ to Ohó Jiwheyẹwhe tọn mẹ jideji. Psalm 119:97 dọmọ: “Ṣo na yẹn ka yiwanna osẹ́n towe dole! Ewọ wẹ ayihamẹlẹnpọn ṣie to azán popo gbè.” Ayihamẹlinlẹnpọn do Owe-wiwe lẹ ji gọalọna psalm-kantọ lọ nado wleawu owanyi sisosiso tọn na nuhe e plọn lẹ.

Afọdide 7tọ​— Nọ Dín Alọgọ Nado Mọnukunnujẹ Biblu Mẹ

◼ Jiwheyẹwhe ma nọ donukun dọ mí ni mọnukunnujẹ Ohó etọn mẹ to gigọ́ mẹ na míde. Biblu lọsu tlẹ dohia dọ “onú delẹ tin to [emi] mẹ he vẹawu nado mọnukunnujẹemẹ.” (2 Pita 3:16) Owe Owalọ lẹ tọn dọho gando ahọluzọnwatọ Etiopianu de he ma mọnukunnujẹ nuhe e hia to Biblu mẹ de go. Jiwheyẹwhe do dopo to devizọnwatọ Etọn lẹ mẹ hlan nado yì gọalọna ẹn, podọ taidi kọdetọn de dawe Etiopianu lọ “to yìyì to aliho etọn ji bo to ayajẹ.”—Owalọ lẹ 8:26-39.

Hiẹ lọsu sọgan mọaleyi sọn nuhe a hia to Biblu mẹ gbọn alọgọ mimọyi nado mọnukunnujẹ nuhe a hia mẹ dali. Jaale, dín Kunnudetọ Jehovah tọn lẹ mọ to lẹdo towe mẹ, kavi kanwehlan adlẹsi he tin to weda 4tọ linlinnamẹwe ehe tọn ji na plọnmẹ Biblu whégbè tọn vọnu de.

[Nudọnamẹ odò tọn]